ÁLEM APTA ІShІNDE: Taıaý Shyǵystaǵy ahýal - ýaqytsha tynyshtyq ári saıası turaqtylyq úmiti
ASTANA. 2 qarasha. QazAqparat - Ótip bara jatqan apta ishindegi halyqaralyq kúntártiptegi mańyzdy oqıǵalar jekelegen rettelmegen janjaldar boıynsha turaqtylyq úrdisiniń bir arnaǵa túsýimen órbidi desek te bolady.
Sırııa turaqtaný jolynda
Osy aptada Sırııada Hımııalyq qarýdy tyıý jónindegi uıymnyń mamandarynyń qatysýymen hımııalyq ýly zattardy joıýdyń ekinshi, eń basty kezeńi bastalady. Bul kezeńde el aýmaǵynan barlyq ýlaǵysh qordy shyǵarý mindeti alda tur.
Aıta keterligi, Hımııalyq qarýdy tyıý jónindegi uıym júrgizilip jatqan jumystardyń aıaq alysyna kóńilderi toq jáne de ýly zattardy tasymaldaý sharalary men baǵyttaý máselelerine qatysty túıtkildi jaıttardyń tez arada sheshiletindigine senim artýda. 15 qarashada bul másele boıynsha túbegeıli kelisimge qol jetkiziledi degen jospar da bar.
Degenmen de, osy apta ishinde birqatar arab buqaralyq aqparat quraldary Sırııadaǵy hımııalyq qarýdyń qoldanylýyna qatysty jańa oqıǵalar jaıynda habar taratty. Taralǵan aqparattarǵa qaraǵanda, hımııalyq qarý Túrkııamen shekaraǵa taqaý mańdaǵy, Sırııanyń soltústik-shyǵysyndaǵy Hasake qalasy tóńireginde oryn alǵan. Boljamdarǵa qaraǵanda, hımııalyq qarýdy kúrd jasaqtarymen qaqtyǵys barysynda radıkal ıslamshyl toptardyń sodyrlary qoldanǵan. Birneshe adam orta dárejede ýlanǵan. Bul aqparat qazirgi ýaqytta tekserilýde.
Álemdik qoǵamdastyq hımııalyq qorǵa qatysty operatsııamen qatar Sırııa bıligi ókilderi men oppozıtsııalyq kúshterdiń qatysýymen «Jeneva-2» halyqaralyq konferentsııasyn ótkizý úshin jaǵdaı jasaýǵa barynsha kúsh-jiger jumsaýda. Ázirshe, daıyndyq sharalarynyń ózi qıyndyqpen ótýde, alaıda álem elderiniń basym bóligi osy nusqaǵa peıil tanytyp otyrǵandyǵy ras.
Al konferentsııa shaqyrý ıdeıasyna Sırııanyń oppozıtsııalyq jáne kóterilisshi kúshteri qarsylyq tanytyp otyrǵandyǵy belgili. Olardyń basym bóligi sırııalyq rejim ózderi úshin kelissózder júrgizý taraby retinde qaralamaıtyndyǵyn alǵa tartyp, Shveıtsarııadaǵy kezdesýge óz ókilderin jibermeıtindigin aıtyp, málimdeme jasap ta qoıǵan edi.
Iran ashyq kelissózderge daıyn
Osy apta ishinde ırannyń ıadrolyq baǵdarlamasyna qatysty birqatar ózgeristerdiń oryn alýy baıqaldy. Dúısenbi kúni Venada Irannyń Syrtqy ister mınıstriniń orynbasary Abbas Arakchı men MAGATE dırektorynyń orynbasary ıÝkııa Amano kezdesý ótkizdi. Júzdesý Irannyń ýran baıytýdy 20 paıyzǵa deıin toqtatty jáne Irannyń ıadrolyq qujattamasy boıynsha halyqaralyq bitimgershilerdiń «altylyǵymen» (BUU QK turaqty músheleri jáne Gremanııa) kelissózderdi jańǵyrtýdy qarastyrýda degen aqparattardyń taralýy aıasynda órbidi.
Iran MAGATE-men qarym-qatynasty turaqtandyrýǵa baǵyttalǵan jańa usynys engizdi. Aıta keterligi, atalǵan usynystyń mazmuny sapaly tolyqtyrylýymen qatar birqatar ustanymdarda Irannyń MAGATE-nyń yrqyna kóngendigi baıqalady. Alaıda, kelissózder barysynda qandaı ýaǵadalasqtyqqa qol jetkizilgendigi belgisiz. Degenmen, sońǵy kezdesýdiń qorytyndysy onyń odan ári jalǵasýyna jol ashady. Kelissózderdiń kelesi raýndy 11 qarasha kúni Tehranda ótip, onda ırandyq tarap óziniń ıadrolyq baǵdarlamasynyń beıbit sıpatta ekendigin dáleldeýge tyrysyp baqpaq.
Osy kezdesý ótkennen keıin ile-shala, aptanyń ortasynda Venada, BUU shtab-páterinde eýropalyq «úshtik» (Frantsııa, Gremanııa jáne Ulybrıtanııa) pen halyqaralyq bitimgershilerdiń «altylyǵynyń» sarapshy konsýltatsııasy ótti. Tolyqtaı alǵanda, birqatar eýropalyq sarapshylardyń baǵalaýlary boıynsha Tehran óziniń ıadrolyq baǵarlamasynyń ashyqtyǵyn qamtamasyz etýge umtylatyndyǵyn baıqatty. Biraq bitimgershiler sheshimi naqty nátıjeler negizinde ǵana qabyldanady. Kelissózder qorytyndysy boıynsha Iranǵa qatysty birqatar sanktsııalar jeńildetilýi de múmkin.
