«Álem barysyna» irikteý týrnırinde Muhıt Tursynov túıe balýan atandy
ASTANA. QazAqparat - Shyǵys Qazaqstan oblysynyń Besqaraǵaı aýdanynda «Álem barysyna» irikteý týrnıri ótti. Elimizdiń túkpir-túkpirinen kelgen 40 balýan absolıýtti salmaq dárejesi boıynsha ózara synǵa túsip, baıraqty básekege beriletin joldamalardy sarapqa saldy, dep jazady «Dıdar» gazeti.
Jarystyń ashylý saltanatynda jankúıerlerdiń nazaryna «Batamenen el kógerer» atty teatrlandyrylǵan qoıylym usynyldy. Budan soń jastardyń oryndaýyndaǵy «EXPO-2017», «Sport» jáne «Bir shańyraq astynda» atty úsh bólimnen turatyn fleshmob uıymdastyryldy. Aýdan ákiminiń mindetin atqarýshy Erbolat Rahmetýllınniń aıtýynsha, «Álem barysyna» irikteý týrnıri Elbasynyń «Bolashaqqa baǵdar: rýhanı jańǵyrý:» atty maqalasynda kórsetilgen mindetterdi júzege asyrý maqsatynda ótkizilgen.
- Dúbirli dodaǵa qatysqan balýandardyń eshqaısysy osal emes. Barlyǵy da qazaq kúresiniń jiligin shaǵyp, maıyn ishken sheberler. Jarys barysynda tájirıbeleri mol balýandar bir-biriniń aıla-tásilderin ábden meńgergenderi kórinip turdy. Jalpy, chempıonat óte tartysty ótti. «Álem barysyna» irikteý týrnırinde talaı dodalarda top jaryp, mańdaıy jarqyrap júrgen balýandarymyzdyń baǵy jandy, mereıi ústem boldy, - deıdi Erbolat Rahmetýllın.
«Qýyrdaqtyń kókesin túıe soıǵanda kóresiń» degendeı, dodanyń jankúıerler taǵatsyzdana kútken túıe balýandar aıqasy boldy. Bul salmaqta beldesken balýandardyń qatarynda «Qazaqstan barysy» atanǵan Rýslan Ábdirazaqov pen Muhıt Tursynov ta synǵa tústi.
- Jarys pen oǵan qatysýshylardyń deńgeıi jyldan-jylǵa ósip keledi. Máselen, búgingi básekege iriktelgen balýandardyń salmaqtary ártúrli bolǵanymen, boz kilemdegi beldesýler asa tartysty, teń dárejede ótti. Jigitterdiń sheberlikteri aıtarlyqtaı shyńdalǵany kórinip tur, - deıdi elimizdiń eńbek sińirgen jattyqtyrýshysy Shyńǵys Tursynov.
Al endi irikteý synynyń qorytyndysyna kelsek, týrnır jeńimpazy bolyp «Qazaqstan barysy-2014» dodasynyń jeńimpazy Muhıt Tursynov atandy. Ol aqtyq beldesýde astanalyq Aıbat Seıtennen basym túsip, túıe balýan ataǵyn jeńip aldy. Ekinshi oryndy 106 keli salmaq dárejesinde baq synasqan Aıbat Seıten ıelendi. Jarystyń úzdik úshtigin Mańǵystaýdan kelgen Nurdáýlet Jarylǵapov pen almatylyq Rýslan Ábdirazaqov túıindedi. Іrikteý synynyń júldegerleri dıplomdarmen jáne baǵaly syılyqtarmen marapattaldy.
