«Álem Barysyna» eń salmaqty, eń boıshań jáne eń jas balýandar qaı elden keldi

  ASTANA. QazAqparat - 8 qyrkúıekte Astanadaǵy «Barys Arenada» kópten kútken «Alem Barysy» chempıonaty ótedi. Álemniń 40 elinen kelgen balýandar kúni keshe salmaqtaryn ólshep, jerebe tartý arqyly ózderiniń qarsylastaryn anyqtady. Osy rette «QazAqparat» HAA tilshisi baıraqty dodaǵa qatysýshylarǵa qatysty qyzyqty derektermen bólisedi.

Qazaq kúresinen álemdik saıys tuńǵysh ret 2014 jyly Pavlodar qalasynda ótken bolatyn. Al bul jolǵy chempıonat shynymen de, burynǵydan da ózgeshe. Bulaı deıtinimiz, Qazaq kúresinen ótetin saıysqa buǵan deıin dál osynshama kóp eldiń balýandary qatysyp kórgen emes. Berisi Qytaı men Reseı, arǵysy Afrıka elderi men AQSh, Latyn Amerıka elderinen boz kilemniń shańyn qaqqan kil myqtylar bas qosyp otyr. Bul álemdik dodaǵa 7 qazaq balýany qatysady. Onyń ekeýi Qytaı jáne Mońǵolııa eliniń namysyn qorǵaýǵa kelip otyrǵan Esbol Jaqtan men Serik Berdimurat bolsa, qalǵan 5 balýan, atap aıtqanda, Aıbek Nuǵymarov, Dáýren Nuralınov, Aıbat Seıten, Erjan Shynkeev pen Elaman Erǵalıev Qazaqstannyń kók týyn jelbiretip shyǵady.

Endigi kezekte «Alem Barysy» dodasyndaǵy qyzyqty derektermen bólissek. Bul saıystaǵy eń kenje balýan Túrkııa elinen kelgen eken. Onyń jasy bar-joǵy 19-da. Al jasy eń úlken balýan Izraılden kelip otyr. 1968 jyly dúnıege kelgen Oleg Haıt jastarmen kúsh synasýǵa bel sheshken.
 

Jarystaǵy salmaǵy eń aýyr kúresker sonaý Jańa Zelandııadan at terletip Qazaqstanǵa jetken. 175 kelilik Chıko Reremoana Pemberton kúni keshe alyp denesimen «Mega Silk Way» oıyn-saýyq keshenindegi kórermenderdiń qoshemetine ıe boldy. Eń qyzyǵy, Chıko alǵashqy kezdesýdi Kongodan kelgen salmaǵy eń jeńil balýandardyń qataryndaǵy (91 keli) Tellı Ferole Oıenzamen ótkizetin boldy. Osy turǵyda aıta keterligi, bul chempıonatta salmaǵy eń jeńil balýandar ıraktyq Hadı Álı Hadı jáne qurlyq asyp Kamerýn elinen kelgen Dıadonna Dolassem bolyp shyqty.
 

«Alem Barysy» dodasyndaǵy eń boıshań balýan - reseılik Rústem Arslanov. Onyń boıy 197 santımetr.

Eske sala ketsek, 6 qyrkúıek kúni elordadaǵy «Mega Silk Way» saýda, oıyn-saýyq kesheninde «Alem barysy» dodasyna qatysatyn balýandar arasynda salmaq ólsheý jáne jerebe tartý rásimi ótken edi. Shara barysynda qazaq balýandarynyń irikteý kezeńindegi qarsylastary belgili boldy.