ÁLEM APTA ІShІNDE: Vatıkan Papasyz qaldy

11 aqpan kúni ótken konsıstorııada 85 jastaǵy Benedıkt XVI Papa taǵynan bas tartatyndyǵyn jarııa etken bolatyn. Ol Vatıkan bıliginen ketýge sheshim qabyldap, kanonıkalyq zańnyń 332-shi babyn paıdalanǵan tarıhtaǵy ekinshi papa bolyp qalmaq. Óziniń taqtan bas tartý sheshiminiń túp tórkinin ashqan ol katolık shirkeýiniń basshysy mindetin odan ári atqarýǵa shamasy jetpeıtindigin ashyq aıtty. Onyń atap ótýinshe, pontıfıkattan bas tartýy «shirkeýler ıgiligi» úshin jasalǵan qadam boldy.

Benedıkt XVI Apostol taǵyna 2005 jyldyń 19 sáýirinde saılanǵanǵa deıin 265-shi pontıfık edi.

Sársenbi kúni pontıfıktiń sońǵy jalpyǵa ortaq aýdıentsııasy ótti. osyǵan oraı Vatıkandaǵy Áýlıe Petr alańynda shamamen 200 myń dindar men saıahatshylar jınaldy. Rım papasy jınalǵan dindarlar aldynda ıtalıan tilin qospaǵanda 11 tilde sóz sóıledi. Apostol saraıynyń balkonyna shyǵyp sóz sóılegen Benedıkt XVI ár kezde de Jaratqannyń bar ekendigin sezingenin, al júregi Qudaıǵa degen alǵysqa toly ekendigin basa aıtty. «Qazirgi ýaqytta mende zor senim bar. Óıtkeni men, bizdiń barlyǵymyz da Іnjildiń shynaıy sózi - bul Shirkeý qýaty, bul onyń ómiri ekendigin bilemiz»,- dedi ol. Benedıkt XVI katolık shirkeýi jáne onyń jolyn ustanýshylar durys jolda ekendigine senim artty.

«Men jeke ómirge, saıahattaý, kezdesýler, qabyldaýlar men konferentsııalar syndy ómirge qaıta oralmaımyn. Men kresti tastamaımyn, biraq krestke kerilgen Qudaıdyń qaraýynda jańa sapada qalamyn», - dedi pontıfık. Ol «bul jer betinde óziniń minájatynyń sońǵy kezeńin» atqaratyn «qarapaıym minájatshy» bolyp qalatyndyǵyn basa aıtty.

Rım papasy aýdıentsııany latyn tilinde minájat etýmen aıaqtap, jınalǵan ondaǵan myń adam ony zor qoshemetpen shyǵaryp saldy. Aýdıentsııa Klıment zalynda támamdalyp, ol jerde taqtan óz erkimen bas tartqan pontıfık birqatar memlekettiń basshylaryn qabyldady. Endigi ýaqytta ol «Qurmetti papa» bolyp qalady jáne budan arǵy ýaqytta «Uly mártebeli» dep atalýy múmkin.

Beısenbi kúni Benedıkt XVI resmı túrde Rım papasy bolýyn resmı túrde toqtatty. Benedıkt XVI-nyń 2012 jyldyń jeltoqsan aıynan istep turǵan Twitter mıkroblogy da 28 aqpan kúni jabyldy. Demalysqa keter aldynda pontıfık Vatıkannan shyǵyp, tikushaqpen Rımnen 24 shaqyrym jerdegi papanyń jazdyq Kastel Gandolfo rezıdentsııasyna keldi.

Benedıkt XVI-nyń Vatıkandaǵy Rım-katolık shirkeýiniń basshysy retindegi qyzmeti aıaqtalǵannan keıin «bos taq» rejımi bastalyp, ol Rım papasyn saılaıtyn kardınaldar keńesinde jańa papa saılanatyn naýryz aıyna deıin sozylady. Osy ýaqyt aralyǵynda Rım-katolık shirkeýiniń basshysy qyzmetin Qasıetti taqtyń memlekettik hatshysy kardınal Tarchızıo Bertone atqarady. Murager 15 naýryzǵa deıin saılanady degen boljam bar.

Taıaý aralyqta saılaýshy kardınaldar jańa papany saılaýdy bastaıdy. Rım Papasy taǵyna kimniń otyratyndyǵy ázirshe belgisiz. Degenmen kim bolsa da, oǵan shirkeý tóńireginde oryn alǵan sońǵy janjaldy retteýine týra keledi. Óıtkeni, «Vatılıks isi» degen ataý berilgen Vatıkannyń qupııa qujattarynyń syrtqa shyǵýymen aınalysqan komıssııa ázirlegen qupııa qujattardy Benedıkt XVI kelesi papanyń qolyna ǵana tabys etedi.

Benedıkt XVI-nyń bólme qyzmetshisi Vatıkannyń qupııa qujattaryn urlap alyp, ony jýrnalıst Djanlýıdjı Nýtstsıge bergen bolatyn. 2012 jyldyń mamyrynda «Uly mártebeli» degen ataýmen kitap jaryqqa shyqty. Onda Vatıkandaǵy jemqorlyq jáne shirkeý ókilderiniń qatysy bar seksýaldy janjaldar keńinen baıandalǵan. Birqatar baǵalaýlar boıynsha, dál osy janjaldar pontıfıktiń taqtan bas tartýynyń shynaıy sebebi boldy.

Rım papasyn saılaıtyn kardınaldar keńesi erejesine sáıkes jasy 80-nen aspaǵan Rım-katolık shirkeýiniń barlyq kardınaldary jańa Papa saılaýyna túse alady. Búginde bul talaptarǵa 117 saılaýshy kardınal saı keledi. Baıqaýshylardyń aıtýyna qaraǵanda, jańa pontıfıkti saılaýda Italııa men AQSh barynsha yqpaldy bolmaq.

Kardınaldar saılaýy sátti ótkizilgennen keıin alaýoshaq (kamın) jaǵylyp, murjadan aq tútin kókke kóteriledi. Saılanýshy qajetti barlyq dárejelerdi alǵannan keıin óziniń latyn tilinde jańa esimin ataıdy. Osydan keıin Apostol saraıy balkonnynan «Habemus Papam!», latynnan aýdarǵanda «Bizde Papa bar!» dep jarııa etiledi.