ÁLEM APTA ІShІNDE: Sary teńizde sý astyna ketken 272 adamnyń taǵdyry belgisiz

Kemeniń apatqa dýshar bolǵandyǵy jaıynda alǵashqy aqparat sársenbi kún tańerteń sý kóligi jaǵalaýǵa 20 shaqyrym qalǵan kezde berilgen bolatyn. Dál osy sátte onyń bortynda 476 jolaýshy bolsa, onyń ishinde oqytýshylarmen birge saıahatqa shyqqan Ansan qalasy «Danvon» orta mektebiniń 335 oqýshysy bar bolatyn.

Keme 15 sáýir kúni Seýlge taqaý ornalasqan Inchhon aılaǵynan jolǵa shyqqan edi. Al Chedjý kýrortty aımaǵyna deıingi jol uzaqtyǵy shamamen 14 saǵatty quraıtyn.

Degenmen, kelesi kúni tańerteń mejeli jerge eki saǵattaı ýaqyt qalǵan kezde saǵat 8:30 ben 9:00 aralyǵynda kapıtan minberinen barlyq jolaýshylarǵa qutqarý kúrteshelerin kıiný ári óz oryndarynda qalý týraly habarlama tarady. Dál osy sátte keme bir jaqqa qaraı qısaıyp, birtindep sýǵa bata bastaǵan edi. Birshama ýaqyt ótkennen keıin 180 gradýsqa jantaıyp, tolyǵymen sýǵa batty.

Qaıǵyly oqıǵa saldarynan 30 adam qaza tapty, 174 adam apattyń alǵashqy saǵattarynda qutqarylsa, 272 adamnyń, onyń ishinde basym bóligi balalardyń taǵdyry áli kúnge deıin belgisiz bolyp tur.

Sarapshylardyń atap ótýinshe, bul jaıttyń oryn alýyna birqatar tehnologııalyq hám uıymdastyrýshylyq aǵattyqtarǵa qabattasa oqıǵa oryn alǵan sáttegi adamı faktorlar da áser etken.

Keme 1994 jyly Japonııada qurastyrylyp, 2012 jyly ońtústikkoreılik kompanııaǵa satylǵan. 18 jyldyq tarıhy bar kemede buǵan deıin aıtarlyqtaı tótenshe oqıǵa oryn ala qoımaǵan. Degenmen, taıaýda kemege jańǵyrtý jumystary júrgizilip, sonyń nátıjesinde onyń jolaýshylar syıymdylyǵy 15 paıyzǵa ulǵaıtylǵan. Sarapshylradyń paıymynsha, dál osy jaıt kemeniń sýda júzý sıpattamasynyń nasharlaýyna túrtki bolýy múmkin.

Bastapqyda kemeniń sý astyndaǵy jartastarǵa soqtyǵysýy ne bolmasa qaırańdap alýy múmkin degen pikirler aıtylǵan edi. Alaıda, tergeý amaldary barysynda júzip kele jatqan kemeniń baǵdaryn kúrt ózgertip, sonyń saldarynan sol jaqqa qaraı jantaıǵandyǵy belgili bolyp otyr. Sonyń saldarynan keme bortyndaǵy jalpy salmaǵy 1157 tonna bolatyn 180 avtomobıl men konteınerler oryndarynan qozǵalyp, salmaq bir jaq bortqa qaraı aýyp ketken.

Aldyn ala tergeý nátıjelerine sáıkes, parom apatqa ushyraǵan sátte ony kapıtannyń úshinshi kómekshisi basqaryp kele jatqandyǵy da belgili. Buǵan qosa, 68 jastaǵy kapıtan Lı Chon Soktyń jolaýshylarmen birge bas saýǵalap, kemeni tastap qutqarýshy qaıyqqa otyryp alǵandyǵy anyqtaldy. El bıligi ony jáne keme ekıpajynyń taǵy eki múshesine bes aıyp taǵyp, tutqynǵa aldy.

