«Álem arýy» ataǵyna amerıkandyq sulý ıe boldy
ASTANA. 21 jeltoqsan. QazAqparat - Las-Vegasta ótken «Álem arýy-2012» sulýlyq konkýrsynyń sońǵy kezeńinde amerıkandyq Olıvııa Kalpo jeńimpaz atandy, dep habarlady Lenta.rý Agence France-Presse agenttigine silteme jasap.
Buǵan deıin «AQSh arýy» atanǵan ol jeńimpaz tájin dástúr boıynsha ótken jylǵy «Álem arýy» angolalyq Leıla Lopestiń qolynan aldy.
Konkýrsta ekinshi oryndy fılıppındik Janın Týgonon jeńip aldy. Úshinshi orynda - Venesýeladan Iren Sofııa Esser Kvıntero.
Kalpo 1997 jyldan beri konkýrsta jeńimpaz bolǵan alǵashqy AQSh ókili. Sol joly bul ataqqa Brýk Lı ıe bolǵan edi.
Konkýrsqa ártúrli elderden barlyǵy 89 qyz qatysty. Erejege sáıkes konkýrsqa qatysýshylar turmysqa shyqpaǵan jáne balaly bolmaýy, sondaı-aq jasy 27-den aspaýy jáne 18-den kishi bolmaýy tıis.
