ÁLEM APTA ІShІNDE: Iraktyqtardyń úreıi údep tur
ASTANA. QazAqparat - Bireýge mal qaıǵy, bireýge jan qaıǵy. Irak jurtshylyǵy «DAISh» tobynyń sodyrlary salǵan lańnan mezi bolyp, jan saqtar jer tappaı júrse, frantsýz Frederık Desnar az jumys berip, erigip bosqa otyrýǵa jol bergen burynǵy jumys berýshisin sot aldyna súıreýde.
Iraktyqtardyń úreıi údep tur
Irakta «DAISh» lańkestik tobynyń belsene túsýine baılanysty eldiń qaýipsizdik salasyndaǵy ahýal shıelenise túsýde. Baǵdadta jáne oǵan irgeles jatqan shaǵyn qalashyqtarda turaqty júrde jarylystar oryn alyp, beıbit turǵyndar men quqyq qorǵaý organdarynyń qyzmetkerleri qaza tabýda.
Máselen, senbi 30 sáýir kúni Irak astanasynan shyǵysqa qaraı qonys tepken Naravan shaharynda jarylyǵysh zat qondyrylǵan kólik kókke ushty. Jarylys mal bazary janynda oryn alǵan.
Jergilikti buqaralyq aqparat quraldarynyń málimetterine sáıkes, bul lańkestik áreketten keminde 24 adam ólip, taǵy da 40-qa jýyq adam túrli deńgeıde dene jaraqatyn alǵan.
Kelesi kúni Baǵdadtyń ońtústigindegi Es-Samava qalasynda eki jarylys jasaldy. Bul qalada da mýnıtsıpaldy keńes ǵımaraty men avtobýs aıaldamasy janynda turǵan 2 kólikke qoıylǵan jarylǵysh zat iske qosyldy.
Eki jarylystan mert bolǵandardyń sany 38 adamǵa jetip otyr. Munan bólek 86 adamnyń jaraqat alǵany taǵy bar. Aıta keterligi, Es-Samava shıitterdiń El-Mýtann ólkesiniń astanasy sanalady. Sońǵy jyldary bul óńir asa qaýipti aımaqtardyń birine aınalyp otyr. Onda lańkesterdiń shabýyly jıi oryn alýda.
Dúısenbi kúni Baǵdadtyń ońtústigindegi Saıdııa aýdanynda «DAISh» jankeshtisi iske qosqan jarylystyń saldarynan keminde 18 adam ólip, taǵy 45-i jarattandy.
Jalpy, joǵaryda atap ótken barlyq jarylystardyń jaýapkershiligin «DAISh» lańkestik toby óz moınyna alyp otyrǵandyǵy belgili.
Búginde Irakta kúrdeli ahýal oryn alyp otyr. Eldegi saıası daǵdarystyń kúsheıe túsýi aıasynda ulttyq qarýly kúshterdiń «DAISh» lańkestik tobymen teke-tiresi sozylyp ta ketti. Qaqtyǵys saldarynan kóptegen adamdar qaza tabýda, olardyń arasynda beıbit turǵyndar da kóp.
BUU-nyń Irakqa járdem kórsetý jónindegi mıssııasy usynǵan derekterge qaraǵanda, osy jyldyń sáýir aıynyń ishinde ǵana lańkestik shabýyldardyń, zorlyq-zombylyqtyń jáne qarýly qaqtyǵystardyń saldarynan 740 ıraktyq mert bolyp, shamamen 1370-i jaraqat alǵan. Qaqtyǵystardan kóp zardap shekken aýdandar men qalalardyń qatarynda Baǵdad shahary kósh bastap tur. Bul shahardyń ózinde ǵana sáýir aıynda 232 beıbit turǵyn oqqa ushyp, 642 adam jaraqattanǵan.
Joǵaryda atap ótken mıssııa usynǵan taǵy bir derekke qaraǵanda, ótken jyldyń ishinde Irakta lańkestik shabýyldar, zorlyq-zombylyq pen qarýly qaqtyǵystar saldarynan 22 myńnan astam adam qaza tapqan.
Іsh pystyrar jumysynan jalyqqan frantsýz sotqa júgindi
Ótken aptada álem jurtshylyǵy Parıj qalasynyń 44 jastaǵy turǵyny Frederık Desnardyń áreketine nazar aýdardy. Ol óziniń burynǵy bastyǵyn az jumys berip, zeriktirgeni úshin sot aldyna súıreýde. 2006-2014 jyldary aralyǵynda Parıjdegi tanymal parfıýmerııa kompanııasynda jumys istegen Desnardyń aıtýynsha, jumystyń tym jeńil bolýy saldarynan qatty zerikken. Sonyń saldarynan densaýlyǵy da syr bere bastaǵan.
Ol 2014 jyly jol apatyna túsip, 7 aı em-dom alǵannan keıin jumysynan ketken. Onyń sózine qaraǵanda, jol apatyna túsýine zeriktirer jumysy barysynda paıda bolǵan qoıanshyq aýrý túrtki bolǵan. Munan bólek, jumys ornyna esh is tyndyrmaı bos otyrýdyń saldarynan uıqysyzdyq, toryǵý syndy aýrýlary da qylań beripti.
Jumysynda esh is tyndyrmastan jylyna shamamen 80 myń eýro jalaqy alyp kelgenine uıalatyn ol endigi ýaqytta kompanııadan moraldyq shyǵyndy qosa alǵanda jiberip alǵan tabysyn da 360 myń eýro kóleminde óndirip alýǵa kúsh salmaq.
Mundaı jaıtqa tap bolǵan kompanııa da bos otyrǵan joq. Olar shaǵymdanýshynyń sózderinde kereǵarlyq bar ekendigin aıtýda. Máselen, 4 jyl boıy Desnar birde-bir basshylyqqa óz jumysynyń zeriktiretindigin aıtyp shaǵym jasamaǵan.
