«Álem Barysyna» 40 eldiń apaıtós balýandary kele jatyr

ASTANA. QazAqparat - Astanada «EKSPO» kórmesi aıasynda ótetin «Álem Barysy» álem chempıonatyna 40 eldiń palýany qatysady. Bul týraly búgin Ortalyq kommýnıkatsııalar qyzmetindegi baspasóz máslıhatynda «Qazaqstan Barysy» qazaq kúresin damytý qory qamqorshylyq keńesiniń tóraǵasy Arman Shoraev málim etti, dep habarlaıdy QazAqparat.

«Álem Barysy» chempıonatyn «EKSPO» halyqaralyq kórmesi aıasynda uıymdastyrǵaly otyrmyz. Bul joba tek elimizde ǵana emes, álemniń basqa da memleketterinde joǵary reıtıngke ıe bolyp keledi. Bul joly  chempıonatqa álemniń 40 elinen alyp palýandar kele jatyr», - dedi Arman Shoraev.

Aıta keteıik, «Álem Barysy» osymen ekinshi ret ótkeli otyr. 2014 jyly ótken  alǵashqy týrnırge 35 eldiń apaıtós balýany qatysty. Olardyń arasynda dzıýdodan álem jáne Olımpıada chempıony chex Lýkash Krpalek, sambodan álem chempıony armenııalyq Garıbıan Arýtıýn, dzıýdodan álem chempıonatynyń júldegeri nemis Raımýnd Gırdts, kýrashtan álem chempıony ızraldyq Gregorı Rýdelson, alyshtan Azııa chempıony parsy Mýhammad Teımoýrı Sarah, Olımpıada jáne álem chempıonatynyń júldegeri kýbalyq Oskar Rene Vıdal Braıson jáne basqa ataqty balýandar bar. Tartysty báseke nátıjesinde altyn belbeý men 100 myń AQSh dollardy kýbalyq Braıson ıelendi. Ekinshi oryn Aıbek Nuǵymarovqa, úshinshi oryn reseılik Maksım Shırıaevqa buıyrdy.
 

Qazirgi ýaqytta álemniń túkpir-túkpirinen qatysýshylar Astanaǵa kele bastady. Búginde Avstralııa, Jańa Zelandııa, Qytaı jáne Gana balýandary elordaǵa jetti. Jarys sharty boıynsha barlyq qatysýshylarǵa qazaq kúresinen arnalǵan sporttyq kúrteshe men aıaq kıim berilýde. Balýandarǵa fotosessııa uıymdastyrylyp, sheteldik tóreshilerge qazaq kúresiniń erejeleri boıynsha semınar ótkiziledi.

Aıta keteıik, 6 qyrkúıek kúni saǵat 18:00-de «Mega Silk Way» oıyn-saýyq ortalyǵynda "Alem Barysy" qatysýshylarynyń saltanatty salmaq ólsheý jáne jerebe tartý rásimi bolady. Chempıonat 8 qyrkúıekte «Barys Arena» sport kesheninde ótedi.

Absolıýtti álem chempıonatyn tikeleı efırde «Qazaqstan», «Qazsport», túriktiń «TRT Avaz», Reseıdiń «Match! Planeta» jáne «Boks TV» telearnalary kórsetedi.