Álem chempıonaty: Hokkeıden Qazaqstan áıelder quramasy ekinshi márte jeńildi

ASTANA. KAZINFORM - Shaıbaly hokkeıden Qazaqstan áıelder quramasy álem chempıonaty IIA dıvızıonynda úshinshi oıynynda Ulybrıtanııaǵa ese jiberdi.

Tarbysty ótken kezdesýde ulybrıtanııalyq hokkeıshiler jaýapsyz eki gol soǵyp ketti. Osylaısha otandastarymyz qarsylasyna 0:2 esebimen jol berip, týrnır kestesindegi jaǵdaıyn qıyndatyp aldy.

Qazir týrnır kestesinde úsh týrdan keıin toǵyz upaımen Italııa kósh bastap keledi. Odan keıingi oryndardaǵy Latvııanyń 6, Ońtústik Koreıanyń 5, Ulybrıtanııanyń 4, Qazaqstannyń 3 upaıy bar. Ázirge Slovenııa upaı enshilegen joq.

IA dıvızıonyna atalǵan toptan jalǵyz joldama beriledi.

Endi qazaqstandyq hokkeıshiler 13 sáýirde Latvııa, 15 sáýirde Slovenııamen muzaıdynǵa shyǵady.

El quramasy álem chempıonaty IA dıvızıonynda 2005, 2007, 2009, 2024 jyldarda baq synaǵan edi.

Eske salsaq, el quramasy budan buryn Ońtústik Koreıany 4:2 esebimen tize búktirip, Italııaǵa 0:2 esebimen ese jibergen edi.