ÁLEM APTA ІShІNDE: Pákistanda sodyrlar mektep oqýshylaryn qyryp saldy
ASTANA. QazAqparat - Ótip bara jatqan apta ishinde álemdik qoǵamdastyq nazary adamzat balasyna jasalǵan eki qastandyq oqıǵaǵa aýdy. Sodyrlar salǵan lańnan júzdegen adam jaryq dúnıemen qosh aıttysty.
Pákistanda sodyrlar oqýshylarǵa shabýyldady
Seısenbi kúni tańerteń «Tehrık-t-talıban Pákistan» qozǵalysynyń qarýly sodyrlary jantúrshigerlik qylmys jasady. Pákistan qarýly kúshteriniń áskerı formasyn kıgen sodyrlar Peshavar qalasyndaǵy el armııasy qarjylandyratyn arnaıy mektep ǵımaratyna mototsıklmen taqaý kelip, kúzetshilerge oq jaýdyrǵan. Osydan keıin olar shamamen 500 oqýshy men olardyń oqytýshylaryn mektep ǵımaratyna kirgizip, qoldary dirildemesten oq astyna ala bastaǵan. Oqıǵa ornyna jetken quqyq qorǵaý organdarynyń qyzmetkerleri men áskerılerge de barynsha qarsylyq tanytyp, keskilesken urys júrgizgen.
Resmı derekterge qaraǵanda, lańkestik akti saldarynan 145 adam qaza tapqan, olardyń basym bóligi - balalar. Urys barysynda sodyrlardyń barlyǵynyń da kózi joıyldy. Osy qaıǵyly oqıǵaǵa baılanysty Pákistanda úsh kún aza tutý kúni jarııalandy.
QR Prezıdenti Nursultan Nazarbaev Pákistan Islam Respýblıkasynyń Prezıdenti Mamnýn Hýseınge Peshavar qalasynda bolǵan terrorlyq aktige baılanysty kóńil aıtý jedelhatyn joldady. Jedelhatta basym kópshiligi mektep jasyndaǵy balalar bolǵan, kóptegen jazyqsyz jandardyń qaza tapqany týraly sýyt habardy Memleket basshysy tereń kúızelispen qabyldaǵany aıtylǵan. «Qazaqstan barsha álemdegi qaýipsizdik pen beıbitshilikke úlken qaýip tóndirip otyrǵan halyqaralyq ekstremızm men terrorızmniń is-áreketterin úzildi-kesildi aıyptaıdy. Peshavardaǵy jantúrshigerlik oqıǵa radıkaldy toptarǵa órkenıetti qoǵamda oryn joq ekenin taǵy da rastady», - delingen jedelhatta.
Sıdneıde 17 adam kepilge alyndy
15 jeltoqsan kúni Avstralııanyń Sıdneı qalasynda jergilikti ýaqyt boıynsha tańerteńgi saǵat shamamen 10-darda tapanshamen qarýlanǵan adam qalanyń qaq ortasyndaǵy Martın Pleıs alańynda ornalasqan «Lındt» dámhanasynda otyrǵan 17 adamdy kepilge aldy.
Sál keıinirek buqaralyq aqparat quraldary onyń 49 jastaǵy shyqqan tegi ırandyq Men Haron Monıs ekendigin jarııalady. Ol 1996 jyly bosqyn retinde Avstralııaǵa qonys aýdarǵan. Ótken jyly ǵana adam ólimine qatysty iste kúdiktilerdiń biri retinde tergeýge alynyp, odan kepil berip bosap shyqqan.
Polıtsııa men qylmysker arasyndaǵy kelissózder 16 saǵatqa jalǵasqan. Keıbir derekterge qaraǵanda, ol Avstralııa premer-mınıstri Tonı Ebbotpen kezdesýdi talap etip, qala boıynsha tórt jarylǵysh zat qoıylǵandyǵyn habarlaǵan.
Kelissózderdiń esh nátıje bermesin kózderi anyq jetken avstralııalyq arnaıy qyzmet jasaǵy kafege shabýyl jasaýǵa májbúr boldy. Nátıjesinde 15 adam bostandyqqa shyǵaryldy. Kepilge alynǵandardyń ishinen 2 adam qaza taýyp, taǵy 5-eýi túrli dárejede dene jaraqatyn alǵan. Qylmysker de aýyr jaraqat alyp, jergilikti aýrýhanaǵa jetkizilgennen keıin jan tapsyrdy.
