ÁLEM APTA ІShІNDE: Týnısti ereýil «elesi» kezip júr
ASTANA. 9 aqpan. QazAqparat - Sońǵy jyldary kóshe boıyndaǵy tártipsizdikter Maǵrıb elderi úshin ózindik erekshelik belgisine aınalǵandaı. Taıaýda ǵana Mysyrda oryn alǵan jappaı tolqýlardyń «ystyq-sýyǵy» basylmaı jatyp-aq dál osyndaı bezgek Týnıs elin de qaltyratty.
Týnıs memleketiniń astanasy men birqatar basqa da qalalarynda oryn alǵan sherýlerge 6 aqpan kúni týnıstik «Al-Vatad» oppozıtsııalyq partııasynyń bas hatshysy, «Halyqtyq maıdan» koalıtsııasynyń kóshbasshysy Shýkrı Belaıdtiń óltirilýi basty sebep boldy. Ol óz úıiniń tusynda belgisiz eki adamnyń jaýdyrǵan oǵynan mert bolǵan edi.
Oppozıtsııalyq kúshterdiń jaqtastary bul qylmysqa bıliktiń, naqty aıtqanda ıslamshyl «Órleý partııasynyń» qatysy bar degen aıyptaýlaryn alǵa tartýda. Degenmen, atalǵan partııa bul qylmysqa qatysy joq ekendigin aıtyp, aqtalyp, ony jasaǵandardy aıyptaýda. Ázirshe, bılik te oppozıtsıonerdi óltirýge kimniń tapsyrys bergendigin aıta alar emes. Tek ony «saıası qastandyqpen óltirý jáne lańkestik akt» dep baǵalaýda.
Dál osy kúni oppozıtsııa úkimettiń otstavkaǵa ketýin, kinálilerdi jazalaýdy jáne elde saıası jańǵyrtý júrgizýdi talap etken bolatyn. Elde bastalǵan jappaı qarsylyq sharalary men jańa dúrbeleń jasaýǵa qoqan-loqy kórsetýge oraı Týnıs Premer-Mınıstri Hamadı Djebalı eski úkimettiń taratylyp, «partııasyz tehnokrattardan» quralǵan ýaqytsha mınıstrler kabınetiniń qurylǵanyn jarııa etti. Jańa úkimet músheleriniń quramy men olardy taǵaıyndaý datasy el parlamenti Ulttyq quryltaıshy keńesiniń daýys berýmen taıaýda qarastyrylatyn bolady.
Óz kezeginde Týnıs prezıdenti Monsef Marzýkı Frantsııaǵa saparyn úzip, elge oraldy. «Men jaqsy biletin saıası kóshbasshyny pasyq pıǵylmen óltirý qater bolyp sanalady»,- dedi ol.
Ereýilderdiń basym bóligi Sh.Belaıda óltirilgen kúnniń erteńinde oryn aldy. Onyń múrdesin juma kúni jer qoınaýyna bergennen keıin de eldegi ahýal jaqsara qoıǵan joq. Oryn alǵan barlyq sherýlerde de ereýilshiler quqyq qorǵaý organdarynyń qyzmetkerlerimen qaqtyǵysyp, bılik partııasynyń keńselerin qıratýmen boldy. Elde oryn alǵan bassyzdyqtar, ásirese, Týnıs astanasy men memlekettiń ortalyǵy bolyp sanalatyn Gafs qalasynda baıqaldy. Kásipodaq uıymdary da búkil elde ereýil jasaýǵa nıettendi. Degenmen memleket aýmaǵyndaǵy shıpajaılardaǵy ahýal turaqty.
Aıta keterligi, manıfestanttar polıtseıler men «Órleý partııasynyń» keńsesine tas pen janǵysh suıyqtyq quıylǵan bótelkeler laqtyrdy. Al buǵan jaýap retinde polıtseıler kózden jas aǵyzatyn gaz qoldanyp, ereýilshilerdi taratý úshin áýege oqý atýmen shektelýde. Abyroı bolǵanda, eki taraptan da qaza tapqandar joq.
Halyqaralyq qoǵamdastyq Týnıste oryn alǵan ahýalǵa baılanysty alańdaýshylyq tanytýda. Eýropalyq odaq Týnıstiń saıası kúshterin ekstremıstik toptardyń is-áreketterine toqsaýyl qoıýǵa ári elde beıbitshilikti qalpyna keltirýge shaqyrdy.
Eýropalyq odaqtyń shet el isteri jónindegi joǵarǵy ókili Ketrın Eshton Sh.Belaıdanyń óltirilýin aıyptady. «Ekstremıstik toptar jasap otyrǵan saıası zorlyq-zombylyq aktiler sanynyń arta túsýi ótpeli kezeń úderisi úshin qater bolyp tabylady», - dedi ol.
