«Álem barysy» atanǵan Aıbekke 15 mln teńge tabystaldy

ASTANA. QazAqparat - Astanadaǵy «Barys Arenada» qyryqqa jýyq eldiń balýandarynyń basyn qosqan «Álem barysy» saıysynyń jeńimpazdary marapattaldy, dep habarlaıdy «QazAqparat» HAA tilshisi.

Dodanyń alǵashqy 10 ornyn jeńip alǵan balýandar marapatqa ıe boldy. Olardyń qatarynda qazaqstandyq Elaman Erǵalıev, reseılik Rústem Arslanov, ózbekstandyq Mýhsın Hısomıddınov, mońǵolııalyq Serik Berdimurat, armenııalyq Akob Arakelıan bar.

Júldeli úshin oryn Qazaqstan namysyn qorǵaǵan Erjan Shynkeevke buıyryp, oǵan qola beldikpen birge 3 mıllıon teńge tabys etildi. Kúmis beldikke ıe bolǵan  grýzııalyq Gýram Týshıshvılı 5 mln teńge aldy. Al  birinshi oryndy qanjyǵasyna baılaǵan Aıbek Nuǵymarovqa altyn beldikpen qatar 15 mln teńge tabystaldy.

QR Energetıka mınıstri, Halyqaralyq qazaq kúresi federatsııasynyń prezıdenti Qanat Bozymbaev pen «Qazaqstan Barysy» qazaq kúresin damytý qory qamqorshylyq keńesiniń tóraǵasy Arman Shoraev «Álem barysy» atanǵan Aıbekke altyn beldikti taqty.

Eske sala ketsek, «Álem barysy» dodasyna álemniń qyryqqa jýyq elinen 43 balýan ózara baq synasqan bolatyn. Qazaqstan tarıhynda ekinshi márte uıymdastyrylyp otyrǵan saıys álemniń 100 elinde tikeleı efırden kórsetildi.