ÁLEM APTA ІShІNDE: Sırııa halyqaralyq baıqaýshylardy qabyldady, al Batys elge jańa sanktsııa engizýge múddelik tanytýda
ASTANA. 231 sáýir. QazAqparat - Ótip bara jatqan apta ishinde álemdik qoǵamdastyqtyń nazary taǵy da Taıaý Shyǵystaǵy oqıǵalarǵa aýdy. Bul joly oppozıtsııalyq toptar men úkimettik kúshterdiń arasyndaǵy teketires 1 jyldan astam ýaqyt boıy jalǵasyp kele jatqan Sırııadaǵy ahýaldy retteýge umtylystyń belgili deńgeıde oń ilgerileýi oryn aldy.
Turaqtandyrý isindegi aıtarlyqtaı ilgerileýshilikti Sırııadaǵy daǵdarysty retteý jónindegi BUU men Arab memleketteri lıgasynyń arnaıy elshisi Kofı Annannyń jospary pash etip otyr. Qazirgi ýaqytta bir-birine jaý bolyp otyrǵan taraptar ýaqytsha bitimge kelý shartyn saqtaýǵa tyrysyp baǵýda. Bul tolyqtaı alǵanda ólim-jitim qataryn aıtarlyqtaı tómendetýge múmkindik berýde.
Arnaıy elshiniń elge 250 adamnan jasaqtalǵan áskerı emes baıqaýshylar tobyn jiberýge qatysty sońǵy usynysy BUU Qaýipsizdiń keńesiniń músheleri tarapynan qoldaýǵa ıe bolýda ári Sırııa bıligi de ony qoshtap otyr. Dúısenbi kúni-aq elge quramynda 7 adam bar baıqaýshylar tobynyń alǵashqy legi kelip jetti. Olar úsh aı boıy K.Annannyń eldegi daǵdarysty retteýge arnalǵan josparynyń oryndalý barysyn jiti qadaǵalamaq
Beısenbi kúni Sırııa úkimeti men BUU baıqaýshylarynyń alǵashqy toby memleket aýmaǵyndaǵy mıssııa jumysynyń tártibi týraly aldyn ala kelisimge qoldaryn qoıyp, qujattady. Mórlengen qujatqa sáıkes baıqaýshylar Sırııanyń barlyq kúsh-qurylymdary men oppozıtsııasynyń qarýly toptarynyń arasyndaǵy ymyralasý sharalarynyń qatań saqtalýyna bas-kóz bolyp, baqylaý júrgizýdi júzege asyrmaq. Sonymen qatar kelisimde sırııalyq úkimet mindetteriniń jaýapkershilik deńgeıi de aıqyndalǵan.
Biraq ta osy apta ishinde BUU Bas hatshysy Pan Gı Mýn BUU Qaýipsizdik keńesin Sırııadaǵy halyqaralyq baıqaýshylardyń sanyn 300-ge deıin ulǵaıtýǵa shaqyrdy. Onyń paıymdaýynsha, Sırııadaǵy janjaldasýshy taraptar ýaqytsha bitimge kelý shartynda kózdelgen ýaǵdalastyqty jetkilikti deńgeıde oryndap otyrǵan joq. Al baıqaýshylardyń tolyqqandy jumysyna mol ýaqyt qajet. Bas hatshy kótergen bul másele BUU qaýipsizdik keńesiniń jabyq tobynyń qaraýynda.
Degenmen, tolyqtaı alǵanda batys áleminiń janjaldardy retteý perspektıvasyna qatysty pikiri buǵan deıingideı shúbáǵa toly. Bul baǵalaýlarǵa sáıkes Sırııa Prezıdenti Bashar Asad jaǵdaıdy turaqtandyrý, qarýly qaqtyǵystardy tyıý boıynsha tıimdi sharalardy qabyldap otyrǵan joq. Sonymen qatar oppozıtsııa ókilderimen baılanysqa shyǵýǵa daıyn emes.
Seısenbi kúni Parıjde ótken 57 eldiń syrtqy ister mınıstrleriniń bas qosýynda AQSh-tyń Memlekettik departamenti elge qatysty budan da qatań sanktsııa qabyldaý máselesin taǵy bir márte kóterdi. Kelesi kúni Eýropalyq dıplomatııa basshysynyń baspasóz qyzmeti taratqan aqparatta sırııalyq basshylyqqa qatysty jańa, rettik sany boıynsha 13-shi sanktsııany engizý qajettigi atalyp ótilgen. Degenmen, Batys áli de bolsa halyqaralyq baıqaýshylardy jiberý qajettigine jáne de K.Annannyń jospary oń nátıje beretindigine zor úmit artyp otyr.
Sırııaǵa qatysty halyqaralyq kelissózderge qatysýshylardyń keıbiri, ıaǵnı Máskeý men Beıjiń Damaskige yqpal etý sharalaryna qatysty birkelki ustanymdy basshylyqqa alyp otyr. Olardyń paıymynsha, kezekti sanktsııa engizýge qaraǵanda teketiresýshi taraptardyń arasyndaǵy dıalog pen baıqaýshylardyń jumysy barynsha zor abyroı ákeledi.
«Barlyǵyna K.Annannyń jospary tóńiregine toptasý qajet. Sırııadaǵy baıqaýshylardyń tolyqformatty mıssııasyn maquldaıtyn ekinshi qarardy barynsha tezirek qabyldaý úshin qoldan kelgenniń bárin jasaý kerek», - dep atap ótti Máskeýde ótken baspasóz máslıhaty barysynda RF Syrtqy ister mınıstri Sergeı Lavrov. Sonymen qatar ol baıqaýshylar tobynyń tolyqqandy jumysy úshin Sırııadaǵy oppozıtsııalyq toptar tarapynan senim qajet ekendigin basa aıtty.
Qytaı Halyqtyq Respýblıkasy da Sırııadaǵy zorlyq-zombylyqtyń tyıylýyna baǵyttalǵan kez kelgen qadamdy qoldaıdy. Kúni keshe QHR Syrtqy ister mınıstrliginiń resmı ókili Lıý Veımın barlyq janjaldasýshy taraptardy BUU men Arab lıgasy memleketteriniń arnaıy elshisi K.Annannyń araaǵaıyndyq kúsh-jigerin qoldaýǵa shaqyrdy.
Álemdik qoǵamdastyq tarapynan eldegi turaqsyzdyqty retteýge umtylystyń zor bolýyna qaramastan Sırııadaǵy zorlyq-zombylyq tyıylar emes. Buqaralyq aqparat quraldarynda jarylystardyń, lańkestik áreketterdiń uıymdastyrylyp, qarýly shabýyldardyń oryn alǵandyǵy jaıyndaǵy aqparattar tolastamaı otyr. Sonyń saldarynan negizinen beıbit turǵyndar qaza tabýda. Oqıǵalar oppozıtsııalyq kúshterdi biriktiretin Erkin sırııalyq armııanyń belsendiligi barynsha baıqalyp otyrǵan eldiń ońtústiginde oryn alýda. Bıliktiń de, oppozııasynyń da ókilderi oryn alǵan oqıǵalarǵa qatysty birin-biri aıyptaýda. Degenmen, buǵan deıingideı otqa maı quıyp, oqıǵany ýshyqtyrý oryn alyp otyrǵan joq.
