ÁLEM APTA ІShІNDE: Lańkester Belgııanyń atom elektr stansalaryn jarmaq bolǵan

Áýejaı men metrodaǵy jarylys

Seısenbi kúni jergilikti ýaqyt boıynsha shamamen tańǵy saǵat 8-derde Brıýsseldiń halyqaralyq áýejaıynyń ushý alańynda 2 jarylys oryn aldy. Jarylys saldarynan termınal ǵımaraty jartylaı qırady. Oqıǵa oryn alǵannan keıin jolaýshylar áýejaıdan birden qaýipsiz jerge kóshirildi. Barlyq áýe reıisteri keıinge qaldyryp, qonýy tıis ushaqtar taıaý qalalardaǵy áýejaılarǵa baǵyttaldy.

Bir saǵattan keıin kezekti jarylys eýropalyq ınstıtýttar keńsesi ornalasqan kóshege taqaý tustaǵy «Maelbek» stansasynda oryn aldy.

Belgııa Premer-Mınıstri Sharl Mıshel osy oqıǵadan keıin birden Ulttyq qaýipsizdik keńesin shaqyrdy. Elde lańkestik qaýiptiń eń joǵary deńgeıi engizildi.

«Bul qasiretti, qaraly kún. Men barlyǵyn da tynyshtyq pen nıettestikke shaqyramyn»,- dedi ol.

Brıýsselde qoǵamdyq kólikterdiń jumysy toqtatylyp, memlekettik mekemeler, balalar men oqý oryndary, sonymen qatar adamdar kóp jınalatyn saýda ortalyqtary, teatrlar men kınoteatrlar jabyldy. Qoǵamdyq tártipti qorǵaý úshin qalaǵa myńǵa jýyq qosymsha armııalyq bólimshe tartyldy. Brıýsseldiń birqatar kommýnasynda polıtsııa tekserý júrgizdi.

Sál keıinirek Belgııanyń Federaldy prokýratýrasy barlyq jarylysty lańkestik áreket dep tanyp, áýejaı men metrodaǵy jarylǵysh zatty lańkes-jankeshti iske qosqandyǵy týraly aqparatty qýattady.

Resmı derekterge sáıkes, lańkestik saldarynan 300-den astam adam zardap shegip, qaza tapqandardyń sany 31 adamǵa jetti. Degenmen bul sońǵy málimet emes. Óıtkeni, birneshe ondaǵan adam áli de aýyr halde jatyr.

Teraktini tekserý jalǵasýda

Sol kúni keshke qaraı buqaralyq aqparat quraldarynda Brıýssel áýejaıynyń beınebaqylaýyna túsip qalǵan lańkesterdiń sýreti jarııalandy. Fotoda úsh erkek beınelengen, onyń ekeýi lańkes bolsa, úshinshisi - olardyń ymyralastary.

Sál keıinirek polıtsııa áýejaıda ózin-ózi jaryp jibergen jankeshtiniń aty-jónin jarııa etti. Olar Brıýsselde er jetken Nadjım Lahraýı men Ibragım ál-Bakraýı bolyp shyqty. Bir saǵattan keıin Ibragımniń aǵasy Halıd metroda ózin-ózi jaryp jiberdi.

«Jarylys poıyz «Maelbek» stansasynda turǵan kezde ekinshi vagonnyń ishinde oryn alǵan. jankeshtiniń kim ekendigi saýsaq izderimen anyqtaldy. Ol Ibragımniń aǵasy 1989 jyly 12 qańtarda Brıýsselde dúnıege kelgen Halıd ál-Bakraýı», - dedi baspasóz máslıhaty barysynda federaldy prokýror.

Lańkestik áreketterdi tergeý jáne áýejaıdaǵy úshinshi jarylystyń aldyn alýǵa lańkesterdi áýejaıǵa alyp kelgen taksı júrgizýshisi kóp kómek kórsetti. Kúdiktini sýretinen tanyǵan ol jolaýshylarynyń úsh emes odan da kóp sómke ákelgendigin aıtyp berdi. Dál osy málimetter Brıýssel áýejaıyndaǵy úshinshi bombany tabýǵa kómektesti. Munan bólek, taksı júrgizýshisiniń derekteri quqyq qorǵaý organdaryna Brıýsseldegi kommýnaldardyń birindegi turǵyn úıde ornalasqan jarylǵysh zattar jasaıtyn jasyryn zerthanany tabýǵa septigin tıgizdi.

Jarylystan keıin Belgııa Іshki ister mınıstri ıAn ıAmbon men Ádilet mınıstri Koen Gens otstavkaǵa ótinish bergenimen ony el Úkimet basshysy qabyldaǵan joq.

Brıýsseldegi jarylysqa baılanysty álemniń kóptegen elderiniń kóshbasshylary begııalyqtarǵa kóńil aıtty. Olardyń qatarynda Qazaqstan Prezıdenti Nursultan Nazarbaev ta boldy. Elbasy Brıýssel qalasynda bolǵan terrorlyq aktige baılanysty Belgııa Koroli Fılıppke kóńil aıtý jedelhatyn joldady. Nursultan Nazarbaev qaza bolǵandardyń týǵan-týystary men jaqyndaryna kóńil aıtyp, zardap shekkenderdiń tezirek saýyǵyp ketýine tilektestigin bildirdi. Memleket basshysy elimiz halyqaralyq qaýipsizdikke qater tóndiretin terrorızm men ekstremızmniń kez kelgen túrin aıyptaıtynyn jáne osyndaı qıyn sátte Belgııa halqyn jan-jaqty qoldaıtynyn aıtty.

Lańkester ıadrolyq shabýyl uıymdastyrmaq bolǵan

Jergilikti BAQ-tyń jazýynsha, lańkesterdiń negizgi nysany belgııalyq atom elekttr stansasy bolýy tıis edi. Óıtkeni, aǵaıyndy ál-Bakraýıler uzaq ýaqyttan beri belgııalyq atom energetıkasy salasyndaǵy zertteýler jáne damý baǵdarlamasy jetekshileriniń biriniń izin ańdyǵan. Aıta keterligi, Belgııada «Dýl» jáne «Tıanj» dep atalatyn eki atom elektr stansasy jumys istep tur. Al olardyń apatqa ushyraýy birneshe myńdaǵan adamnyń ómirine qaýip tóndirer edi. Alaıda lańkesterdiń josparyn qylmystyq top músheleriniń biri Salah Abdeslamnyń tutqynǵa túsýi buzǵan. Ol ótken jyldyń 13 qarashasynda Parıjde oryn alǵan lańkestik áreketterge basty kúdikti bolyp otyr.

Lańkestik áreketterdi tergeý áli de jalǵasýda. Qazirgi ýaqytta 7 adamnyń tutqynǵa alynǵany jaıynda aqparat bar. Taıaý aralyqta álem jurtshylyǵy Eýropa tórindegi lańkestikterdiń kim uıymdastyrǵanyn biletin bolady.