ÁLEM APTA ІShІNDE: Ázerbaıjan men Armenııa arasynda soǵys otynyń tutaný qaýpi kúsheıip keledi
ASTANA. QazAqparat - Ótip bara jatqan apta ishinde Ázerbaıjan men Armenııanyń Taýly Qarabaq aımaǵyndaǵy janjaly búkil álem jurtshylyǵynyń nazaryn ózine aýdartty. Este bolsa, sársenbi, 12 qarasha kúni ázerbaıjandyq qarýly kúshter taraptardyń túıisý núktesinde Armenııanyń MI-24 tikushaǵyn atyp túsirgen bolatyn. Bul Ázerbaıjan men Armenııa arasyndaǵy qaqtyǵystardy toqtatý týraly kelisimge qol jetkizilgen 20 jyldyń ishindegi eń soraqy oqıǵa retinde baǵalanýda.
Esterińizge sala ketsek, sársenbi kúni Ázerbaıjannyń Qorǵanys mınıstrligi el armııasynyń Armenııa qarýly kúshterine tıesili MI-24 tik ushaǵyn «Ázerbaıjan aýmaǵyna áýeden shabýyl jasamaq» sátinde atyp túsirgenin habarlaǵan-dy.
Mınıstrliktiń habarlamasyna qaraǵanda, 12 qarasha kúni Armenııa áskerı áýe kúshterine tıesili eki MI-24 tikushaǵy Agdam aýdanyndaǵy qorǵanystyń alǵy shepterine shabýyl jasaǵan. Qarymta qarýly soqqy kezinde bir tikushaq atyp túsirilip, ekinshisi keıin oralýǵa májbúr bolǵan. Ázerbaıjandyq taraptyń málimetterine sáıkes, tikushaqtyń barlyq úsh ekıpajy qaza tapqan.
Osy oqıǵadan keıin Ázerbaıjan Taýly Qarabaq ústindegi áýe keńistigindegi ushýlarǵa shekteý qoıdy. Al óz kezeginde Armenııa bıligi men tanylmaǵan Taýly Qarabaq Respýblıkasynyń (TQR) basshylyǵy MI-24 tikushaǵynyń TQR qarýly kúshterine tıesili bolǵandyǵyn ári onyń oqý-jattyǵý ushýlaryn júzege asyrǵandyǵyn aıtýda.
BUU bas hatshysy Pan Gı Mýn áskerı tikushaqtyń atyp túsirilýine baılanysty barynsha alańdaýshylyq tanytyp, taraptardy oqıǵany odan ári ýshyqtyrmaýǵa shaqyrdy.
BUU basshysy barlyq tarapty bitimgershilik týraly kelisimde oryndaýǵa úndeýde. Pan Gı Mýn olarǵa oryn alǵan ahýaldy odan ary ýshyqtyrmaý úshin kez kelgen qarymta qadamnan bas tartýdy keńes etýde. Sonymen qatar ol taraptarǵa Taýly Qarabaq janjalyn beıbit jolmen retteýge kómek beretin EQYU-nyń Mınsk tobyna jáne onyń úsh teńtóraǵasyna tolyq qoldaý bildiretindigin asa aıtty. Kóptegen halyqaralyq sarapshylar áskerı tikushaqqa qatysty bul oqıǵany bir taraptyń óz kúshin pash etý retinde baǵalaýda. Olardyń paıymynsha, ázerbaıjandyq tarap «turaqsyz beıbitshilikti» qoldaýda negiz bolýy múmkin. Degenmen, resmı Baký eldiń halyqaralyq qoǵamdastyq tanyǵan terrıtorııanyń bir bóiligi Armenııa baqylaýynda turǵandyǵyn álem jurtshylyǵynyń esine salýda.
Armenııa tarapy da eki el arasyndaǵy shıelenisti ýshyqtyrǵan sátterdi qalt jibermeýge tyrysýda. Máselen, aǵymdaǵy jyldyń 31 shildesinde armııandyq áskerı kúshter úsh taraptan ázerbaıjandyq pozıtsııaǵa shabýyldap, qarsy memlekettiń áskerı qyzmetshileriniń ólimine sebepker bolǵan edi. Sondyqtan da sarapshylar tikushaqtyń atyp túsirilýin armenııalyq qarýly kúshterdiń jazdaǵy shabýylyna qarymta retinde baǵalaýda.
Aıta keterligi, sońǵy jyldary Baký munaıdan túsken mıllıondaǵan dollardy jańa aýyr áskerı qarý-jaraqtardy satyp alýǵa jumsap, áskerı qýatyn arttyrýǵa jantalasýda. Mundaı qadamǵa Erevannyń da baryp otyrǵany belgili.
Zorlyq-zombylyqtyń jańa núktesiniń týyndaý qaýpi taraptardyń jańa soǵys otyn tutandyrýǵa bir taban jaqyn ekendigin bildirse kerek. Degenmen, olardyń óz múddelerin durys qorǵaı alýy ári álemdik qoǵamdastyqtyń qatań nazary sebepti ǵana soǵys otynyń órshýine jol berilmeı otyr. Biraq jaǵdaıdyń kez kelgen ýaqytta ýshyǵyp, soǵys otynyń tutanýy qaýpi basym ekendigi de jasyryn emes. Óıtkeni Erevan ushaǵynyń atyp túsirilýine baılanysty qarymta jaýap qaıtaratyndyǵyn qazirdiń ózinde málimdep otyr.
