ÁLEM APTA ІShІNDE: Indonezııadaǵy ushaq apaty, Pákistanda poıyzdyń kópirden qulaýy jáne Fılıppın jaǵalaýyndaǵy qaıǵyly oqıǵa
ASTANA. QazAqparat - Ótip bara jatqan bul aptada halyqaralyq qoǵamdastyqtyń nazary birneshe qaıǵyly oqıǵalarda boldy. Seısenbide Indonezııada áskerı-kóliktik «Gerkýles» ushaǵy «Golden Elevan» qonaqúıi ǵımaratyna qulady. Beısenbide Pákistanda kópirdiń opyrylyp túsýi saldarynan jolaýshylar poıyzynyń birneshe vagony ózenge qulady. Sol kúni Fılıppınde «Kım Nırvana» jolaýshylar paromy sýǵa batyp ketti. Bul qaıǵyly oqıǵalardyń barlyǵy kem degende 200 adamnyń ómirin qıdy.
Indonezııadaǵy ushaq apaty
Sýmatra aralynyń soltústigindegi Medan qalasynda Indonezııanyń Hercules C-130 áskerı-kólik ushaǵynyń qonaqúı men turǵyn alaptaryna qulaýy saldarynan 100-den astam adam ajal qushty.
Indonezııanyń Medan áskerı bazasynan ushyp shyqqan áýe kemesi Tandjýng-Pınang qalasyna baǵyt alǵan. Ol kezekshilikti aýystyrý úshin áskerı personal men olardyń otbasy múshelerin tasymaldaǵan kórinedi.
Kýágerlerdiń aıtýynsha, apatqa deıin ushaq qalanyń ústinde tómen bıiktikte aınalyp ushyp júrgen. Sol ýaqytta onyń bir qozǵaltqyshynan tútin shyqqan eken. Keıinnen ushaq jyldamdyǵyn joǵaltyp, jerge qaraı kúrt quldılaı bastady.
Belgili bolǵandaı, «Gerkýles» bortynda 12 ekıpaj múshesi men 110 áskerı qyzmetker, sondaı-aq olardyń otbasy músheleri bolǵan. Olardyń eshqaısy aman qalmady. Munymen qosa, apat kezinde jerde bolǵan kem degende taǵy 19 adam ajal qushty.
Atap aıtqanda, apat aldynda ekıpajdyń komandıri qozǵaltqyshtyń isten shyqqanyn habarlaǵan kórinedi. Keıinen, ushaq áýege kóteriler aldynda áýejaıdaǵy antennany janap ótkendigi belgili boldy. Mamandardyń aıtýynsha, osy jaǵdaı qozǵaltqyshtyń isten shyǵýyna áser etýi múmkin. Indonezııalyq áskerıler apat boıynsha tergeý amaldarynyń qorytyndysyn eki aptadan keıin jarııalaýǵa ýáde berdi.
Aıta keterligi, juma kúni áýe apatynan qaza bolǵandardyń máıitin jetkizý tıis Indonezııanyń «Gerkýles» C-130 áskerı-kólik ushaǵy tehnıkalyq sebeptermen Medan qalasynyń áýejaıynan usha almaǵan.
Ushar aldynda onyń elektr jelileri tuıyqtalyp qalǵan eken. Onyń bortynda qaza bolǵandardyń otbasy músheleri, sondaı-aq apattan ajal qushqandardyń máıitteri boldy.
Osyǵan baılanysty Indonezııa áskerıleri apat tergeýi aıaqtalǵansha, barlyq «Gerkýles» tıpindegi ushaqtardyń áýege kóterilýine tyıym saldy. Óz kezeginde el prezıdenti avıaparkti jańartyp, áskerı shyǵystardy kóteretindigin atap ótti.
Pákistandaǵy poıyz apaty
Beısenbide pákistandyq Gýdjranval okrýginde jolaýshylar poıyzynyń birneshe vagony kópirdiń opyrylýy saldarynan ózenge qulady. Apat kezinde onda birneshe júzdegen jolaýshylar bolǵan.
Qaıǵyly oqıǵa temir jol quramynyń Chanavan kanalynan ótý kezinde oryn aldy. Kópirdiń tireýleri salmaqqa shydaı almaı, opyrylyp ketken. Apat saldarynan kem degende 17 adamnyń ómiri qıyldy.
Oqıǵa ornyna qutqarý qyzmetteri baǵyttalyp, olarǵa sonymen qatar jergilikti turǵyndar men áskerıler kómek kórsetti. Qutqarý sharalarynyń arqasynda 80 adamdy aman alyp qalý múmkin boldy.
Apatqa baılanysty atalǵan baǵytta qozǵalysqa shekteý engizildi. Eldiń Premer-mınıstri Navaz Sharıf jaraqat alǵandarǵa barlyq qajetti resýrstardy bólý jáne temir joldardy qalpyna keltirý tapsyrmalaryn berdi.
Sarapshylardyń paıymynsha, apat kópirdiń tozýy nátıjesinde oryn aldy. Qazirgi kezde bul oqıǵa boıynsha tergeý amaldary júrip jatyr.
Fılıppın jaǵalaýyndaǵy qaıǵyly oqıǵa
Beısenbi tańerteń 27 metrlik «Kım Nırvana» atty jolaýshylar paromy fılıppındik arhıpelag aýdanynda Ormok qalasynan Kamotes aralyna qaraı baǵytta sýǵa batty. Onyń bortynda 189 adam bolǵan eken. Keme jaǵalaýdan birneshe júzdegen metr alystaǵannan keıin sýǵa ketken.
Qutqarý sharalarynyń barysynda súńgýirler kemeniń ishki korpýsyna kirýge talpynǵanymen, aýa raıy jaǵdaıy men sý túbinde laıdyń saldarynan durys kórinbeýi qutqarý jumysyn qıyndatyp jiberdi.
Belgili bolǵandaı, apat kezinde 141 adam qutqarylyp, 42 jolaýshy ajal qushty. Al qalǵandary iz-túzsiz joǵalǵandar sanatyna engizildi. Aldyn ala málimetter boıynsha apatqa teńizdegi bıik tolqyndar sebep boldy.
Kýágerlerdiń aıtýynsha, shamadan tys júk tıelgen parom oń jańyna jantaıa bastaǵan jáne osy kezde ony úlken tolqyn basyp qalǵan kórinedi. Osynyń saldarynan týyndaǵan dúrbeleńde jolaýshylardyń barlyǵy qısaıǵan jaqqa qaraı shoǵyrlanyp, budan keıin keme aýdarylyp qaldy.
Alaıda fılıppındik bılik ókilderi bul qaıǵyly oqıǵa boıynsha adamı faktor da oryn alýy múmkin ekenin alǵa tartýda. Kemeniń kapıtany men onyń ekıpajyn quqyq qorǵaý organdary qamaýǵa alǵan eken. Qazirgi kezde tergeý amaldary júrgizilýde.
Fılıppınde teńizde apat jıi oryn alady. Olardyń eń irisi 1987 jylǵy jeltoqsanda jolaýshylar kemesi men munaı quıatyn tankerdiń soqtyǵysýy saldarynan 4 myńǵa jýyq adam ajal qushqan bolatyn.
