ÁLEM APTA ІShІNDE: Rıo-de-Janeıro men Venetsııa karnavaldary ótti
ASTANA. QazAqparat - Ótip bara jatqan aptada álem halqynyń esinde qalatyndaı jarqyn jańalyqtar az bolmaǵan syńaıly. Este bolsa, búkil Eýropa men Ońtústik Amerıkada kóptegen karnavaldar men merekeler ótken bolatyn. solardyń ishindegi eń irisi ári tanymaly ótken demalys kúni Brazılııanyń Rıo-de-Janeıro qalasynda ótken dástúrli karnaval bolǵany sózsiz.
Brazılııa karnavaly
Ótken juma, 5 aqpan kúni Brazılııada dástúrli karnaval bastaldy. Osynaý álemdik aýqymdaǵy sharaǵa qatysýshylar bir jyl boıy ózderiniń biregeı kıim úlgilerin daıyndap, bı nómirlerin tyńǵylyqty ázirlegen edi.
Brazılııadaǵy karnavaldyń túp tórkini 15 ǵasyrdaǵy tanymal bolǵan portýgaldyqtardyń «entrýdo» merekesin shyqqan desedi. Al 20 ǵasyrdyń basynda Rıo-de-Janeıro karnavalynyń tanymaldyǵy artyp, ol basqa da elderdegi mereke elementterin ózine sińirgen bolatyn. Dál sol kezeńderde samba bıiniń alǵashqy mektebi paıda bolyp, keıinnen shyǵarmashylyq ujymdar ony búkil elge taratqan-dy.
Búginde bul festıval Brazılııadaǵy eń iri ári sáni men saltanaty kelisken jappaı halyqtyq merekege aınalyp otyr. 4 kún boıy baı men kedeı, aq pen qara, kúshti men álisiz birtutas álemge aınalady. Dástúrge sáıkes, mereke bastalar aldynda Rıo meri karnaval qojaıyny korol Momoǵa qala kiltin tabystaıdy. Al korol retinde tolyq ári eńsegeı boıly brazılııalyq tańdap alynady.
Rıo-de-Janeıro karnavaly - bul eń aldymen «Markız de Sapýkaı» samadromynda ótetin aýqymdy sherý dese de bolady. Saltanatty sharaǵa qatysýshylar eki jaǵynda bıik minberler qoıylǵan 700 metrlik alańmen júrip ótedi.
Barlyq merekeniń shyrqaý shegi - jeńimpaz komandasyn tańdaý. Aǵymdaǵy jyly úzdik komanda mártebeli ataǵyn «Mangeıra» samba mektebi buıyrdy. Endi olar 1 jyl boıy sol ataqqa ıelik etedi.
Aıta keterligi, bul joly karnaval eldegi ekonomıkalyq jáne saıası súreńsizdik jaǵdaıynda, buǵan qosa Zıka jáne Denge bezgekteri órship turǵan sátte ótti. Osyǵan oraı jergilikti bılik sharaǵa kelýshilerdi azaıtýǵa tyrysyp baqqanymen Rıo karnavalyn kórýge qumartqan týrıster legi mol boldy.
Venetsııa karnavaly
Seısenbi kúni álemdegi eń kóne mádenı sharalardyń biri Venetsııa karnavaly aıaqtaldy. Sý ústindegi Italııanyń dańqty qalasyndaǵy osynaý sharanyń tamashalaýǵa ǵalamshardyń túpkir-túpkirinen júzdegen myń adam keldi.
Venetsııa karnavaly týraly alǵashqy derekter 1094 jyly tirkelgen. Degenmen, 14 ǵasyrda ol jappaı ótkizilmegeni belgili. 1162 jyly partıarh Akvıleıany jeńgennen keıin Venetsııanyń basty alańy San-Markoda halyqtyq serýen ótken. Boljamǵa sáıkes dál osy ýaqyttan bastap karnaval jyl saıyn ótkizile bastaǵan.
Venetsııada dástúrli karnaval senbi 23 qańtar kúni keshke sýdaǵy teatrlandyrylǵan kórinisten bastaldy. Jergilikti ýaqyt boıynsha týra saǵat 18:00-de Kannaredjo arnasy sý sahnasyna aınaldy, onda venetsııalyq óner men qolóneri kórsetildi. "CREATUM nemese Óner jáne Dástúrler" qoıylymy karnavaldyń jalpy taqyrybynyń kórinisine aınaldy. Karnavaldyń kórkemdik jetekshisi Marko Makkapanıdiń oıynsha, Creacum - bul Venetsııanyń ejelgi kózderine, onyń qolónerine qaıta oralý ıdeıasy. Karnavaldyń bastalyp ketkenine qaramastan, onyń resmı ashylýy júz metrlik San-Marko munarasynan «perishteniń» dástúrli túsýimen jeksenbi, 31 qańtarda ótti. «Perishte» obrazyn dástúr boıynsha ótken jyly Marııa baıqaýynda tańdalǵan jas qyz somdady.
Bul jolǵa karnavaldyń basty ereksheligi polıtsııa qyzmetkerleriniń sharaǵa qatysýshylarǵa dástúrli maskalardy kımeýge shaqyrýy boldy desek artyq emes. Bılik taraby mundaı qadamǵa Parıjdegi lańkestik áreketterden keıin barǵan bolatyn.
