«Álem Barysyna» qatysatyn balýandar belgili boldy
ASTANA. QazAqparat - 8 qyrkúıek kúni Astanadaǵy «Barys Arenada» ótetin qazaq kúresinen «Álem Barysy» túıe balýandar arasyndaǵy álem chempıonatynda el namysyn qorǵaıtyn balýandardyń esimderi belgili boldy, dep habarlaıdy QazAqparat tilshisi.
EKSPO halyqaralyq mamandandyrylǵan kórmesi aıasynda ótkeli otyrǵan dodaǵa balýandar 22 tamyzdan bastap, Astanada oqý-jattyǵý jıynyn ótkizgen bolatyn. Jıyn nátıjesi boıynsha bas jattyqtyrýshy Erlan Estek bastaǵan baspkerlik keńes «Álem Barysynda» el namysyn qorǵaıtyn tórt balýandy tańdap aldy.
Olar: tórt dúrkin álem chempıony jáne Qazaqstan Barysy jeńimpazy Aıbek Nuǵymarov, álem chempıony jáne Qazaqstan Barysy týrnıriniń jeńimpazy Muhıt Tursynov, jas ta bolsa, bolashaǵynan zor úmit kúttiretin Aıbat Seıten jáne Dáýren Nuralınov.
Sonymen qatar, bıylǵy «Qazaqstan Barysy-2017» týrnıriniń jeńimpazy Elaman Erǵalıev pen tanymal túıe balýan Erjan Shynkeev joǵaryda aty atalǵan balýandar jattyǵý barysynda jaraqat alyp qalyp jatsa, orynyna boz kilemge shyqpaq.
Aıta keteıik, osymen ekinshi márte ótkeli otyrǵan dodaǵa álemniń 40 elinen eń myqty degen bir-bir balýan qatysady. Qazaqstan jarysty uıymdastyrýshy el retinde tórt balýan qatystyrýǵa múmkindik alyp otyr.
Birinshiliktiń jalpy júlde qory 30 mıllıon teńge. Onyń ishinde 15 mıllıony jeńimpazǵa tıesili. Dástúr boıynsha, altyn, kúmis jáne qola belbeýler de qarastyrylǵan. Jankúıerler de júldesiz qalmaıdy. Kórermender arasynda Renault Logan avtokóligi oınatylady.
Esterińizge sala keteıik, birinshi ret «Álem Barysy» 2014 jyly ótti. Oǵan 35 eldiń apaıtós balýandary qatysty.
Jarys baǵdarlamasy:
10:00 Іrikteý beldesýleri
13:00 Ashylý saltanaty
18:00 Aqtyq beldesýler
18:30 Jeńimpaz jáne júldegerlerdi marapattaý rásimi.
