ÁLEM APTA ІShІNDE: Túrkııada lańkester bıliktiń degbirin alyp tur
ASTANA. QazAqparat - Ókinishke oraı ótip bara jatqan apta ishinde oryn alǵan ózekti oqıǵalar adam ólimine qatysty jaıttarmen órbidi. Atap aıtqanda, dúısenbi kúni Túrkııada oryn alǵan birqatar lańkestik árekettiń saldarynan keminde quqyq qorǵaý organdarynyń 6 qyzmetkeri qaza tapty. Sonymen qatar Qytaıda oryn alǵan qýatty jaralystan da qaza tapqandardyń qarasy mol bolyp tur. Este bolsa, Tıantszın portty qalasyndaǵy qaýipti zattar qoımasynda qatarynan 2 jarylys oryn alyp, 85 adam qaza tapsa, jaraqat alǵandardyń sany 700-den asyp jyǵylǵan edi.
Túrkııadaǵy lańkestik áreketter
Dúısenbi kúni Túrkııada birneshe lańkestik áreket oryn alyp, sonyń saldarynan keminde quqyq qorǵaý organdarynyń 6 qyzmetkeri, birneshe sodyr jáne ondaǵan adam jaraqat alǵan.
Naqty aıtqanda, dúısenbi kúni tańerteń qarýly 2 sodyr Ystambuldaǵy AQSh-tyń bas konsýldyǵyn kúzetetin polıtseılerge qarata oq atyp, sońynan boı tasalaǵan edi. Sál keıinirek shabýyl jasaǵandardyń áıel ekendigi belgili bolyp, onyń biri tutqynǵa túsken.
Sonymen birge kúsh-qýat qurylymdary sol túni Ystambuldyń polıtsııa bólimshesinde bomba jarǵan taǵy 2 sodyrdyń kózin qurtqan bolatyn. Jarylystyń qýatty bolýy saldarynan ǵımarat jartylaı búlingen. Lańkestik áreketten keıingi qarýly qaqtyǵys barysynda, 3 adam, 2 lańkes pen polıtsııa qyzmetkeri qaza tapty.
Munan bólek, Irak pen Sırııamen shektesetin ońtústik Shırnak ólkesindegi Amerıkanyń dıplomatııalyq ókildigine jáne polıtsııa bólimshesine jasalǵan shabýyl saldarynan quqyq qorǵaý organynyń taǵy 4 qyzmetkeri mert boldy.
Quqyq qorǵaý organdary qyzmetkerleri qashyqtan basqarylatyn mınaǵa jarylǵan. Jarylǵysh zat polıtsııanyń saýytty avtomobıli ótip bara jatqan sátte iske qosylǵan.
Túrkııa buqaralyq aqparat quraldarynyń habarlaýynsha, sál burynyraq dál osy ólkede lańkester pýlemetten jáne granatometten Túrkııa armııasynyń áskerı-kólik tikushaǵyna shabýyl jasap, sonyń saldarynan 1 jaýynger qaza tapsa, jeteýi aýyr jaraqat alǵan.
Qazirgi ýaqytta jergilikti buqaralyq aqparat quraldary atalǵan lańkestik áreketterdiń barlyǵyn el bıligi Túrkııada qyzmetine shekteý qoıylǵan «Kúrdistannyń jumysshy partııasymen» baılanysy bar radıkaldy toptardyń moınyna júktep otyrǵandyǵyn jazýda.
Qytaıdyń Tıantszın qalasyndaǵy qýatty jarylys
Sársenbi kúni túnde Qytaıdyń soltústigindegi Tnıatszın portty qalasyndaǵy qaýipti zattar qoımasynda qýatty eki jarylys boldy. Qaıǵyly oqıǵa jergilikti ýaqyt boıynsha 23:30-da portqa taqaý jerdegi Bınhaı aýdandyq qalasyndaǵy logıstıkalyq qoımada oryn aldy.
Jarylystyń qýatty bolǵany sonshalyq, onyń dúmpýyn tipti jergilikti seısmologııalyq qyzmettiń ózi tirkegen. Onyń qýaty trotıl ekvıvalentinde 3 jáne 21 tonnany quraǵan. Kýágerlerdiń aıtýyna qaraǵanda, jarylys tolqyny birneshe shaqyrym qashyqtyqtan sezilgen.
Birinshi jarylystan keıin alapat órt shyǵyp, jarty mınýttan keıin ekinshi jarylys oryn alǵan. Osydan keıin birneshe jarylys bolǵan.
Qazirgi ýaqytta oqıǵa saldarynan ondaǵan úıdiń jartylaı qırap, 2,5 myńnan astam Volkswagen kóliginiń órtke oranǵandyǵy belgili. Sonymen qatar Tıantszın portynda BMW, Toyota jáne Mazda markaly kólikterdiń bolǵandyǵy týraly da aqparat taralýda. Jalpy janyp ketken kólikterdiń sany shamamen 5 myń birlikti quraıdy.
Qaza tapqandardyń sany 85 adamǵa jetti, al jaraqat alǵanardyń sany 700-den asyp jyǵylady. Aýrýhanaǵa kelip jatqan jaraqat alýshylardyń qatary arta túsýde. Osyǵan oraı turǵyndardyń qan tapsyrýyna arnalǵan utqyr beket jumys isteýde.
Qalanyń kóptegen turǵyndary jer silkinisi dep oılap qalǵan jarylystan keıin qalalyq metro jabylyp, jer ústi kólikteriniń baǵdaryna túzetý engizildi. Sonymen qatar Tıantsızndegi Ulttyq sýperkompıýter ortalyǵyndaǵy «Tianhe-1A» sýperkompıýteriniń jumysy toqtatyldy.
Qazirgi ýaqytqa deıin tótenshe oqıǵanyń shyǵý sebebi beımálim bolyp tur. Degenmen, buqaralyq aqparat quraldarynyń jazýynsha, kiná atalǵan logıstıkalyq kompanııanyń ózinen kórinedi. Qazirgi ýaqytta onyń basshylyǵy tutqynǵa alyndy.
