ÁLEM APTA ІShІNDE: Dúnıede lańkestik áreketter tyıylar emes

Malıde qonaq úıge shabýyl jasaldy

Juma kúni tań qylań bergende Batys Afrıkada ornalasqan Malı astanasy Bamakoda jıhadshy sodyrlar «Radisson Blu Hotel» qonaq úıine shabýyl jasap, shamamen 170 adamdy tutqynǵa aldy. Olardyń qatarynda shamamen 140 qonaq pen qonaq úıdiń 30 qyzmetkeri bar.

Sodyrlar basyp alǵan qonaq úı shetelidkter arasynda zor suranysqa ıe. Onda Malıde jumys isteıtin kóptegen halyqaralyq uıymdardyń ókilderi turady. Lańkester qonaq úıge negizgi qaqpa arqyly basyp kirip, kúzetshilerdi soqqyǵa jyqqan. Qonaq úıdegi sheteldikterdiń basym bóligi óz nómirlerine jasyrynǵan.

Buqaralyq aqparat quraldarynyń aqparatyna sáıkes tutqynǵa túskenderdiń arasynda 14 memlekettiń, onyń ishinde Aljır, Belgııa, Gvıneıa, Germanııa, Úndistan, Ispanııa, Kanada, Qytaı, Kot-d'Ivýar, Marokko, Reseı, Senegal, AQSh, Túrkııa, Frantsııa jáne basqa da elderdiń azamattary bar. QR Syrtqy ister mınıstriniń aldyn ala aqparatyna sáıkes, tutqyndar arasynda elimizdiń azamattary joq.

Birshama ýaqyttan keıin basqynshylar óz erikterimen birqatar tutqyndy bostandyqqa shyǵarǵan. Kýágerlerdiń aıtýynsha, adamdar Quran úzindilerin oqyǵannan keıin jiberilgen.

Shabýyl jasala salysymen Malı polıtsııasy qonaq úı ornalasqan aýdandy qorshaýǵa aldy. Osydan keıin biraz ýaqyt ótken soń el bıligi Bamako qonaq úıine kúsh-qýat qurylymdary shabýyldaý operatsııasyn bastaǵanyn habarlady. Bastapqyda arnaıy operatsııany Malıdiń kúsh-qýat qurylymdary júrgizse, sál keıinirek olarǵa Frantsııanyń lańkestikke qarsy arnaıy bólimshesi kómekke keldi.

Lańkester tutqyndardy quqyq qorǵaý organdarynyń shabýyldaýyna qıyndyq týdyratyn qonaq úıdiń jertólesine, avtomobıl turaqtaryna jáne qoımalarǵa qamap qoıdy. Degenmen, lańkestikter qonaq úıdiń búkil ǵımaratyn baqylaýlarynda ustaı almaǵandyǵynan malaılyq áskerıler men Frantsııanyń arnaıy jasaǵyna shabýyl uıymdastyrý aıtarlyqtaı qıyndyq týdyra qoımady.

Arnaıy operatsııa barysynda shamamen 76 adam tutqynnan bosatyldy. Al bul ýaqytta lańkester qonaq úı qabattarynyń birinde tosqaýyl qoıyp, jasyrynyp qaldy. Biraq, ǵımaratta áli de bolsa 100-ge jýyq adam bar bolatyn. Abyroı bolǵanda olar lańkesterdiń qolyna túspeı, óz bólmelerinde jasyrynǵan edi.

Munan ary arnaıy jasaq barlyq sodyrlardyń kózin joıdy. Lańkestik shabýyl barysynda 2 sodyrdy qosa alǵanda keminde 21 adam qaza tapty, 10-ǵa jýyq adam jaraqattandy.

Osy oqıǵaǵa baılanysty elde tótenshe jaǵdaı, sonymen birge aza tutý kúni jarııalandy. Keıbir aqparattarǵa qaraǵanda, qonaq úıge shabyldaǵandar 10 adam bolǵan. Al basqa derekterde sodyrlardyń keminde 4-eý bolǵany aıtylýda.

Lańkestik jaýapkershiligin eldiń soltústiginde shoǵyrlanǵan Ál-Kaıdamen baılanysy bar Ál-Mýrabıtýn toby óz moıyndaryna alyp otyr. Bul jaıyndaǵy aqparat lańkestik uıymnyń Twitter-degi paraqshasynda jarııa etildi.

