Álem astanalary Belgııa týynyń túsine boıaldy (FOTO)
ASTANA. QazAqparat - Bul túnde Berlın, Parıj, Amsterdam, Rım, Afıny jáne taǵy basqa qalalardyń ǵımarattary men eskertkishteri Brıýsselde bolǵan lańkestik áreketter qurbandaryn eske alý qurmetine Belgııa týynyń tústerimen jaryqtandyryldy, dep habarlaıdy RT.
Belgııa týynyń tústerimen jaryqtandyrylǵandardyń biriniń qatarynda taıaýda lańkestik shabýylǵa ushyraǵan Parıjdegi Eıfel munarasy bar.
Bul bastamany Berlınde de qoldady: munda nemis astanasynyń ortalyǵyndaǵy ataqty Brandenbýrg qaqpasy belgııalyq týdyń túsine boıaldy.
Shabýyl qurbandaryn Amsterdamda da eske aldy. Onda korol saraıy jaryqtandyrylǵan.
Rım qalasynda jaryqtandyrý Italııanyń eń úlken Trevı sýburqaǵynyń janynda, sondaı-aq Kapıtolıı tóbesinde uıymdastyryldy.
Kóne Afınynyń bas shirkeýi - Parfenon da qaza tapqandardy eske aldy. Belgııalyq týdyń túsine Dýbaı da boıaldy. Meksıka astanasynyń bıligi de bul bastamaǵa qoldaýyn bildirdi.
Eske sala keteıik, keshe Brıýsselde birneshe lańkestik shabýyl oryn alǵan. Jergilikti ýaqyt boıynsha tańǵy saǵat 8-diń shamasynda Brıýssel áýejaıynda qatarynan eki jarylys boldy. Keıinirek taǵy bir jarylǵysh zat qala metrosynda iske qosylǵan. Oqıǵa saldarynan 30 adam qaza taýyp, 230-dan astam adam jaraqattandy.
