ÁLEM APTA ІShІNDE: FIFA daýǵa qaldy
ASTANA. QazAqparat - Ótip bara jatqan apta ishinde álemdik qoǵamdastyqtyń nazary birqatar oqıǵaǵa aýdy. Máselen, teńbil doptyń jankúıerleri Halyqaralyq fýtbol federatsııasy (FIFA) tóńireginde týyndaǵan daýǵa jiti nazar aýdardy. Óıtkeni, atalǵan uıym ókilderi álem chempıonatyn uıymdastyrýshy elderdi tańdaý barysynda jemqorlyqqa boı aldyrǵan-mys. Al Ǵalamshardyń Azııa bóliginde Úndistandaǵy aptap ystyq 2 myńnan astam adamnyń ómirin qıdy. Osy aptada aýqymdy mádenı shara da ótti. Kınosúıer qaýym 68-shi Kann kınofestıvali jeńimpazdarymen tanys boldy.
FIFA jemqorlyq damýyna uryndy
Sársenbi kúni tańerteń Shveıtsarııa polıtsııasy Qurama Shtattardyń quqyq qorǵaý organdary suranysy boıynsha Halyqaralyq fýtbol federatsııasynyń joǵary shendi 7 sheneýnigin, onyń ishinde uıymnyń eki vıtse-prezıdentin ustady. AQSh sońǵy 20 jyldyń ishinde FIFA álem chempıonatyna arnalǵan ótinimder, marketıngtik jáne oıyndardy taratý kelisimderi tóńireginde jemqorlyqqa urynǵan dep málimdeýde. Aıyptaý arasynda alaıaqtyq, reket jáne aqshany jylystatý qylmystary da bar.
Buǵan qosa shveıtsarııalyq quqyq qorǵaý organdary 2018 jáne 2022 jyldardaǵy álem chempıonatyn ótkizýshi elderdi irikteý barysynda da zań buzýshylyqtardyń oryn alýy boıynsha qylmystyq is qozǵaýda. Aıta keterligi, AQSh pen Shveıtsarııa tergeý amaldaryn bir-birinen derbes júrgizýde. Degenmen, eki eldiń quqyq qorǵaý vedomstvolary turaqty baılanys jasap otyr.
Dál sol kúni FIFA-nyń kommýnıkatsılar jáne qoǵammen baılanys departamentiniń dırektory Valter De Gregorıo uıymnyń shtab-páterinde baspasóz máslıhatyn ótkizdi. Onda Halyqaralyq fýtbol federatsııasynyń 2018 jáne 2022 jyldarda fýtboldan álem chempıonatyn ótkizýshi eldi anyqtaý máselesiniń baıybyna barý maqsatynda tergeý amaldarynyń júrgizilýine bastamashy bolǵany anyqtaldy.
«FIFA bul protsesti qoldaıdy jáne Shveıtsarııa bas prokýrrymen tolyqqandy ynytmaqtastyqta jumys isteýde. FIFA aqparat berý týraly barlyq suranystarǵa jaýap beredi», - dedi De Gregorıo.
Buǵan qosa FIFA-nyń kommýnıkatsılar jáne qoǵammen baılanys departamentiniń basshylyǵy atalǵan iste Halyqaralyq fýtbol federatsııasynyń zardap shegýshi trap bolyp otyrǵandyǵyn basa aıtty.
Sonymen qatar Valter De Gregorıo bul iske FIFA prezıdenti Iozef Blatter men uıymnyń bas hatshysy Jerar Valkeniń qatysy bar ekendigi týraly taraǵan aqparatttyń shyndyqqa janaspaıtyndyǵyn atap ótti.
«Men Twitter-den, baspasóz habarlamalarynan, pikirlerden osy máselege qatysty paıymdardy oqydym. Bul iske bas hatshy men prezıdenttiń qatysy joq ekendigin atap ótkim keledi», - dedi De Gregorıo.
Uıym tóńireginde týyndap otyrǵan daý-damaıǵa qaramastan keshe Halyqaralyq fýtbol federatsııasynyń (FIFA) prezıdenti Iozef Blatter birden-bir básekelesi Álı bın Ál-Hýseın saılaýdyń ekinshi týrynda kúresti jalǵastyrýdan bas tartqan soń bes jyldyq merzimge qaıta saılandy.
