ÁLEM APTA ІShІNDE: Mysyr men Kenııadaǵy lańkestik júzdegen adamnyń ómirin jalmady
ASTANA. QazAqparat - Ótip bara jatqan apta ishinde dúbirge toly dúnıede taǵy da jappaı adam ólimine qatysty birneshe oqıǵa oryn aldy. Tipti, 1 kún ishinde álemniń túrli qıyrynda 3 iri qaıǵyly oqıǵa saldarynan keminde 220 adam mert boldy. Atap aıtqanda, Ohot teńizinde reseılik «Dalnıı Vostok» traýleri sýǵa batyp ketse, «Ansar beıt al-Makdıs» tobynyń sodyrlary Mysyr armııasynyń sholǵynshylaryna, al «Ash-Shabab» lańkesteri Kenııanyń Garıss qalasyndaǵy ýnıversıtetke shabýyl jasady.
«Dalnıı Vostok» traýleri apatqa ushyrady
2 sáýir kúni Ohot teńizinde «Dalnıı Vostok» traýleri apatqa ushyrady. Keme bortynda 132 adam bolǵan. Olardyń qatarynda Reseı, Mıanma, Vanýatý, Ýkraına jáne Latvııa azamattary bar. Búgingi kúni 56 adamnyń qaza tapqany belgili, teńizshilerdiń basym bóligi sýyqtan úsip ólgen. Ekıpajdyń 63 múshesi ǵana tiri qaldy, olardyń 7-eýiniń jaǵdaıy óte aýyr. Taǵy 13 adamnyń taǵdyry beımálim, qazirgi ýaqytta olardy izdeý jumystary júrgizilýde.
Іzdeý jumysyn 2 myńnan astam qutqarýshy jáne 100-den astam túrli tehnıka jumyldyrylǵan. Áýe jáne teńiz kemeleri teńizdiń 9 myń sharshy metrge jýyq aýmaǵyn sholyp shyqty. Tiri qalǵan teńizshilerdiń aıtýynsha, keme sýǵa birden batyp ketken. Sol sebepti kemeniń apatqa ushyraǵandyǵy jaıynda dabyl berilip úlgermegen. Tergeý amaldary apattyń 2 negizgi sebebine den qoıýda. Onyń birine sáıkes, keme muzben soqtyǵysýy múmkin. Budan bólek, aýlanǵan balyqty kemege kóterip salý barysyndaǵy qaýipsizdik erejesiniń saqtalmaýy da traýlerdiń aýdarylýyna túrtki bolýy yqtımal.
Qutqarýshylar 3 sáýir kúni tiri qalǵan teńizshilerdi eń jaqyn Sahalın portyna baǵyt ustanǵan «Andromeda» kemesine otyrǵyzǵan. Jaǵdaılary óte aýyr degenderdi tikushaqpen Magadan qalasyndaǵy aýrýhanaǵa jóneltken. Kúshti jel izdestirý jumystaryna eleýli kedergi keltirýde.
Sońǵy aqparattarǵa qaraǵanda, joǵalǵan 13 teńizshiniń múrdesi keme ishinde bolýy múmkin. Eger bul jaıt naqtylanatyn bolsa, onda kemeni sýdan kóterip shyǵarýǵa týra keledi. Traýler apatqa ushyraǵan aımaqtaǵy Ohot teńiziniń tereńdigi shamamen 200 metrden asyp jyǵylady. Al súńgýirler 90 metrlik tereńdikke ǵana boılaı alady. Buǵan qosa, olardyń 60 metrlik tereńdikte ǵana jumys isteýge múmkindikteri bar. Qazirgi ýaqytqa deıin shtattyq kestege saı 94 adamnyń ornyna nelikten 132 teńizshiniń bolǵandyǵy beımálim. Reseı teńizshileri kásipodaǵy Qıyr Shyǵys óńirlik uıymynyń tóraǵasy Nıkolaı Sýhanovtyń pikirinshe, sýǵa batqan «Dalnıı Vostok» traýlerindegi sheteldik azamattar zańsyz jumys isteýi múmkin.
«Dalnıı Vostok» traýleri 1989 jyly jasalǵan. Uzyndyǵy 104,5 metr, eni 16 metr, sý syıymdylyǵy 5715 tonna, eń joǵary jyldamdyǵy 16,1 ýzl.
Mysyr men Kenııadaǵy lańkestik
Beısenbi kúni ıslamshyl sodyrlar Sınaı túbeginiń soltústigindegi baqylaý-ótkizý beketinde kezekshiligin atqaryp júrgen Mysyr armııasynyń sholǵynshylaryna shabýyl jasady. Sodyrlar avtomattan jáne granatometten sholǵynshylarǵa qarata oq jaýdyrdy. Mysyr áskerı qyzmetshileri de qarap qalǵan joq, olar da qarý qoldandy. Lańkestik akt saldarynan 15 mysyrlyq áskerı qyzmetshi, 2 beıbit adam qaza taýyp, 19 adam jaraqat aldy. Mysyr sholǵynshylary da keminde 15 sodyrdyń kózin joıdy. Resmı Kaır bul lańkestik áreketti «Ansar Beıt al-Makdıs» tobynyń sodyrlary jasaǵandyǵyn aıtýda.
Dál osy «Ash-Shabab» tobynyń sodyrlary Kenııanyń Garıss qalasyndaǵy «Garissa University College» ýnıversıteti ǵımaratyna basyp kirip, stýdentterge qarata oq jaýdyryp, sońynan olardy kepilge aldy. Shabýyl kezinde ýnıversıtet ǵımaratynda keminde 700 stýdent bolǵan, olardyń shamamen 80-i qashyp qutyla aldy.
Aman qalǵan stýdentterdiń biriniń aıtýynsha, lańkester Qurandy jatqa aıtýǵa talap etken. Al bilmegenderdi birden atyp tastaǵan. Stýdentter kepilge alynǵannan keıin birneshe saǵattan soń arnaıy jasaq qyzmetteri ǵımaratqa basyp kirdi. Keıbir BAQ-tardyń aqparatyna qaraǵanda, 4 lańkes qaýipsizdik qyzmeti ókilderi ǵımaratqa basyp kirgende ózderin jaryp jibergen. Lańkestik saldarynan 147 stýdent, 2 áskerı qyzmetshi qaza tapty. 70-ten astam adam túrli dene jaraqatymen aýrýhanaǵa tústi.
Dárigerlerdiń aıtýynsha, qaza tapqandar qatary arta túsýi múmkin. Óıtkeni, aýrýhanaǵa túsken adamdardyń keıbiriniń hali óte aýyr. Kenııa quqyq qorǵaý organdary málimetterine sáıkes, shabýyldy uıymdastyrǵan - Muhammed Muhammýd. Bılik atalǵan adam jaıynda aqparat bergenderge 215 myń dollar kóleminde syıaqy taǵaıyndap otyr.
