ÁLEM APTA ІShІNDE: Irak jaýyngerleri jappaı kómilgen zırat tabyldy

Tıkrıtte ırak jaýyngerleriniń jappaı kómilgeni belgili boldy

Seısenbi kúni Iraktiń Salah-ed-Dın ólkesiniń ákimshiligi ortalyǵy Tıkrıt qalasynan «Islam memleketi» sodyrlary yǵystyrylǵannan keıin 12 jerde adamdardyń jappaı kómilgeni belgili boldy.

Qabirler burynǵy amerıkandyq Kemp Spıcher áskerı bazasyna taqaý mańnan tabyldy, Áskerı qyzmetshilerdiń pikirinshe, baýyrlastar zıratynda shamamen 1700 ırak jaýyngeriniń múrdesi jatyr. Olar ótken jyldyń jazýynda djıhadshylardyń qolyna tutqynǵa túsken. Jazaǵa ushyraǵandardyń basym bóligi shııtter.

Tıkrıt qalasy 2014 jyldyń maýsymynda ıslamshylardyń keń aýqymdy shabyly nátıjesinde «Islam memleketi» toby sodyrlarynyń qaramaǵyna ótken bolatyn. Eldi mekenge tolyq baqylaýyn ornatqannan keıin djıhatshylar tutqynǵa alynǵan áskerı qyzmetshilerdi qaısysy Islamnyń shııt tarmaǵyn ustanatyndyǵyn anyqtaý úshin tergegen.

«Islam memleketi» sodyrlarynyń ırak armııasy jaýyngerleri men ofıtserlerin jábirlep jatqan beıne jazbalar men sýretter ǵalamtorda jarııalandy. Dál osy jappaı jazalaý «Islam memleketi» lańkesteriniń adamı qasıetten jurdaı ekendigin ári Iraktiń shııt turǵyndarynyń qanshalyqty jek kóretindigin dáleldeı túsedi.

«Bul - jantúrshigerlik kórinis. Biz kóz jasymyzǵa ıe bola almaı qaldyq. Qoldary qalt etpesten 1700 adamdy o dúnıege attandyrý qandaı jabaıyǵa qajet boldy eken?» - deıdi Reıter agenttigine suhbat bergen Irak Densaýlyq saqatý mınıstrliginiń ókili Halıd al-Atbı.

Irak bıligi 1 sáýir kúni Tıkrıttiń azat etkendigin resmı jarııa etip, sodan keıin birden iz-tússiz joǵalǵan jergilikti turǵyndardy izdeý jumystaryna kirgen bolatyn. Naýryz aıynda bastalǵan qalany azat etý operatsııasyna 30 myńnan astam jaýynger qatysty.

Taıaý Shyǵystyń keıbir buqaralyq aqparat quraldarynyń taratqan málimetterine qaraǵanda, Tıkrıt qalasyn azat etý sarbazdarynyń jekelegen toptary tarapynan jergilikti súnnıtterdi zorlyq-zombylyqqa ushyratý, dúnıe-múlkin tonaý oryn alǵan.

Kómilgen jaýyngerlerdiń múrdelerin qazyp alý jumystary jalǵasýda. Biraq, ázirshe, eshkim de qansha adamnyń kómilgendigin naqty dóp basyp aıta almaıdy. Sondyqtan olardyń sany bastapqy derekterden álde qaıda kóp bolýy múmkin. múrdelerdi qazyp alý jumystary aıaqtalǵannan keıin DNK úlgileri Baǵdatqa molekýlıarlyq saraptama jasaý úshin jiberiledi. Bul jazalǵandardyń aty-jónderin anyqtaý úshin qajet.

Tıkrıt qalasynyń azat etilýi Irak armııasyna ózin-ózi jarııa etken halıfattyń astanasy, eldegi ekinshi iri qala Mosýlǵa shabýyldaýyna múmkindik beredi. Degenmen, sarapshylardyń pikirinshe, Mosýlǵa shabýyl jasaý ońaıǵa soqpaıdy. Óıktkeni, djıhadshylar qalany ózderiniń eń basty bekinisine aınaldyryp alǵan.

AQSh-ta qara násildi taǵy da polıtsııa qolynan qaza tapty

7 sáýir kúni New York Times gazeti jasyl fýtbolka kıgen qarýsyz qara násildi azamaty qashyp bara jatqan jerinde tý syrtynan 8 márte oq atqandyǵy beınelengen beıne jazbany jarııalady.

Qaıǵyly oqıǵa ótken senbi kúni AQSh-tyń Ońtústik Karolına shtatyna qarasty Nort-Charlston qalasynda oryn aldy. Oqqa ushqan adam - 50 jastaǵy Ýolter Skott, al ony atqan poltsııa qyzmetkeri 33 jastaǵy Maıkl Sleger.

Poltsııa derekterine qaraǵanda, 4 sáýir kúni Sleger Mercedes-Benz avtomobılin toqtatqan. Mashına toqtaǵannan keıin onyń júrgizýshisi kólikten shyǵyp polıtsııadan qasha jónelgen. Sońyna tura qýǵan Sleger qashqyndy toqtatý úshin elektroshoker qarýyn qoldanǵan. Alaıda qashqyn toqtamaı, odan ary qasha bergen.

Sondaı-aq atalǵan qujatta júrgizýshiniń polıtsııadan elektroshokerdi tartyp almaq bolǵany da jazylǵan. Ómirine qaýip tóngennen keıin polıtsııa qarý qoldanǵan.

Degenmen, vıdeodan oqqa ushqan adamnyń qolynda eshteńe bolmaǵany anyq kórinedi. Buǵan qosa, polıtsııa ony atyp tastaǵannan keıin janyna belgisiz zatty qoıyp jatqany baıqalady.

Ǵalamtorda beınejazba jarııalanǵannan keıin bılik polıtsııanyń ústinen adam óltirdi degen aıyp taqty. Ony kepilge bosatýdan bas bas tartyldy. Al 8 sáýirde Slegerdiń quqyq qorǵaý organynan shyǵarylǵany habarlandy.

Federaldy tergeý bıýrosy men AQSh-tyń ádilet mınıstrligi óz taraptarynan atalǵan iske baılanysty bir-birine táýelsiz tergeý amaldaryn bastady. Eger Slegerdiń kinási anyqtalatyn bolsa, ol 30 jyldan bastap ómir boıyna bas bostandyǵynan aıyrylýy múmkin.

Beıne jazba jarııa etilgen kúnniń ertesinde júzdegen adam qala kóshesine shyǵyp, Sleger jumys istegen polıtsııa ýchaskesiniń ǵımaraty aldyna jınaldy. Olar «Ádildik!» jáne «Óltirgenderiń jetedi!» dep urandatty.

Narazylyq sherýge shyqqandardyń basym bóligi eger beınejazba jarııa etilmegende Slegerdiń qylmysyn eshkim de, eshqashan bilmeı qalatyndyǵyna senimdi. Sherýshiler mundaı oqıǵanyń birinshi ret oryn almaǵandyǵyn aıtyp, onyń endi qaıtalanbasy úshin qoǵamdy ózgertý qajettigin aıtýda.