ÁLEM APTA ІShІNDE: Ulybrıtanııany mıgranttar basyp barady
ASTANA. QazAqparat - Ótip bara jatqan apta ishinde álemdik qoǵamdastyq 69-shy Kann kınofestıvaliniń qorytyndysyn talqylady. Aıta keterligi, buqaranyń kútkeni men synshylardyń boljamy qıys ketti. Kórgen-bilgeni, ómirden túıgeni kóp tóreshiler jyldyń úzdik óner týyndysyn anyqtaý úshin qoldarynan kelgen barlyq múmkinshilikti jasady desek te bolady. Jahan jurtshylyǵy osynaý mádenı jańalyqtan bólek Ulybrıtanııadaǵy kóshi-qon saıasatyna qatysty pikirsaıysqa da eleńdeı qulaq túrdi. Eldiń Eýropalyq odaqtan shyǵý-shyqpaýyna qatysty ótkiziletin referendýmǵa 1 aı qalǵan kezde Ulttyq statıstıka bıýrosy óz esebin jarııa etti. Onda ótken jyl ishindegi Ulybrıtanııadaǵy mıgratsııa tarıhı eń joǵarǵy shegine jetip qalǵandyǵy aıtylǵan.
69-shy Kann kınofestıvali jabyldy
Jeksenbiden dúısenbige qaraǵan túnde Lazýr jaǵalaýynda 69-shy Kann kınofestıvaliniń jabylý saltanaty ótti. Aǵymdaǵy jyly kezekti kınokórsetilim mamyrdyń 11-22-si aralyǵynda ótken bolatyn. Ataǵy jer jarǵan esimder men sapaly fılmderdiń baıqaýǵa usynylǵanyna qaramastan júldeli oryndar kimge buıyratyndyǵyn dóp basý qıyn edi. Avstralııalyq rejısser Djordj Mıller basqarǵan tóreshiler de sońǵy sátke deıin shıelenisti ahýaldy saqtady.
Sonymen Altyn palma butaǵy dep atalatyn bas júlde brıtandyq Ken Loýchtyń «ıA, Denıel Bleık» fılmine buıyrdy. Bul drama densaýlyǵyndaǵy kináratqa baılanysty ómir súrýi úshin qarjy taba almaıtyn, áıelinen aıyrylyp, balasyz qalǵan jumysshynyń taǵdyrynan syr shertedi. Bleık memleket kómegine júginýge májbúr bolyp, járdemaqy alý úshin qujattar jınaıdy. Alaıda, bul is egde jastaǵy azamatqa ońaıǵa túse qoımaıdy. Óıtkeni, ol ómiri qolyna balǵadan ózge ne smartfon, ne kompıýterdiń túrtkinshegin ustap kórmegen edi. Aıta keterligi, brıtandyq rejısser bul júldeni osymen ekinshi márte utyp aldy. Este bolsa, 2006 jyly onyń «Veter, kotoryı kolyshet veresk» dep atalatyn fılmi dál osy syılyqqa laıyq dep tanylǵan edi.
Festıvaldiń gran-prıi «Eto vsego lısh konets sveta» fılmine berildi. Bul týyndyny Kannǵa baıqaýdyń eń jas qatysýshysy kanadalyq Ksave Dolan ákelgen edi. Fılm 12 jyldan keıin týǵan úıine oralyp, týystaryna óziniń aıyqpas dertke dýshar bolǵandyǵyn jarııa etpek bolǵan Lýı esimdi tabysty qalamgerdiń ómirin sýretteıdi.
Al qazylar syılyǵy «Amerıkanskaıa mılashka» komedııalyq dramasy úshin aǵylshyn rejısseri ári stsenarııshi Andrea Arnoldqa berildi. Onyń bul týyndysy bir top jaspen birge úıinen qashyp ketken jasóspirim qyzdyń taǵdyryna arnalǵan.
Rejıssýra atalymyndaǵy syılyqty qazylar rýmyndyq Krıstıan Mýndjıý («Vypýsknoı») men Olıve Assaııasqa («Personalnyı zakýpşık») bólip berdi.
Brııante Mendozanyń «Mama Roza» fılminde basty róldi somdaǵan fılıppındik Jaklın Joze úzdik aktrısa atandy.
Irandyq Asgar Fardahtyń «Klıent» fılmi eki nagrada ıelendi. Bul týyndy úzdik stsenarıı atalymynda jeńimpaz atansa, osy fılmniń basty rólinde oınaǵan Shahab Hosseın «Úzdik erkek róli» atalymynda júldege ıe boldy.
