ÁLEM APTA ІShІNDE: Italııa soty Sılvıo Berlýskonıdi túrmege jabý týraly sheshim shyǵardy
MÁSKEÝ. 27 qazan. QazAqparat - Ótip bara jatqan aptada álemdi eleń etkizgen oqıǵalardyń eń eleýlisi Italııadaǵy jańalyqtar boldy. Juma kúni Mılan soty Italııanyń burynǵy premer-mınıstri Sılvıo Berlýskonıdi 4 jylǵa bas bostandyǵynan aıyrdy
Bul sheshim Berlýskonı ózi qurǵan eldegi eń iri medıalyq top bolyp tabylatyn «Mediaset» kompanııasynda jasaǵan qarjylyq qylmystaryna baılanysty shyǵaryldy. Bul belgili saıasatkerdiń qatysy bar qylmystardyń osyndaı aýyr jazamen aıaqtalǵan alǵashqy isi boldy.
Sondaı-aq, sottyń sheshimimen ıtalıandyq eń iri medıaqurylymdardy basqaryp otyrǵan 76 jastaǵy saıasatker 3 jyl boıy memlekettik qyzmetten alastatyldy. Qalaberdi ol sybaılastarymen birge Italııanyń Salyq organdaryna 10 mln. eýro tóleýge mindetteldi. Nátıjesinde qoldanysta bar amnıstııa týraly zańǵa sáıkes sot S. Berlýskonıge 1 jyl bas bostandyǵynan aıyrý jazasyn berdi.
Berlýskonıdiń ózi sot otyrysyna qatysqan joq, kelmeýin saıası sebeptermen baılanystyrǵan. Qazir ol bostandyqta jáne sot sheshimin apellıatsııaǵa bermek nıette.
«Men ózimniń aqtalyp shyǵatynyma senimdi boldym. Bul aqylǵa syımaıtyn sheshim, - dedi burynǵy premer jergilikti arnaǵa suhbat bergende. - Italııa mundaı sotymen órkenıetten alshaqtap, varvarlyq jáne demokratııasyz memleketke aınalyp barady».
Bul is boıynsha taǵy 11 adamnyń ústinen is qozǵaldy, olardyń arasynda Berlýskonıdiń uly Per-Sılvıo da bar. Halyqtyń kóbi Italııadaǵy eń baı adamnyń (Forbes onyń baılyǵyn 5,9 mıllıard dollar dep baǵalaǵan) osyndaı kúıge dýshar bolatynyna ále sene alar emes.
Degenmen, úkim shyǵysymen «Mediaset» aktsııalary 3%-ǵa túsip ketken. Qazir Berlýskonı basqaratyn «Erkindik halqy» partııasynyń bedeli de túsip ketý qaýpi joqqa shyǵarylmaıdy. Keler jyldyń kúzinde elde parlamenttik saılaý ótetindigin eske alsaq, partııanyń bolashaǵy bulyńǵyr ekeni túsinikti. Degenmen Berlýskonı buǵan deıin aıtqandaı, onyń partııany saılaýǵa deıin basqarýy ekitalaı.
Taǵy bir aıta keterligi, «Mediaset» isinen basqa S. Berlýskonıdiń ústinen taǵy bir qylmystyq is qaralýda. Ol premer bolyp turǵan kezinde kámeletke tolmaǵan qyzdarmen jyn oınaq jasady dep aıyptalyp otyr. Eger de «Mılan» klýby ıesiniń kinásy dáleldense, kámeletke tolmaǵandarmen jynystyq qatynas úshin 3 jylǵa deıin jáne qyzmettik ýákildigin asyra paıdalandy degen aıyppen 12 jyl bas bostandyǵynan aıyrý jazasy kesiledi.
