ÁLEM APTA ІShІNDE: EgyptAir áýe kemesi apatqa ushyrady
ASTANA. QazAqparat - Ótip bara jatqan apta ishinde álem jurtshylyǵy 14 mamyr kúni Stokgolmde ótken «Eýrovıdenıe» án baıqaýynyń qorytyndysyn jan-jaqty talqyǵa saldy. Munan bólek, bul aptada qaıǵyly oqıǵa da oryn alǵany belgili. Atap aıtqanda, EgyptAir áýe kompanııasyna tıesili Airbus A320 jolaýshylar ushaǵy radardan joǵalyp ketti. Bul habardy sársenbi kúni atalǵan kompanııa óziniń «Tvıtterdegi» shaǵyn blogynda jarııa etken bolatyn.
«Evrovıdenıe-2016» baıqaýy
Shvetsııa astanasynda «Evrovıdenıe» halyqaralyq mýzykalyq baıqaý aıaqtaldy. Mártebeli baıqaýdyń aqtyq synyna 26 ánshi qatysty. Aıta keterligi, osy jyly bul shoý búkil álemniń 50 eline, onyń ishinde AQSh pen Qytaıda da kórsetilip, kórermen sany shamamen 200 mln. adamǵa jetti. Baıqaýdy «Evrovıdenııa-2015» jeńimpazy Mons Selmerlev pen tanymal shved aktrısasy Petra Mede júrgizdi.
Fınaldyń ashylýyna amerıkalyq oryndaýshy Djastın Tımberleık arnaıy shaqyrylyp, ol óziniń jańa «Can't Stop The Feeling» atty hıt ánin oryndady.
Aǵymdaǵy jyly baıqaýdyń daýys berý júıesi ózgeriske ushyraǵan. Endigi ýaqytta tóreshiler men kórermender bir-birine táýelsiz óz daýystaryn bere alady. Osylaısha, uıymdastyrýshylar sońǵy sátke deıin kórermendermen qatar qatysýshylardy da baıqaýdyń jeńimpazyn anyqtaýda sarsańǵa salyp qoıdy desek bolady.
Máselen, avstralııalyq Demı Im kásibı tóreshiler tarabynan eń kóp daýys jınasa, telekórermenderdiń daýysyn reseılik Sergeı Lazarev ıelengen edi. Al oǵan kásibı mamandar tek 5-shi oryndy ǵana bergen-di.
Sonymen, mýzykalyq baıqaýdyń qorytyndysynda ýkraın ánshisi Djamala (Sýsana Djamaladınova) «1944» ánin oryndap, 534 ballmen jeńiske jetti. Ekinshi orynǵa «Sound of Silence» ánimen 511 upaı jınaǵan Demı Im turaqtady. Al úzdik úshtikti 491 upaımen Sergeı Lazarev tuıyqtady.
Sońǵy nátıjeden keıin jeńimpaz retinde sahna tórine kóterilgen Djamalaǵa júrgizýshi Mons Selmerlev jeńisine qatysty pikir bildirýin ótindi.
«Sizderdiń beıbitshilik pen mahabat jaıynda án salatyndyqtaryńyzdy bilemin. Men de beıbitshilik pen mahabbat tileısin, Rahmet, Eýropa! Ýkraınaǵa qosh keldińizder! Kóp-kóp rahmet», - dedi tolqý ústinde turǵan ýkraınalyq ánshi.
Bas júlde retinde Djamalaǵa klassıkalyq pishinde ázirlengen hrýstal mıkrofon tabystaldy. Aıta keterligi, bul baıqaý kelesi jyly Ýkraınada ótetin bolady. Este bolsa, bul ýkraındyqtardyń osynaý mártebeli baıqaýdaǵy ekinshi jeńisi. 2004 jyly ánshi Rýslana jeńimpaz atanǵan edi.
«EgyptAir» áýe kemesi apatqa ushyrady
Sársenbiden beısenbige qaraǵan túnde mysyrlyq EgyptAir áýe kompanııasynyń ushaǵy radardan joǵalyp ketti. Ushaq Parıjden Kaırge baǵyt alǵan bolatyn ári Mysyr jaǵalaýynan shamamen 280 shaqyrym jerde radardan joǵalǵan. Áýe kemesinde 12 memlekettiń azamattary bolǵan. Jolaýshylardyń jalpy sany - 56. Ekıpaj músheleri segiz nemese toǵyz bolýy múmkin.
Mysyr Avıatsııa mınıstrligindegi derekkózder MS805 reısiniń joǵalyp ketken ushaǵynda Jer orta teńizine qular aldynda jarylys bolýy múmkin ekenin málim etti. Sarapshylardyń aıtýynsha, bortta terakt bolýy múmkin. «Rossııa 24» arnasyna bergen suhbatynda Reseıdiń eńbek sińirgen ushqyshy ıÝrıf Sytnık ekıpaj apat dabylyn qospaǵanyn, bul ushaqtyń aýada apatqa ushyraǵanyn bildiretindigin aıtty.
20 mamyr kúni joǵalyp ketken EgyptAir avıakompanııasynyń A320 ushaǵynyń synyqtary Jerorta teńizinde, Aleksandrııadan 290 shaqyrym jerden tabyldy. Bul aqparatty EgyptAir áýekompanııasy da rastady. Jergilikti áskerıler ushaq synyqtarymen birge MS804 reıs jolaýshylarynyń jeke zattary tabylǵandyǵyn málimdedi.
A320 ushaǵy 18 mln. dollarǵa deıingi somaǵa saqtandyrylǵan. «Ál-Fagr» jańalyqtar portalynyń habarlaýynsha, bul týraly Misr Insurance saqtandyrý kompanııasynyń basqarma tóraǵasy Ádel Musa málimdegen.
Onyń aıtýynsha, saqtandyrý qunynyń sońǵy baǵasy qaıǵyly oqıǵanyń naqty sebebi jarııalanǵan soń beriledi. Jolaýshylarǵa keletin bolsaq, Á.Musanyń aıtýynsha, tólemder olardyń azamattyǵyna baılanysty óteledi, sebebi saqtandyrýdyń osy túri úshin biryńǵaı standart belgilenbegen.
Aıta keterligi, Elbasy Nursultan Nazarbaev ushaq apatyna baılanysty Mysyr Arab Respýblıkasynyń Prezıdenti Ábdel Fattah Ás-Sısıge, Frantsýz Respýblıkasynyń Prezıdenti Fransýa Ollandqa kóńil aıtý jedelhatyn joldady.
Jedelhatta mysyrlyq avıakompanııa ushaǵynyń apatqa ushyraýy saldarynan kóp adamnyń qaza bolǵany týraly habardy Memleket basshysynyń zor kúızelispen qabyldaǵany atap ótilgen.
Nursultan Nazarbaev qaza bolǵandardyń týǵan-týystary men jaqyndaryna, sondaı-aq mysyr halqyna Qazaqstan halqynyń jáne jeke óziniń atynan kóńil aıtty.
