Álem chempıonaty aldynda Astanada 350-den astam balýan oqý-jattyǵý jıynyn ótkizedi
ASTANA. KAZINFORM — Kúres túrlerinen álem chempıonaty qarsańynda Astanada 350-den astam balýan qatysatyn halyqaralyq oqý-jattyǵý jıyny ótedi. Bul týraly Qazaqstan kúres federatsııasy bas hatshysy Gúlbaram Qulahmetova habarlady.
Oqý-jattyǵý jıyny 18-23 qazan aralyǵynda Astanadaǵy Halyqaralyq kúres akademııasynyń bazasynda uıymdastyrylady.
— UWW talaptaryna sáıkes sertıfıkattalǵan zamanaýı Akademııada búgingi jospar boıynsha 350-den astam balýan daıyndyqtan ótedi. Olardyń qatarynda AQSh, Japonııa jáne basqa da jetekshi kúres elderiniń ókilderi bar, — dedi ol Ortalyq kommýnıkatsııalar qyzmetinde ótken brıfıngte.
Qazaqstan kúres federatsııasy bas hatshysynyń aıtýynsha, álemniń myqty balýandary Qazaqstanǵa tek álem chempıonatyna qatysý úshin ǵana emes, jarys aldyndaǵy sońǵy daıyndyq kezeńin ótkizý úshin de keledi.
— Álemniń myqty balýandary Qazaqstanǵa tek jarysqa qatysý úshin emes, chempıonat aldyndaǵy sońǵy daıyndyq kezeńin ótkizý úshin de keledi. Bul qazaqstandyq sportshylarǵa álemniń úzdikterimen birge jattyǵyp, tájirıbe almasýǵa múmkindik beredi, — dedi Gúlbaram Qulahmetova.
Sonymen qatar álem chempıonatyn ótkizýge 250 volonter jumyldyrylady.
— Bul jastar úshin halyqaralyq deńgeıdegi úlken sporttyq is-sharany ishinen kórip, tájirıbe alýdyń múmkindigi. Biz úshin osy bilim men tájirıbeniń chempıonatpen birge ketpeı, Qazaqstanda qalýy mańyzdy, — dedi federatsııa ókili.
Onyń aıtýynsha, álem chempıonatynyń mańyzdy mindetteriniń biri — balalar men jastardy kúreske tartý. Osy maqsatta kúndizgi jarys sessııalaryna sport mektepteri men kúres sektsııalarynda jattyǵatyn balalar úshin tegin bıletter qarastyrylǵan.
Eske sala keteıik, jarysqa álemniń júzden astam elinen 1000-nan astam sportshy qatysady dep josparlanǵan.