Uıymnyń Tsıýrıhtegi kongresinde 79 jastaǵy Blatter birinshi týrda 133 daýys, al onyń qarsylasy - 73 daýys jınady. Ekinshi týrda oǵan qarapaıym kópshilik daýys jınasa jetkilikti boldy.
Úndistandy aptap ystyq býyp tur
Ótip bara jatqan apta boıy Úndistannyń birqatar shtatynda aptap ystyq bolyp tur. Sonyń saldarynan qazirdiń ózinde 2 myńnan astam adamnyń qaza tapqany belgili. Adamdar tipti, kóshede kele jatyp esten tanýda. Al aýrýhanalar bolsa, kún ótken adamdarǵa lyq toly. Olardyń basym bóligi: balalar men qarttar, sonymen qatar uzaq ýaqyt kún astynda júretin jumysshylar men baspanasyz jandar.
Ólim-jitimniń basym bóligi eldiń ońtústigindegi Andhra-Pradesh pen Telangan shtatynda tirkelýde. Qaza tapqandardyń 95 paıyzy osy óńirlerden. Bul shtattardaǵy aýa temperatýrasy 47 gradýsqa jetip tur. Ádette, bul mezette óńirdegi aýa temperatýrasy 40 gradýsty mańaılaıtyn.
El bıligi ázirshe tótenshe jaǵdaı jarııalaı qoıǵan joq. Degenmen, halyqqa kóshede uzaq júrmeýge, kún ótýden saqtaný úshin qalpaq kıip, sýdy kóp ishýge keńes berýde. Alaıda, sý tapshylyǵy jaǵdaıdy odan ary ýshyqtyrýda.
Úndistan meteorologııalyq vedomstvonyń málimetine sáıkes, aptap ystyq Andhra-Pradesh pen Telangan shtatynan bólek Pendjab, Ýttar-Pradesh, Radjasthan, Madhıa-Pradesh, Chhattısgarh, sonymen birge Delıde de apta boıy saqtalady.
68-shi Kann kınofestıvali jabyldy
Ótken jeksenbide 68-shi halyqaralyq Kann kınofestıvaliniń resmı túrde jabyldy. Festıvalǵa usynylǵan kınolardyń kórsetilimi mamyrdyń 13-24-i aralyǵynda ótken bolatyn. Onyń konkýrstyq baǵdarlamasyna 50-den astam fılm engizilgen. Biraq, onyń tek 19-y ǵana «Altyn palma butaǵy» úshin saıysqa tústi. Rejısser jáne stsenarıı jazýshylar, aǵaıyndy Djoel jáne Itan Koenderler basqarǵan qazylar alqasynyń sheshimimen «Altyn palma butaǵy» syılyǵy frantsýzdyq rejısser Jak Odııardyń «Dıpan» fılmine buıyrdy. Týyndy elinen boı tasalap shyqqanan keıin Frantsııada jańa ómir bastaýǵa tyrysqan shrılankalyq sodyrdyń taǵdyrynan syr shertedi.
Mártebesi jaǵynan ekinshi orynda turǵan festıval gran-prıi «Osventsım» kontslagerindegi jantúrshigerlik tirlikti pash etetin vengerlik Laslo Nemashtyń «Syn Solo» kınotýyndysyna buıyrdy.
Al áıelder arasyndaǵy úzdik ról syılyǵy eki aktrısaǵa buıyrdy. Olar: «Kerol» týyndysyna túsken Rýnı Mara men «Moı korol» fılminde basty róldi somdaǵan Emmanýel Berko. Al Vensan Lındon «Zakon rynka» fılminde róli úshin úzdik akter atandy.
Taıvandyq kınematografıst Hoý Sıaosıan «Ýbııtsa» fılmi úshin úzdik rejısser dep tanyldy. Al frantsýz Mıshel Franko úzdik stsenarııi úshin marapatqa ıe boldy. «Altyn kamera» júldesi kolýmbııalyq rejısser Sezar Asevedonyń «Zemlıa ı ten» fılminiń qanjyǵasyn maılady. Úzdik qysqametrajdy fılm atalymda lıvandyq rejısser Elı dagerdiń «Volny-98» týyndysy joǵary marapatqa ıe boldy.
Sonymen qatar kınofestıvaldiń jabylý saltanatynda Frantsýzdyq kınorejısser Anes Varda álemdik kınomatografııanyń damýyna qosqan zor úlesi úshin «Altyn palma butaǵy» syılyǵymen marapattaldy.
