Álem chempıonaty: Búgin fýtboldan Qazaqstan quramasy elordada Soltústik Makedonııamen kezdesedi

ASTANA. KAZINFORM - Búgin, 9 maýsymda fýtboldan Qazaqstan quramasy 2026 jylǵy álem chempıonaty irikteý kezeńi aıasynda elordada Soltústik Makedonııamen sheberlik baıqasady.

Kezdesýi jergilikti ýaqytpen 18:50-de bastalyp, «Qazsport» telearnasynan tikeleı efırde kórsetiledi.

Atalǵan oıynda bas tóreshi qyzmetin Fılıp Glova atqarady. Oǵan otandastary Danıel Polachek pen Pıter Bednar kómektesedi. Qosalqy tóreshi de sol eldiń ókili – Pıter Kralovıch.

Eki qurama buǵan deıin 2021 jyldyń 4 maýsymynda joldastyq kezdesý ótkizgen edi. Atalǵan oıynda qazaqstandyq fýtbolshylar qarsylasyna 0:4 esebimen ese jiberdi.

Іrikteý kezeńinde qazaqstandyq fýtbolshylar J tobynda synǵa túsip jatyr. Qarsylastary – Belgııa, Soltústik Makedonııa, Ýels, Lıhtenshteın.

Qazirge deıin el quramasy Ýelske (1:3) jol berip, Lıýksembýrgti (2:0) qapy qaldyrdy. Ázirge otandastarymyz týrnır kestesinde úsh upaımen 3-orynda tur.

Al Soltústik Makedonııa quramasy úsh oıynda 5 upaı jınap, týrnır kestesinde 2-orynda keledi. Olar aldymen Lıhtenshteındi (0:3) jeńip, odan keıin Ýels (1:1) pen Belgııamen (1:1) teń tústi.

Qazaqstandyq fýtbolshylar atalǵan uıym aıasynda 2002 jyldyń 25 sáýirinen bastap oıyn kórsetip keledi. Olar Álem jáne Eýropa chempıonattary, Ulttar lıgasy týrnırlerinde baq synady.

Ázirge el quramasynyń Gıbraltar, Izraıl, Ispanııa, Italııa, Kosovo, Lıhtenshteın jáne Shveıtsarııamen joly túıisken joq.