Álem birinshiligine keıbir balýandar daıyndyqsyz kelgen - Beıbit Ystybaev

ASTANA. QazAqparat - Astanada ótip jatqan qazaq kúresinen álem birinshiligine keıbir elderdiń balýandary daıyndyqsyz kelgen. Bul týraly úsh dúrkin Qazaqstan barysy Beıbit Ystybaev QazAqparat tilshisine aıtyp berdi.

«Tól sportymyz kúresten álem chempıonaty qyzyqty, tartysty ótip jatyr. Alaıda daıyndyqsyz kelgen balýandar da joq emes. Negizinen, Túrkııa, Ózbekstan balýandarynyń daıyndyǵy joǵary» - dedi Ystybaev.

Sondaı-aq, ol osyndaı álem balýandarynyń basyn qosý qazaq kúresiniń tanymaldylyǵyn arttyrýǵa úlken kómegin tıgizetindigin atap aıtty.

«Ár istiń óziniń maqsaty bolady. Bul dodanyń da basty maqsaty - qazaq kúresiniń tanymaldylyǵyn arttyrý. Ózge elderge qazaqtyń tól sportyn dáripteý. Biz budan utpasaq utylmaımyz. Sebebi bul joly nashar beldesken balýandar kelesi joly myqty daıyndyqpen kelýge tyrysady, tájirıbe jınaıdy. Barǵan elderine qazaq kúresi jaıynda aıtady. Osylaı kúresimiz damıdy», - deıdi sportshy.