Apat kezinde ústińgi palýbada bolǵan jolaýshylar ǵana aman qaldy. Óıtkeni olar apat kezinde sýǵa sekirip etý múmkinshiligine ıe bolǵan edi. Al tómengi palýba bolǵan jolaýshylar keme ishinde qamalyp qalyp, 37 metrlik tereńdikke batyp ketti. Sál keıinirek, keme kapıtany jolaýshylardy der ýaqytynda qaýipsiz jerge kóshirýge qutqarý qaıyqtarynyń bolmaýy kedergi keltirgenin aıtyp aqtaldy.

Kemedegi jolaýshylardy qutqarý operatsııasyna el prezıdenti Pak Kyn Heniń ózi basshylyq jasaýda. Ol árbir adamnyń taǵdyry úshin kúresetindigin aıtyp málimdeme jasaýda.

Qazirgi ýaqytta aýqymdy qutqarý operatsııasyna Ońtústik Koreıanyń Jaǵalaý kúzeti jáne flotynyń 170 kemesi, 550 súńgýiri men 29 ushaǵy jumyldyrylýda. Apat bolǵan aımaqta AQSh ÁTK desanttyq kemesi de júr. Japonııanyń da qutqarýshylary da kómek qolyn sozý úshin apat alǵan orynǵa bet alyp keledi. Atap ornyna tórt júzbeli kran ornatylǵan. Olar kemeni sý betine alyp shyǵý tıis.

Osy ýaqytqa deıin keme ishindegi «aýa qaltarystarynda» aman qalǵan adamdardyń ómirin saqtap qalý úshin aýa jiberilýde. Apat oryn alǵan jerdegi aýa temperatýrasy Tselsıı baǵany boıynsha shamamen 12 gradýsty quraıdy. Mundaı jaǵdaıda adamdardyń 72 saǵatqa deıin tiri qalýyna múmkinshilik mol.

Kemedegi jolaýshylardyń týystarynyń talaptary boıynsha bılik kúndiz-túni jumys isteýde.

Juma kúni súńgýirler keme qabyrǵasyn tesip, bortqa enýge múmkinshilik alǵan bolatyn. Alaıda kemeniń bul bóligi sýǵa lyq tolyq turǵandyǵy belgili boldy. Qutqarý operatsııalary júrgizilgen barlyq kúnde de aýa raıy qolaısyz bolýda. Sý asty aǵysynyń jyldamdyǵy saǵatyna 8 shaqyrymǵa jetip, sý ishinde tóńirekti barlaý qıyndyq týyndatýda.

Qutqarylǵan jolaýshylar Mokpo men ıAındo qalalarynyń aýrýhanalaryna jóneltilýde. Al olardyń týystary jergilikti sport zalyn panalaýda. Dál osy jerde amal qalǵan adamdardyń tizimi ilinip, júrgizilip jatqan operatsııa jaıynda aqparattar taratylýda, adamdarmen psıhologtar jumys isteýde.

Tiri qalǵandar men taǵdyry belgisiz adamdardyń týǵan-týysqandary ornalasqan bul jerdegi ahýal óte kúrdeli. Juma kúni «Sevol» jolaýshylar kemesinde tiri qalǵandardyń arasynda bolǵan mektep dırektory orynbasarlarynyń biriniń sport zal mańyndaǵy qaraǵaıǵa asylyp qalǵandyǵy anyqtaldy.

Ońtústikkoreılik bılik qaza tapqandar men iz-tússiz joǵalyp ketkenderge qatysty aqparattaryn birneshe márte ózgertken bolatyn. Al bul eldiń kóptegen adamdarynyń senimine selkeý túsirip otyr. Túngi ýaqyttaǵy qutqarý jumystarynyń toqtatylýy da halyqtyń narazylyǵyn ýshyqtyra túsýde.

Alǵashqy kúnderi sýǵa batqan keme ishindegi keıbir oqýshylardyń sms habarlama jibergendigi týrasynda aqparat taraǵan edi. Keıinnen ol naqtylanǵan joq. Degenmen kóptegen oqýshylardyń apat kezinde týystaryna sms habarlama jiberip, qoshtasqandyǵy belgili.