«Álem arýy-2023» baıqaýynyń qatysýshysy otandastaryna alǵysyn bildirdi

«Álem arýy-2023» sulýlyq baıqaýyna Qazaqstan atynan qatysqan Tomırıs Zaır fınaldan keıin ózine qoldaý kórsetken otandastaryna alǵysyn bildirdi, dep habarlaıdy Kazinform.

«Qazaqstan, qoldaý kórsetkeniń úshin rahmet! Men seni jaqsy kóremin! Bul — keremet tájirıbe jáne osyndaı aýqymdy jobada súıikti elimdi tanystyrýǵa tamasha múmkindik aldym.  Árqaısylaryńyzǵa senimderińiz úshin, mahabbattaryńyz úshin rahmet», — dep jazdy ol Instagram-daǵy paraqshasynda. 

Tomırıs baıqaýdyń arqasynda álemniń túkpir-túkpirinen kelgen qyzdarmen tanysyp, olardyń mádenıetin az da bolsa bilgenin tilge tıek etti.  

20 jastaǵy qazaqstandyq arý otandastaryn ózin tanytýdan, jeke qarym-qabiletin kórsetýden  qoryqpaýǵa jáne kóp armandaýǵa shaqyrdy. 

«Biz armandaǵan nársege jetý úshin myqtymyz, óıtkeni árqaısymyz jaqsy degen baǵaǵa laıyqpyz», - dep qosty Tomırıs Zaır. 

Tomırıs Zaır – Miss Almaty-2022 jáne Vice Miss Qazaqstan-2022 ataqtarynyń ıegeri. Ol ekinshi kýrs stýdenti, «marketıng» mamandyǵy boıynsha bilim alyp júr. Sońǵy 4 jyldan beri model bolyp jumys isteıdi. 6 jasynan bastap mýzyka mektebinde dombyra men fortepıano úırendi.

«Álem arýy-2023» 72-shi halyqaralyq sulýlyq baıqaýynda otandasymyz birneshe obrazda óner kórsetti. 

Eske sala keteıik, «Álem arýy» baıqaýynda Nıkaragýa ókili jeńiske jetti.