«Álem barysy» atanǵan balýan Aıagóz aýdanyna ákim boldy
SEMEI. KAZINFORM - Búgin Abaı oblysynyń ákimi Berik Ýálı Aıagóz aýdanynyń aktıvine jańa ákimdi tanystyrdy, dep habarlaıdy Abaı oblysy ákimdiginiń baspasóz qyzmeti.
Jańa Konstıtýtsııanyń qabyldanýyna baılanysty «Qazaqstan Respýblıkasyndaǵy saılaý týraly» Konstıtýtsııalyq zańyna tıisti ózgerister engizildi. Atalǵan ózgeristerge sáıkes oblystyq mańyzy bar qalalar men aýdandar ákimderin saılaý ınstıtýty joıyldy. Qazirgi ýaqytta oblystyq mańyzy bar qalalar men aýdandardyń ákimderin Qazaqstan Respýblıkasynyń zańnamasynda belgilengen tártippen oblys ákimderi tıisti máslıhattardyń kelisimimen taǵaıyndaıdy.
«Qazaqstan Respýblıkasynyń memlekettik qyzmet týraly» Zańynyń 25 babyna sáıkes QR Prezıdenti ákimshiliginiń, Aıagóz aýdany máslıhat depýtattarynyń kelisimimen jáne oblys ákiminiń ókimimen Aıagóz aýdanynyń ákimi laýazymyna Aıbek Serikboluly Nuǵymarov taǵaıyndaldy.
Aıta keteıik, bul – jańa Konstıtýtsııa qabyldanǵannan keıingi Abaı oblysyndaǵy ekinshi aýdan ákiminiń taǵaıyndaýy.
-Aıagóz aýdany – oblystaǵy strategııalyq mańyzy bar birden bir aımaq. Aýdan aýyl sharýashylyǵyn, ónerkásipti jáne áleýmettik salany damytý úshin joǵary áleýetke ıe. Sonymen qatar logıstıka men saýdanyń damýyna yqpal etetin mańyzdy kólik qıylysynda, ıaǵnı, toǵyz joldyń torabynda ornalasqan. Sol sebepti qolda bar múmkindikti paıdalanyp, bul jumystardyń bárin júıeli jolǵa qoıyp, memlekettik baǵdarlamalardy sapaly jáne laıyqty júzege asyrý asa mańyzdy. Aıbek Serikbolulynyń tájirıbesi jetkilikti. Osy ýaqyt ishinde óziniń iskerlik jáne uıymdastyrýshylyq qasıetterin tanyta bildi. Sondyqtan artylǵan senimdi aqtap, Aıagóz aýdanynyń jurtshylyǵymen birlese otyryp, aýdannyń odan ári damyp, gúldenýine bar kúsh-jigerin salyp, aıanbaı qyzmet etedi dep senemin, – dedi Berik Ýálı.
Aıbek Serikboluly Abaı aýdanynyń Qundyzdy aýylynda dúnıege kelgen. Semeı memlekettik pedagogıkalyq ınstıtýtyn «Dene shynyqtyrý», Qazaq ınnovatsııalyq gýmanıtarlyq – zań ýnıversıtetin «zańger» mamandyqtary boıynsha támamdaǵan.
Eńbek jolyn Semeı qalasyndaǵy qazaq kúresi bóliminde oqytýshy-jattyqtyrýshy bolyp bastady. Shyǵys Qazaqstan oblysynyń joǵary sport sheberligi mektepterinde nusqaýshy-ádisker, qazaq kúresinen jattyqtyrýshy-oqytýshy bolyp eńbek etti.
Alty jyldan astam ýaqyt Semeı qalasyndaǵy Kólik kolledjiniń dırektory boldy. Osy laýazymǵa taǵaıyndalǵanǵa deıin Aıagóz aýdany ákiminiń orynbasary, aýdan ákiminiń mindetin atqarýshy qyzmetin atqardy.
Osyǵan deıin Pavlodar oblysynyń Aqtoǵaı aýdanyna jańa ákim taǵaıyndalǵany týraly jazdyq.
