ÁLEM APTA ІShІNDE: Mysyrdaǵy tártipsizdikter eldegi saıası ahýaldy ýshyqtyryp tur

Grekııada parlamenttik saılaý

Bul kúnderi Eýropalyq odaqtaǵy basty jańalyq 25 qańtarda Grekııada ótken saılaýda «SIRIZA» radıkaldy solshyl kúshter koalıtsııasynyń kezekten tys saılaýda jeńiske jetýi bolyp tur. Bul saıası kúshterdiń tabysqa jetýi aldyn ala boljanǵan da edi.

Sonymen daýystardy sanaý nátıjesinde «SIRIZA» el Parlamentindegi 300 orynnyń 149-yna jaıǵasatyn boldy. Al «solshyl radıkaldardyń» jeńisi álemdik qarjy naryǵynda alańdaýshylyq týyndatýda. Óıtkeni, qazirdiń ózinde dollarǵa qarsy eýro kýrsy birshama «álsireı» tústi.

26 qańtar kúni koalıtsııa kóshbasshysy Aleksıs Tsıpras eldiń jańa premer-mınıstri retinde ant qabyldady. Aıta keterligi, saıasatker saılaýda jeńiske jeter bolsa, birqatar baǵdarlamany júzege asyratyndyǵyn aıtyp, halyqqa ýáde bergen bolatyn.

Aleksıs Tsıpras Halyqaralyq valıýta qorynyń, Eýropalyq ortalyq bank pen Eýropalyq komıssııanyń Afınanyń bıýdjet profıtsıtin jyldyq JІÓ-sinen 4 paıyzdan artyq emes kólemde qoldaýǵa baǵyttalǵan qatań ekonomıkalyq saıasatyn teriske shyǵaryp otyrǵandyǵy belgili. Buǵan qosa, mınıstrler kabınetiniń jańa basshysy eldiń búginde JІÓ-niń 170 paıyzynan asyp ketken syrtqy qaryzyn birshama qaıta qurylymdaýdy talap etpek nıeti de bar. Sonymen qatar Grekııa Úkimetine kredıtorlarmen odan arǵy qarjylyq kómektiń sharttaryna qatysty da qıyn kelissózder júrgizýi mindeti júk bolyp tur.

Eger Grekııa kómektiń jańa toptamasyn alý boıynsha kelisim jasaspasa ne bolmasa burynǵy kómekterdiń aıasyn keńeıtýge qol jetkizbese onda ózderiniń qaryzdaryn defolt dep jarııalaýy qajet. Degenmen, grek úkimetiniń negizgi kredıtorlarmen aradaǵy qarym-qatynastarynyń nasharlaı túsýi Grekııa bankterine qoldaýdyń shektelýine ákelýi múmkin. Al mundaı jaǵdaıda el Úkimeti óz aqshalaryn shyǵarýǵa bet buryp, eýroaımaqtan shyǵýy yqtımal. Qalaı desek te, Tsıprastyń qanshalyqty tabandylyq tanytatyndyǵy taıaý ýaqytta belgili bolady. Sebebi jańa premerdiń Eýroodaq elderi kóshbasshylarymen alǵashqy kezdesýi 12 aqpan kúni EO-nyń beıresmı sammıti aıasynda oryn almaq.

Mysyrdaǵy tártipsizdikter eldegi saıası ahýaldy ýshyqtyryp tur

Eýroaımaqta Grekııadaǵy parlamenttik saılaý naýqany qyzǵan sátte Mysyrda ıslamshyldar men polıtsııa arasynda qandy qaqtyǵys bastaldy. Qantógistiń negizgi bóligi el astanasy túbindegi El-Matarı qalashyǵynda oryn alyp, qaqtyǵystar kezinde keminde 12 adam qaza tapty. Mysyr Іshki ister mınıstrliginiń aqparatyna qaraǵanda, sherýshiler arasyna dendeı kirgen lańkestik top músheleri qarý qoldanǵan. Olar elektr energııasy stansasyna jáne polıtsııa ýchaskesine shabýyl jasaǵan. Lańkestik áreketti elde tyıym salynǵan «Musylman baýyrlar» uıymy jasaǵany belgili. Sondaı-aq sodyrlardyń eldiń túrli qalalarynda ondaǵan jarylǵysh zat qoıǵandary da anyqtalyp otyr.

Jergilikti bıliktiń paıymynsha, lańkesterdiń bul áreketteri is basyndaǵy bılikti bılikten taıdyrý úshin eldegi ahýaldy turaqsyzdandyrý. Jeksenbi kúni polıtsııa qyzmetkerleri tártipsizdiktiń bastalýyna sebepker bolǵan 500-den astam adamdy ustap, olardan ártúrli qarýlardy tárkilegen. Budan bólek 10-nan astam jarylǵysh zatty zalalsyzdandyrǵan.

Sondaı-aq keıbir aqparattarǵa qaraǵanda, Aleksandrııa qalasynda ótken ıslamshyldardyń sherýi barysynda eki adam avtomattan oqý jaýdyryp, jergilikti 1 turǵyn jaraqat alǵan. Al Kaırdiń Alf-Maskan aýdanyndaǵy tanymal sport klýby janynda qoldan jasalǵan jarylǵysh iske qosylyp, 2 polıtsııa ofıtseri zardap shekken. Bul lańkestik árekettiń jaýapkershiligin jergilikti «Agnad Masr» toby óz moıyndaryna alyp otyr. Keıbir derekterge qaraǵanda, atalǵan lańkestik uıymnyń qurylýyna «Musylman baýyrlar» uıymynyń kóshbasshylary muryndyq bolǵan.

Eýroodaqtyń shetel isteri jáne qaýipsizdik saıasaty jónindegi joǵary ókili Federıka Mogerını Mysyrda oryn alǵan qantógisti aıyptaýda. «Búgin Mysyr tóńkerisiniń 4 jyldyǵyna arnalǵan narazylyq sherýi barysynda oryn alǵan zorlyq-zombylyqtan adamdar mert boldy. Men barlyq tarapty da ustamdylyqqa shaqyramyn. Beıbit sherý bostandyǵy qorǵalýy tıis, al suhbattastyq - bul alǵa bastar jalǵyz jol», - dedi ol.

Aıta keterligi, 2011 jyldyń 25 qańtarynda Mysyrda jappaı sherý bastalyp, nátıjesinde Hosnı Múbárak taqtan taıǵan bolatyn. Osydan keıin bılik basyna ıslamshyldardyń zor qoldaýyna ıe Muhammed Mýrsı kelgen edi. Alaıda, 2013 jyldyń shildesinde ol da áskerı tóńkeris saldarynan bılikten ketti. Al 2014 jyldyń maýsymynda Mysyr prezıdenti bolyp Abdel-Fattah al-Sısı saılandy.