ÁLEM APTA ІShІNDE. Qaıǵyly senbi. «Kogalymavıanyń» qaıǵyly reısi men Býharestegi alapat órt
ASTANA. QazAqparat Ótken senbiden beri álem Mysyrdaǵy áýe apaty men Býharest qalasyndaǵy alpaýyt órt týraly jazýdy toqtatqan joq.
Ótken senbi kúni Egıpette «Kogalymavıa» kompanııasynyń «Airbus» A321» ushaǵy apatqa ushyrady. 217 jolaýshy, sonyń ishinde 25 búldirshin men jeti ekıpaj múshesi ajal qushty. Al, bul iri áýe apatynan birneshe saǵat buryn Býharest qalasynyń ortalyǵyndaǵy «Colectiv» túngi klýbynda órt shyǵyp, tilsiz jaý taǵy 31 adamnyń ómirin jalmaǵan edi.
«Kogalymavıa nyń» qaıǵyly reısi
Ótken senbi, 31 qazan kúni «Kogalymavıa» áýe kompanııasynyń «Airbus» A321» áýe laıneri Egıpettiń Sharm-esh-Sheıh qalasynan Reseıdiń Sankt-Peterbor qalasyna bet alady. Biraq, El-Arısha qalasynan 100 shaqyrym jerde apatqa ushyraıdy.
Áýe apaty týraly alǵashqy habar túse sala Reseı Federatsııasy Tótenshe jaǵdaılar mınıstrliginiń eki ushaǵy apat ornyna attandy. Osy ushaqtarmen RF Kólik mınıstri, Tótenshe jaǵdaılar mınıstri men Reseı avıatsııanyń basshylary, qutqarýshylar men tergeýshiler Egıpetke ushyp kelgen. Mysyr tarapynan qaıǵyly oqıǵanyń sebep-saldaryn anyqtaý úshin Egıpettiń azamattyq avıatsııa mınıstri men týrızm mınıstrleri kelgen bolatyn. Osy sátte qaza bolǵan adamdardyń týǵan-týystary Sankt-Peterbor qalasyna kele bastaǵan edi.
Qazaqstan Respýbıkasynyń Prezıdenti Nursultan Nazarbaev Reseı Federatsııasynyń Prezıdenti Vladımır Pýtınǵa kóńil aıtý jedelhatyn joldady. N.Nazarbaev halqynyń jáne óz atynan reseılikterdiń qaıǵysyna ortaqtasyp, qaza bolǵan adamdardyń týǵan-týystaryna sabyr aıtty.
Reseıdiń «Kogalymavıa» áýe kompanııasy ushaq sońǵy ret byltyr ǵana tehnıkalyq tekserýden ótkenin aıtady. Ushý aldyndaǵy tehnıka qaýipsizdigi de erejege saı júrgizilgen. Degenmen, kompanııa ushaq apatyna tehnıkalyq aqaý sebep bolýy múmkin degen boljam aıtyp otyr. Al AQSh ushaq ishinde bomba jarylýy ábden múmkin deıdi. Egıpet tarapy lańkestik áreketti joqqa shyǵaryp otyrǵanmen, Reseıdiń Ulttyq antıterrorlyq komıtetetiniń sheshemimin «Kogalymavıa» Egıpat áýejaılaryna ushý baǵdarlamalaryn toqtatty. Sarapshylar aptanyń seısenbi kúni ushaqtyń «qara jáshikterin» tekserýdi bastady. Reseı eki kún qara jamyldy...
«Colectiv» túngi klýbyndaǵy órt
2009 jyldyń 5 jeltoqsanynda Reseıdiń Perm qalasynda «Hromaıa loshad» túngi klýbynda 156 adamnyń ómirin jalmaǵan postkeńestiń elderdegi eń iri órt tirkelgen edi. Ótken senbi kúni Býharestegi «Colectiv» túngi klýby órtke orandy. ««Goodbye to Gravity» tobynyń tegin rok-kontsertine 400-ge jýyq adam jınalǵan túngi klýbta kenet tútin shyǵa bastaıdy da, jarylys bolady. Halyq jantalasa syrtqa asyqqanmen, túngi klýbtyń eki esigi óte tar ári bı alańynan alysta ornalasqan bolyp shyǵady. Aıta keteıik, 300 adam jınalǵan «Hromaıa loshad» túngi klýbynda da dál osyndaı jaǵdaı oryn alǵan edi.
Jarylys saldarynan bastalǵan órtti aýyzdyqtaý úshin órt sóndirýshiler men 60 jedel járdem brıgadasy keledi. Zardap shekken halyq Býharestiń 10 aýrýhanasyna jetkizildi. Tragedııa 31 adamnyń ómirin jalmasa, 90 adamdy qatty kúıik shalǵan. Taǵy 25 adam aýrýhanalardyń jan saqtaý bóliminde jatyr. Klýbqa kontsert kórýge kelgenderdiń barlyǵy derlik jetkinshekter men jas qyz-jigitter bolǵan eken. Rýmynııa halqy úsh kún qara jamyldy...
«Búgin túnde qala ortalyǵynda oryn alǵan bul qaıǵyly oqıǵa qabyrǵamdy qaıystyryp otyr. Bul - men úshin, halqym úshin, el azamattary úshin óte aýyr qaıǵy. Osy oqıǵada qyrshyn ketken jastardyń otbasylaryna qaıǵyryp kóńil aıtamyn»,-degen Rýmynııa Prezıdenti Klaýs Iohannıs óziniń Feısbýk áleýmettik jelisindegi jeke paraqshasyna.
Órtten keıin úsh kún ótken soń Býharest ortalyǵyna 20 myńǵa jýyq adam jınalyp, el Premer-mınıstri men Syrtqy ister mınıstriniń, sondaı-aq, osy túngi klýb ornalasqan qalalyq okrýg basshysynyń otstavkaǵa ketýin talap etken. «Reıter» agenttiginiń habarlaýynsha, el Premer-mınıstri Vıktor Pont osy oqıǵadan keıin otstavkaǵa ketetinin málimdegen eken.
