«Álem Barysyna» qatysatyn eń alyp palýannyń salmaǵy - 161 keli
ASTANA. QazAqparat - 25 qazanda Pavlodarda ótetin «Álem Barysy» týrnırinde baq synasý úshin dúnıejúziniń 35 memleketinen jınalǵan 38 palýan salmaq ólsheý rásimine qatysty.
Kýba elinen kelgen 161 keli tartatyn 29 jastaǵy Oskar Rene Vıdal Braıson jarystyń eń aýyr palýany atandy. Al «Qazaqstan Barysy-2012» jeńimpazy Beıbit Ystybaevtyń salmaǵy 145 keli bolsa, «Qazaqstan Barysy-2013» jeńimpazy Aıbek Nuǵymarov 142 keli tartty. Basqa qazaqstandyq Asyl Bármenov - 105, al Rýslan Ábdirazaq 118 keli boldy. Aıta keteıik, dúbirli dodada tek salmaǵy 90 keliden asatyn túıe palýandar ǵana ózara básekege túsedi. Alty qurlyqtan kelgen sportshylar júlde qory 100 myń AQSh dollar bolatyn altyn belbeýge talasady. Týrnırdiń jalpy júlde qory - 150 myń AQSh dollary.
25 qazanda «Álem Barysy» týrnırin «Qazaqstan» ulttyq telearnasy men «KAZsport» telearnasy tikeleı efırde Astana ýaqytymen saǵat 12:00-de kórsetedi, dep habarlaıdy kazsport.kz.
