Álem chempıonaty: Hokkeıden Qazaqstan áıelder quramasy Italııaǵa ese jiberdi

ASTANA. KAZINFORM — Búgin shaıbaly hokkeıden Qazaqstan áıelder quramasy álem chempıonaty IIA dıvızıonynda ekinshi oıynyn Italııaǵa qarsy ótkizdi. 

Bizdiń hokkeıshiler úshin Italııa quramasy qolaısyz qarsylas bolyp otyr. Qazirge deıin eki qurama alty márte kezdesip, beseýinde ıtalııalyq hokkeıshiler jeńiske jetken edi.

Búgingi oıyn barysynda da qazaqstandyqtar qarsylasyna 0:2 esebimen ese jiberdi. Italııa quramasy osylaısha bıylǵy chempıonatta ekinshi márte úsh upaıǵa qol jetkizdi.

Olar budan buryn Slovenııany 12:0 esebimen tize búktirse, bizdiń qurama Ońtústik Koreıadan 4:2 esebimen basym tústi.

El quramasy endi 12 sáýirde Ulybrıtanııamen oınasa, 13 sáýirde Latvııa, 15 sáýirde Slovenııamen muzaıdynǵa shyǵady.

Oıyndar Ulybrıtanııanyń Damfrıs qalasynda ótip jatyr.

Bul toptan IA dıvızıonyna jalǵyz joldama beriledi. Atalǵan dıvızıonda el quramasy 2005, 2007, 2009, 2024 jyldarda baq synaǵan edi.

Eske salsaq, qazaqstandyq hokkeıshiler álem chempıonatyna daıyndyq aıasynda ótken joldastyq kezdesýde Ulybrıtanııadan 1:3 esebimen jeńilip qaldy.