ÁLEM APTA ІShІNDE: Lańkestik áreket saldarynan Bolgarııa men Koloradoda ondaǵan adam qaza tapty

Óıtkeni biri Eýropada, al ekinshisi AQSh-ta oryn alǵan eki lańkestik árekettiń saldarynan ondaǵan adam qaza taýyp, odan da kóp adam jaraqattandy.

 Bolgarııada lańkes ózin-ózi jaryp jiberdi

Sársenbi kúni Bolgarııanyń Býrgas qalasynyń áýejaıynda jergilikti shıpajaıǵa demalý úshinTel-Avıvten ushyp kelgen ızraıldik týrıster mingen avtobýs jaryldy. Oqıǵa saldarynan 5 ızraıldik, bolǵar júrgizýshi jáne lańkestiń ózi mert boldy. 30-dan astam azamat túrli dene jaraqatyn aldy.

Bastapqy kezde-aq tergeý barysynda AQSh azamatynyń jalǵan qujatymen Bolgarııaǵa kelgen óz basyn ólimge tikken lańkestiń jarylys jasaǵandyǵy belgili boldy. Eń basty nusqa boıynsha, lańkes avtobýs salonyna kirip kele jatyp jarylǵysh qurylǵyny iske qosqan.

Kelesi kúni jergilikti buqaralyq aqparat quraldary lańkestik áreketti shyqqan tegi aljırlik jáne fındik bolyp keletin Shvetsııa azamaty 36 jastaǵy Mehdı Gezalı jasady degen aqparat taratty. Jarııa etilgen aqparattarǵa qaraǵanda, buǵan deıin ol Gýantanomo túrmesinde qamaýda bolǵan, degenmen Stokgolmniń qoldaýhatymen bostandyqqa shyqqan. Sál keıinirek bul aqparatty Bolgarııa men Shvetsııa bıligi joqqa shyǵardy. Buǵan qosa resmı Sofııa lańkestiń Bolgarııa azamaty emestigin málimdedi. Lańkestiń fotosy búkil álemdik buqaralyq aqparat quraldaryna tarady.

Bul qaıǵyly oqıǵa sol sátte-aq Tel-Avıv pen Tehran arasyndaǵy onsyz da shıelenisti qarym-qatynasty qıyndatyp jiberdi. Jarylys jaýapkershiligin Iran moınyna artqan Izraıl Premer-Mınıstri Benıamın Netanıahý ırandyq lańkestik áreketke Izraıl tarabynan qarymta jaýap qatań bolatyndyǵyn eskertti. Onyń atap ótýinshe, jarylysqa sonymen qatar «Hezbolla» sodyrlar qozǵalysynyń da qatystylyǵy bar. Óz kezeginde Iran bıligi ızraıldikterdiń  kinálaýyn «jónsiz» dep atasa, «Hezbolla» kóshbasshylary lıvan shııteriniń qozǵalysy esh ýaqytta da týrıstermen soǵyspaıtyndyǵyn málimdedi.

Al amerıkandyq sheneýnikterdiń nusqasyna sáıkes, Iran lańkestik áreketke daıyndyqty uıymdastyrý jáne basshylyq jasaýdy «Hezbolla» qozǵalysyna tapsyrǵan. Sonymen qatar bul lańkestik áreket ırandyq fızık, atom qarýyn jasaýshynyń ólimine jaýap bolýy da múmkin. Óıtkeni Iran ǵalymynyń ólimine Izraıldiń arnaı qyzmetiniń qatysy bar dep sanaıdy.

Sarapshylar bul lańkestik áreket taıaýshyǵysty retteý isindegi álemdik qoǵamdastyq qol jetkizgen nátıjelerdiń toqyraýǵa ushyrap, qarym-qatynastyń shıelenisýine túrtki bolatynyǵyn joqqa shyǵarmaıdy.

Aıta keterligi, juma kúni keshkisin ıran parlamenti EO sanktsııasyna jaýap retinde Ormýz buǵazy arqyly munaı jetkizý joldaryn jaýyp tastaý ıdeıasyna qoldaý bildirdi. Iran Islam Respýblıkasyna qarsy qosymsha qatań sanktsııalar qabyldansa osyndaı sharalardy qolǵa alynatyndyǵyn eskertken eldiń vıtse-prezıdenti Mohammed Reza Rahım: «Mundaı jaǵdaıda Ormýz buǵazy boıymen energetıkalyq shıkizattyń bir de bir tamshysy ótkizilmeıtin bolady», - degen edi. Endi atalǵan qujattyń qabyldanýy úshin Prezıdent pen Irannyń  joǵary dinı basshylyǵy tarapynan kelisim qajet.

  Kolorodadaǵy qantógis 12 adamnyń ómirin qıdy

Juma kúni keshkisin Denvar qalasyndaǵy «Century 16 Movie» kınoteatrynda «Qara rytsar: Ańyzdyń oralýy» atty qaharman Betmen týraly fılmniń premerasy bastalǵannan keıin kınozal sahnasyna kóterilgen qaskúnem kózden jas aǵyzatyn gaz shashyp, kórermenderge qarsy vıntovkadan oq jaýdyrdy.

Oqıǵa saldarynan 12 adam qaza taýyp, shamamen 60 adam, onyń ishinde úsh aılyq sábı jaraqattandy. Shuǵyl arada qolǵa alynǵan sharalardyń nátıjesinde 24 jastaǵy amerıkandyq Djeıms Holms ustaldy. Onyń ústinde oq ótkizbeıtin jılet pen janynda vıntovka men 2 tapansha bolǵan.

Belgili bolyp otyrǵany qylmysker kınoteatrǵa óziniń jeke kóligimen kelip, qosymsha esik arqyly ishke ótken. Fılmniń kezekti kórsetiliminen keıin sahnaǵa kóterilgen ol kórermenderge qarata beı-bereket oq jaýdyrǵan. Osydan keıin syrtqa sytylyp shyǵyp, kósheden oqıǵanyń odan ári qalaı órbigendigin baqylaǵan.

Polıtsııa onyń qylmysty jalǵyz jasaǵandyǵyn málimdedi. Bul rette FBR tutqyndalǵan azamat eshqandaı lańkestik uıymnyń múshesi emestigin aıtýda.

Qylmystyń qandaı maqsatta jasalǵandyǵy belgisiz. Degenmen onyń aqyl-esiniń durys emestigi aıtylýda. Sonymen qatar qylmyskerdiń bul is-áreketine aldyn ala tyńǵylyqty daıyndalǵandyǵy belgili. Ol kınoteatr men óziniń úıine qoldan jasalǵan jarylǵysh zat ornatyp qoıǵan. Polıtsııa málimetteri boıynsha onyń úıinde jarylǵysh, sondaı-aq jeńil tutanatyn zattar bolýy múmkin.