ÁLEM APTA ІShІNDE: «Pýls» geı-klýbyndaǵy qandy qyrǵyn
ASTANA. QazAqparat - Ótip bara jatqan apta ishinde álem jurtshylyǵy Orlandodaǵy «Pýls» geı-klýbynda tún ishinde oryn alǵan qandy qyrǵyndy álem qoǵamdastyǵy keńinen talqyǵa saldy. Bul - Qurama shtattar tarıhyndaǵy eń qandy qyrǵyn desek te bolady. Munan bólek, álem jurtshylyǵynyń nazary Frantsııaǵa aýyp tur. Bul elde Fýtboldan Eýropa chempıonaty bastalǵan edi.
«Pýls» geı-klýbtaǵy atys
Jeksenbi kúni túnde Florıda shtatyna qarasty «Pýls» geı-klýbyna kelgen Aýǵanstan týmasy 29 jastaǵy Omar Matın jartylaı avtomatty vıntovkadan jáne tapanshadan klýbtaǵy adamdarǵa qarata beı-bereke oq jaýdyrdy. Myltyq daýysyn estigen adamdar tyǵylýǵa tyrysty, keıbir klýb dárethanasyna jasyryndy. Endi biri uıaly telefonynan anasyna hat jazyp, polıtsııa shaqyrýyn ótingen. Adamdardyń basym bóligi syrtqa qashyp shyǵyp aman qalsa, endi bireýleri ótirik ólgen adamnyń keıpin tanytyp jan saqtaǵan. Degenmen, oqqa ushqandardyń qatary mol. Atysyn aıaqtaǵan Omar Matın ǵımaratqa jasyrynyp, qutqarý qyzmetine telefon soqqan. Operatormen sóılesýi barysynda óziniń «DAISh» lańkestik tobyn qoldaıtyndyǵyn aıtqan.
Buǵan qosa, operatormen sóılesýi barysynda Boston marafonyndaǵy terakt jaıynda eske salyp ótken. Oqıǵa ornyna jetken polıtsııa ǵımaratty qorshaýǵa alyp, Matınmen kelissózder júrgizýge tyrysqan edi. Alaıda, ol klýbqa kelýshilerge oq jaýdyrýyn qaıta jalǵastyrdy. Tań ata arnaıy jasaq jaýyngerleri ǵımaratqa basyp kirip, qylmysker jasyrynǵan bólmeniń qabyrǵasyn bombamen jarý arqyly endi. Birshama ýaqytqa sozylǵan atystan keıin qylmyskerdiń kózi joıylyp, tiri qalǵan tutqyndar bosatyldy.
Orlandodaǵy tragedııa Amerıka tarıhyndaǵy adam ólimi óte kóp bolǵan qandy qyrǵyn bolyp otyr. Qylmyskerdiń qolynan 49 adam ólip, taǵy 53-i túrli deńgeıde dene jaraqatyn alǵan.
Federaldy tergeý qyzmeti bul oqıǵany ishki terrorızm dep baǵalap, tergeý amaldaryna kirisip ketti. Sál keıinirek Omar Matınniń álemdegi eń iri jeke kúzet fırmalarynyń biri sanalatyn G4S mekemesinde jumys istegendigi belgili boldy. Tergeý barysynda anyqtalǵandaı, Matınniń qarý-jaraq ustaýǵa 2 lıtsenzııasy bolǵan. Qylmys oryn alǵan ýaqyttan bir apta buryn ol Florıda dúkenderiniń birinen jartylaı avtomatty vıntovka men tapansha satyp alǵan.
Munan bólek, Matınniń 2013 jyldyń ózinde quqyq qorǵaý organdarynyń nazaryna ilingeni belgili bolyp otyr. Sol kezde ol áriptesine óziniń lańkestermen baılanysy bar ekendigin aıtyp qalǵan. Alaıda federaldar bul jaıttyń anyq-qanyǵyn teksergenmen kúdikti esh dúnıe taba almaǵan bolatyn.
