Álem boıynsha koronavırýs juqtyrǵandar sany 4 mıllıonnan asty
BRıÝSSELЬ. QazAqparat – Koronavırýsqa baılanysty shekteý sharalaryn alyp tastaǵan birqatar elde naýqastar sany ósip ketken. Bul týraly dúısenbi kúni onlaın baspasóz máslıhatynda Dúnıejúzilik densaýlyq saqtaý uıymynyń bas dırektory Tedros Adhanom Gebreıesýs málimdedi, dep habarlaıdy QazAqparat.
«Demalys kúnderi biz bolashaqta týyndaýy múmkin máselelerdiń belgilerin kórdik», - dedi Gebreıesýs.
«Qytaıdyń Ýhan qalasynda shekteýler alynyp tastalǵannan keıingi alǵashqy aýrý anyqtaldy. Sondaı-aq Germanııa shekteýler jeńildetilgennen keıin aýrý juqtyrý oqıǵasynyń kóbeıgeni týraly habarlady», - dep atap ótti ol.
DDU basshysy elderdi saqtyqpen qaraýǵa jáne shekteýlerdi alyp tastamas buryn ulttyq densaýlyq saqtaý júıesi aýyrǵandar sanynyń ulǵaıýyna tótep berý úshin, sondaı-aq anyqtaý, qadaǵalaý jáne oqshaýlaý úshin qajetti resýrstardyń bolýyn qamtamasyz etýge shaqyrdy.
«Serologııalyq zertteýler kórsetkendeı, halyqtyń az bóliginde COVID-19-ǵa qarsy antıdeneler bar. Bul halyqtyń kóp bóligi vırýsqa qarsy turýǵa qaýqarsyz ekenin bildiredi», - dep aıtyp ótti Tedros Adhanom Gebreıesýs.
Dúnıejúzilik densaýlyq saqtaý uıymynyń bas dırektory álemde koronavırýs juqtyrýdyń rastalǵan jaǵdaılarynyń sany 4 mıllıon adamnan asqanyn habarlady.