Dál osyndaı oqıǵa Malıde aǵymdaǵy jyldyń tamyzynda oryn alyp, «ıslamshyldar» Sevare qalasyndaǵy «Bıblos» qonaq úıin basyp alǵan edi. Ol kezde BUU-nyń 5 qyzmetkerin qosa alǵanda 17 adam qaza tapqan-dy.

Malı Respýblıkasynyń soltústik-shyǵys bóligin Ál-Kaıdamen baılanysy bar «ıslamshylar» baqylaýynda ustaýda. 2013 jyly Malıge «ıslamshylarmen» kúreste kómek berý úshin Frantsııa men Germanııa áskerı qyzmetshileri elge kirigizilgen bolatyn.

Tel-Avıvtegi jáne Iordan ózeniniń batys jaǵalaýyndaǵy shabýyl

Beısenbi kúni 36 jastaǵy palestındik Raed ál-Masla Tel-Avıvtegi «Panorama» bıznes ortalyǵyna kelýshilerge shabýyl jasady. Buqaralyq aqparat quraldarynyń habarlaýynsha, ol eki adamdy pyshaqtap, odan keıin bir qabat tómen túsip, taǵy da birneshe adamǵa shabýyl jasaǵan.

Raed ál-Masla «Panorama» ǵımaratynda ornalasqan sınagogaǵa kirýge tyrysqan. Dál sol sátte onda shamamen 20 evreı bolǵan. Abyroı bolǵanda olar der ýaqytynda esikterin jaýyp alyp, sondyqtan palestındik dinı ǵımarat ishine kire almaǵan.

Ol úsh adamdy jaraqattady, onyń ekeýi aýrýhanada kóz jumdy. Al Raed ál-Maslany adamdar ustap alyp, quqyq qorǵaý organdary qyzmetkerlerine tabystaǵan.

Taratylǵan aqparatqa qaraǵanda, ol bıznes ortalyq ǵımaratyna taqaý jerde ornalasqan meıramhanada jumys istegen. Qaýipsizdik qyzmeti ókilderiniń aıtýynsha, tutqynǵa alynǵan azamat Izraıl aýmaǵynda zańdy túrde júrgen ári jumys isteýge ruqsaty bolǵan.

Dál osy oqıǵa oryn alǵannan keıin 2 saǵattan soń Iordannyń batys jaǵalaýyndaǵy Gýsh-Etsıon eldi mekeninde taǵy bir tosyn jaıt oryn aldy. Tas jol boıynda 24 jastaǵy palestıntik óz kóliginen kepteliste turǵan avtomobılderge qarata oq jaýdyrǵan.

Oqıǵa saldarynan úsh adam, amerıkandyq týrıst, ızraıldik jáne palestıntik qaza tapty. Munan bólek, aýyr jaraqat alǵan 7 adam aýrýhanaǵa jetkizildi.

Tergeý málimetterine sáıkes, palestındik júrip kele jatqan kóliginen oq jaýdyrǵan. Osydan keıin ol mashınasyn ızraıldik áskerıler tobyna qaraı baǵyttaýǵa tyrysqan sátte oqqa ushqan.

Buǵan qosa, oqıǵaǵa baılanysty basqa da málimetter aıtylýda. Oǵan sáıkes, shabýyldaýshylar 2-3 adam bolǵan. Olardyń birin ızraıldik jaýyngerler atyp tastasa, qalǵandary boı tasalaǵan.

El bıligi eki shabýyldy da lańkestik áreket dep baǵalaýda. Premer-Mınıstr Bınıamın Netanııagý kúsh-qýat qurylymdarymen keńes ótkizip, onda lańkestikpen kúres sharalary talqylandy.

BUU Bas hatshysy Pan Gı Mýn Izraıldegi lańkestik áreketterdi aıyptap, barlyq saıası, dinı jáne qoǵamdyq kóshbasshylardy mundaı aıýandyqtan arylýǵa shaqyrdy.

Aıta keterligi, Izraılde jáne Iordan ózeniniń batys jaǵalaýyndaǵy ahýal qazan aıynyń basynda shıelenisip ketken edi. Sońǵy aıda palestındikter 35 shabýyl jasap, sonyń nátıjesinde 6 ızraıldik qaza taýyp, 36-sy jaraqattanǵan edi. Al palestındik taraptan batys jaǵalaýda jáne Gaza sektorynda 11 adam qaza taýyp, 3,5 myńnan astam adam jaraqattanǵan bolatyn.