AQSh Prezıdenti Barak Obama beısenbi kúni Florıda shtatyna kelip, qaza bolǵandardyń otbasylaryna kóńil aıtyp, jaraqat alǵandardyń tez arada saýyǵyp ketýine tilektestigin bildirdi. Álemniń kóptegen elderiniń kóshbasshylarymen qatar Qazaqstan Prezıdenti Nursultan Nazarbaev ta Orlandodaǵy lańkestik aktisine baılanysty Amerıka Qurama Shtattarynyń Prezıdenti Barak Obamaǵa kóńil aıtý jedelhatyn joldady.
Memleket basshysy Orlando qalasyndaǵy terrorıstik akt saldarynan kóptegen adamnyń qaza bolǵany jáne zardap shekkeni týraly habardy zor kúızelispen qabyldady. Jedelhatta: «Qazaqstan terrorızmniń kez kelgen túrin qatań aıyptaıdy, qandaı maqsatta bolsa da jazyqsyz qan tógýdi aqtaýǵa bolmaıdy dep sanaıdy», - dep aıtylǵan. Nursultan Nazarbaev barsha qazaqstandyqtardyń jáne jeke óziniń atynan B.Obamaǵa, Amerıka halqyna, qaza bolǵandardyń otbasylaryna jáne jaqyndaryna kóńil aıtyp, zardap shekkenderdiń tezirek saýyǵyp ketýine tilektestik bildirdi.
Eýro-2016 bastaldy
Maýsymnyń 11-ine qaraǵan túni Frantsııanyń Sen-Denı qalasyndaǵy «Stad de Frans» stadıonynda Frantsııa jáne Rýmynııa quramalary arasyndaǵy oıynmen «Eýro-2016» týrnıri bastaldy.
Týrnırdiń resmı bekitilgen «This One's For You» atty ánin álemge esimi tanymal Devıd Get pen shved ánshisi Zara Larsson oryndady. Munan bólek, arnaıy uıymdastyrylǵan shoýǵa shamamen 600 adam qatysty. Aıta keterligi, bul Eýropa chempıonaty fýtbolshylar arasyndaǵy tartysty oıynnan bólek jankúıerlerdiń arasyndaǵy qaqtyǵyspen de talaıdyń esinde qalatyn túri bar. Máselen, Reseı men Anglııa quramalary arasyndaǵy Marselde ótken match 1:1 esebimen aıaqtalǵan bolatyn. Dál osy kezdesý aldynda eki eldiń jankúılerleri arasyndaǵy qaqtyǵys boldy. Tóbeleste aǵylshyndyq jankúıer japa shekti.
Jansaqtaý bólimine túsken jigittiń «mıy jumysyn toqtatty» degen dıagnoz qoıyldy. Qazirgi ýaqytta Frantsııa soty úsh reseılik jankúıerdi tártipsizdik jasaǵandary úshin birden eki jylǵa deıin bas bostandyqtarynan aıyrǵandyǵy da belgili. Sottalǵandardyń biri - máskeýlik «Lokomotıvtiń» jankúıerlermen jumys boıynsha bóliminiń basshysy Alekseı Erýnov.
Fýtboldan Eýropa chempıonaty jumysshylardyń quqyǵyn qorǵaýdan bas tartýǵa syltaý bola almasy anyq. Seısenbi kúni Úkimettiń parlamenti aınala ótip qabyldaǵan eńbek reformasyna oraı qarsylyq sharalary ótti. Qabyldanǵan zańnamada jumystan shyǵarý protsedýrasyn jeńildetý, sonymen qatar jumys aptasyn arttyrý syndy jaıttar qarastyrylǵan. Parıjde ótken narazylyq sharasyna mıllıonǵa jýyq adam qatysty. Ony Frantsııadaǵy eń iri ulttyq kásipodaqtardyń biri Jalpyǵa ortaq eńbek konfederatsııasy bastap otyr.
