Álem boıynsha ótetin kórme óz jumysyn Astanadan bastady
ASTANA. QazAqparat - Elordadaǵy Oqýshylar saraıynda «WEOM» - World Exhibition of masks" álemdegi jalǵyz maskalar kollektsııasynyń eksklıýzıvti kórmesi ótip jatyr. Shara barysynda kelýshiler nazaryna jeke kollektsııa jııýshynyń dúnıeniń túkpir-túkpirinen jınaǵan 371 maskasy usynylady. Bul týraly astana.kz saıtyna Jastar saıasaty isteri Basqarmasynan habarlady.
«Atalǵan is-shara adamdardy ózge elderdiń tarıhymen tanystyrý maqsatynda uıymdastyryldy. 2017 jyly Astanaǵa jer-jerden túrli ult ókilderi keledi. Sondyqtan, aldymen osy memleketterdiń tarıhymen tanystyrmaqpyz. Bul jastardyń mádenıetin damytýǵa, mádenı qundylyqtarǵa daǵdylandyrýǵa, halyqtyń halyqaralyq jáne áleýmettik jobalarǵa nıettiligin damytýǵa septigin tıgizedi»,- dedi astana.kz saıtyna jobanyń bas dırektory Iohan Flaıer. Onyń aıtýynsha, dúnıe júzinde maskalardyń balamasy joq. Kórmege Venetsııa, Qytaı, Italııa, Batys Afrıka, Úndistan jáne basqa da memleketterden ákelingen maskalar qoıylǵan. Uıymdastyrýshylardyń aıtýynsha, álem boıynsha ótetin kórme óz jumysyn Astana qalasynan bastaıdy. Sodan keıin Reseı, Ýkraına, Belorýs, Qytaı, Germanııa, Frantsııa, Italııa jáne AQSh memleketteriniń iri qalalarynda uıymdastyrylady. Biregeı kórme Oqýshylar saraıynyń galereıasynda 14 naýryzǵa deıin jalǵasady. Kirý baǵasy - 200 teńge.