Ispandyq rejısser Hýanho Hımenestiń «Timecode» fılmi úzdik qysqametrajdy fılm atalymynda «Altyn palma butaǵyna» laıyq dep tanyldy. «Erekshe kózqaras» baǵdarlamasynda fındik rejısser ıÝho Kýosmanenniń «Samyı schastlıvyı den v jıznı Ollı Mıakı» týyndysy jeńiske jetti. Al úzdik rejısserlik debıýtke beriletin «Altyn kamera» frantsýzdyq rejısser Ýde Benıamınge buıyrdy.
Ulybrıtanııanyń EO-ǵa músheligine qatysty pikirsaıys qyzyp tur
Ulybrıtanııadaǵy mıgratsııa tarıhı eń joǵarǵy deńgeıge jetip qaldy. Bul jaıynda el bıliginiń Eýropalyq odaq quramynan shyǵýǵa qatysty referendým qarsańynda jarııa etken sońǵy esebinde aıtylǵan. Ulttyq statıstıka bıýrosy jarııa etken málimetter Ulybrıtanıadaǵy mıgratsııalyq ósim, ıaǵnı elden ketkender men kelgender arasyndaǵy aıyrma ótken jyldyń ishinde 333 myń adamdy quraǵandyǵyn kórsetip otyr. Buǵan qosa, statıstıka júrgizgenderdiń túsindirýinshe, bul elge kelýshiler sanynyń ósýi esebinen emes, Ulybrıtanııadan emıgratsııa deńgeıiniń tómendeýinen oryn alýda. Eýropalyq odaqqa múshe elderden ımmıgratsııa dál osy kezeńde 184 myń adamǵa deıin ulǵaıǵan. Bul ótken mánnen 10 myń adamǵa artyq. Buǵan qosa, Rýmynııa men Vengrııadan kelýshilerdiń legi de kúrt arta túsken.
Ulttyq statıstıka bıýrosynyń boljamynsha, mıgratsııanyń dál osy deńgeıi saqtalyp qalatyn bolsa, onda taıaý 8 jyldyń ishinde Anglııa halqy 7,5 paıyzǵa artatyn bolady. 2024 jylǵa qaraı London turǵyndarynyń sany 13,7 paıyzǵa, Anglııanyń shyǵys bóliginiń halqy 8,9, al ońtústik-shyǵysynda 8,1 paıyzǵa kóbeıetindigi aıtylǵan. EO elderinen mıgratsııa jáne mıgranttar týraly másele - bul Birikken Koroldiktiń Eýropalyq odaqtan shyǵý týraly referendým qarsańyndaǵy pikirsaıystyń dál oshaǵynda turǵan negizgi máselelerdiń biri.
EO-dan shyǵýdy jaqtaıtyndar London ekonomıka qajettiligine baılanysty sheteldikterdiń kelýi legin derbes júrgizý arqyly durys baqylaý júrgize alady dep sanaıdy. Al olardyń qarsylastary mıgranttar eldiń iskerlik belsendiligin ilgeriletetin kúsh ekendigin aıtýda.
Birikken koroldiktiń táýelsizdigi partııasynyń kóshbasshysy Naıdjel Faradjdyń aıtýynsha, bul málimetter ımmıgratsııanyń «baqylaýdan» shyǵyp ketkendigin kórsetedi. Degenmen, Ulybrıtanııa ІІM-niń mıgratsııalyq máseleler jónindegi mınıstri Djeıms Brokenshır el Premer-Mınıstri Devıd Kemeron Eýroodaq quramyndaǵy Brıtanııa úshin kelisimge qol jetkizgen jańa sharttary mıgranttar úshin «janama esikti» jabady dep sanaıdy. Sarapshylardyń atap ótýinshe, Eýropalyq odaqtaǵy Ulybrıtanııanyń músheligine baılanysty daýys berýge deıin jarııa etilgen Anglııadaǵy mıgranttardyń sanyna qatysty jańa málimetter pikirsaıys barysynda eýroskeptıkter úshin kezekti kózir bolmaq. Olar osy arqyly referendýmnyń qorytyndysyna áser etýdi maqsat etýde.
Aıta keterligi, Eýropalyq odaq quramynda Ulybrıtanııanyń qalý-qalmaýyna qatysty odan arǵy taǵdyry 23 maýsymda sheshiledi.
