«Álem arýy» baıqaýy Indonezııa musylmandarynyń qarsylyǵyna tap boldy
ASTANA. 7 qyrkúıek. QazAqparat - Indonezııalyq musylmandar óz elderinde «Álem arýy» baıqaýyn ótkizýge narazylyq bildirip, kóshege shyqty. El musylmandary bılik oryndarynan atalmysh baıqaýdyń sharıǵatqa qaıshy ekenin aıtyp, ony ótkizbeý jóninde talap qoıdy. Bul jaıynda TheJakartaGlobe aqparat kózi habar taratty.
«Bul shara ótetin bolsa, Qudaıdyń qaharyna ushyraımyz»,- dedi narazylyq bildirýshilerdiń birqatary. Sherýge shyqqan 200-ge tarta adam «Áıelderdi qolbalaǵa aınaldyratyn «Álem arýy» baıqaýynan bas tartamyz» degen jazý jazylǵan plakatty kóterip, el astanasy - Jakart qalasynda ornalasqan uıymdastyrýshylardyń shtab-páterine keldi.
«Bul baıqaýdyń qater tóndirip, jat ádetke jol ashqannan basqa bereri joq»,- deıdi narazylyq bildirýshiler ashyna til qatyp.
Muslim.kz saıtynyń jazýynsha, narazylyq sharasy tek el astanasynda ǵana emes, sonymen qatar, Sýrabaı men Indonezııanyń asa iri qalalarynda ótkenin aıta ketý kerek.
Alaıda, uıymdastyrýshylar da raıynan qaıtar emes. Olardyń pikirinshe, bul shara Indonezııanyń salt-dástúri men ádet-ǵurpyna qaıshy kelmeıdi.
