ÁLEM APTA ІShІNDE: Qajylar arasynda qaýipsizdik sharalaryn saqtaý jumystary kúsheıtildi
ASTANA. QazAqparat - Osy aptada oryn alǵan eki qaıǵyly oqıǵa álemdik qoǵamdastyqtyń nazaryn aýdardy. Mekkeniń irgesindegi Mına jazyǵyndaǵy qasiretti jaǵdaı saldarynan qaza tapqan qajylyq paryzyn óteýshilerdiń sany 717 adam boldy. Sonymen qatar Iemendegi meshitti sodyrlardyń jarýy saldarynan 29 adamnyń ómiri qıyldy.
Mına jazyǵyndaǵy qaıǵyly oqıǵa
Beısenbi tańerteń musylmandar úshin kıeli qala Mekkeden birneshe shaqyrym jerde ornalasqan Mına jazyǵynda musylmandardyń Qurban aıt merekesiniń qurmetine oqylǵan namazǵa kóptegen elderden kelgen júzdegen myń qajy jınaldy.
Jergilikti ýaqyt boıynsha 9:00 kezinde qajylyq paryzyn óteýshiler Mınada shatyrlarǵa ornalasqannan keıin shaıtanǵa tas laqtyrý úshin baǵyt alǵan. Alaıda, paryzyn óteýshilerdiń bir bóligi bekitilgen kúntártipti elemeı, namazǵa erte shyqqan kórinedi.
Osynyń saldarynan jaıaý júrginshilerdiń Jamarat kópiri mańyndaǵy 204-shi jáne 223-shi kóshelerdiń qıylysynda jınalǵan jurttyń qarasy kóbeıip, sonyń kesirinen týyndaǵan keptelisten kóptegen adamdar jerge qulaǵan eken. Nátıjesinde, kem degen 717 adam qaza taýyp, jaraqat alǵandar sany 863-ke jetti.
Saýd Arabııasynyń koroli Salman ben Ábdel Ázız Ál Saýd júzdegen musylman keptelisten kóz jumǵannan keıin qajylyq paryzyn óteý erejelerin qaıta qaraıtyny týraly málim etti. Korol qajylyqqa kelgenderdiń qaýipsizdigi úshin uıymdastyrý sharasyn jaqsartý kerek degen pikirge kelgen.
Óz kezeginde bılik tarapy qajylyqqa kelgenderdiń barlyǵyna aldyn ala birneshe tilde kúntártip kestesi taratylǵanyn, osyǵan sáıkes, toptar dinı rásimderdi jasaý úshin kezekpen jyljýy tıis ekenin alǵa tartýda.
Saýd Arabııasynyń bıligi ázirge qaza bolǵandardyń azamattyǵy jaıynda tolyq málimet taratqan joq, biraq Qazaqstan Qajylyq Mıssııasy oryn alǵan qaıǵyly oqıǵa arasynda qazaqstandyqtar joq ekenin málimdedi.
«Qazir Qazaqstan qajylaryna qyzmet etip jatqan kompanııa jetekshilerinen shuǵyl málimet alyndy. Aldyn ala málimetter boıynsha, zardap shekkender arasynda jerlesterimiz joq ekenin málimdeımiz. Sol sátte bizdiń qajylar Jamarat kópirine ózge jolmen júrgen. Osyǵan oraı, otandastarymyzdy alańdamaýǵa shaqyramyz. QMDB tóraǵasy, Bas múftı Erjan qajy Malǵajyulynyń shuǵyl tapsyrmasyna oraı, qajylar arasynda túsindirý, qaýipsizdik sharalaryn saqtaý jumystary kúsheıtildi», - dep habarlady Qazaqstan Qajylyq Mıssııasynyń tóraǵasy Ǵylymbek Májıev.
Iemen meshitindegi jarylystar
Iemen astanasy Sana qalasynda Qurban aıt merekesiniń qurmetine oqylǵan namaz kezinde eki jarylys boldy. Shetel buqaralyq aqparat quraldarynyń habarlaýynsha, jarylǵysh quraldar polıtsııa akademııasynyń mańynda ornalasqan ál-Balılı meshitinde iske qosylǵan.
Jergilikti bıliktiń málimetine qaraǵanda, meshittiń kireberisindegi tekseristen ótý úshin qylmyskerler jarylǵysh zattardy aıaq kıimge jáne ishki kıimderge jasyrǵan eken.
Kýágelerdiń aıtýynsha, birinshi jarylys ál-Balılı meshitiniń ishinde namaz kezinde oryn alǵan. Birneshe mınýttan keıin lańkes-jankeshti ǵımaratqa kireberiste jarylǵysh qurylǵy bekitilgen beldigin iske qosqan. Ekinshi jarylystyń kúshtiliginen týyndaǵan tolqyn meshittiń aýyr úlken esikterin julyp túsirgen.
«Adamdar namaz bólmesinen shyǵýǵa talpynǵan ýaqytta jankeshti meshittiń ishine kirýge tyrysqan. Alaıda ony qaqpa aldynda kúzet qyzmetkerleri toqtatqan eken jáne sol kezde ol ózin jaryp jibergen», -dedi meshittiń qaýipsizdik qyzmetiniń basshysy Adnan Haled.
Sonymen qatar ol osy qaıǵyly oqıǵadan keıin meshit qyzmetkerleri shabýyldaýshylar iske qosa almaı qalǵan taǵy eki jarylǵysh quraldardy anyqtaǵanyn jetkizdi.
Jarylys saldarynan kem degende 29 adam kóz jumdy jáne birneshe ondaǵan adam jaraqat aldy.
Jarylystar úshin «DAISh» lańkestik toby jaýapkershilikti óz moınyna aldy. Bul jaıynda olar ózderiniń Twitter-degi paraqshasynda jazdy.
BUU-nyń málimetterinshe, jarty jylda Iemende bolǵan qaqtyǵystar saldarynan 5 myńnan astam adam qaza taýyp, 25 myńy jaraqat aldy. Atap aıtqanda, zardap shekkender men qaza bolǵandardyń kóbisi beıbit turǵyndar.
