ÁLEM APTA ІShІNDE: Avtomobıl ındýstrııasynyń sońǵy jetistikteri álem nazaryna usynyldy
85-shi Jeneva avtosalony
Seısenbi kúni Shveıtsarııa astanasynda 85-shi Jeneva halyqaralyq avtosalony bastaldy. Aldymen bul avtosalonnyń shyǵý tarıhyna keler bolsaq, ol 1905 jyly alǵash ret 1200 sharshy metr alańda uıymdastyrylyp, kelýshilerdiń nazaryna ne bári 37 kólik usynylǵan bolatyn. Al búginde 70 000 sharshy metr alańda ótetin avtosalonda álemdik qoǵamdastyqtyń nazaryna avtoındýstrııanyń sońǵy jetistikteri sanalatyn birneshe júzdegen kólik usynylady.
«QazAqparat» oqyrmanyna kópshilik nazaryna usynylǵan eń qyzyqty kólik túrlerine qatysty aqparat usynady.
Sonymen, «Audi» kompanııasy ekinshi býyn R8 sýperkaryn usyndy. Jańa kólik kólemi 5,2 lıtrlik 610 attyń kúshi bar V10 Plus qozǵaltqyshymen jabdyqtalǵan. Nemis konstrýktorlarynyń aıtýynsha, R8 ne bári 3,5 sekýndtyń ishinde 100 sh/s deıin jyldamdyqty arttyra alady. Sýperkarmen qatar, tolyǵymen elektr energııasymen júretin 462 attyń kúshi bar «Audi R8 e-tron» jáne «Audi R8 LMS» modeliniń jarysqa arnalǵan túrlendirilgen túri de tanystyryldy. Budan bólek, jol talǵamaıtyn «Audi Q7 e-tron» kóligi de kópshilik nazaryna usynyldy. Atalǵan kólik dızelmen jáne elektr energııasymen júredi. Elektr energııasy 56 shaqyrymdyq joldy eńserýge tolyǵymen jetedi. Bul kólik 2016 jyldyń kókteminde satylymǵa shyǵarylmaq.
Al «Bentley» kompanııasy jańartylǵan «Continental GT Speed» nusqasyn tanystyrdy. Álemdegi eń jyldam brıtandyq kólik jańartylyp, odan ary qýatyn eseleı túsken. Endigi ýaqytta 635 attyń kúshi bar kólemi 6 lıtrlik W12 tvın-týrbo qozǵaltqyshty kólik saǵatyna 331 shaqyrymdyq jyldamdyqpen júıtkıdi. Amerıkandyq «Ford» kompanııasy barynsha yqshamdalǵan «EcoSport» krossoverin jrtshylyqqa kórsetti. Jańa modelde dızaınerler kóliktiń júk salatyn bóligi esigindegi qosalqy dóńgelekti alyp tastaǵan. Al ońtústikkoreılik «Hyundai» kompanııasy ortasha kólemdi «Tucson» krossoveriniń jańa gıbrıdti túrlendirilgen túrin álem nazaryna usyndy. Brıtandyq «Land Rover» kompanııasy yqshamdalǵan «Evoque» krossoveriniń jańa túrin tanystyrdy. Aıta keterligi, bul kólik aǵymdaǵy jyldyń tamyz aıynan bastap resmı satylymǵa shyǵarylmaq.
Kólik 7 jıyntyqtalǵan nusqasy bolady, ázirshe baǵasy belgisiz. Jeneva avtosalony aıasynda japondyq alyp kompanııa «Mitsubishi» qoǵam uzaq kútken «Mitsubishi XR-PHEV II» krossoverin tanystyrdy. Al frantsýzdyń «Renault» markasy ekinshi býynnyń «Nissan Qashqai» modeli negizinde jasalǵan jınaqy «Kadjar» krossoveriniń sıpattamasyn jarııalady. Avtomobıl kólemi 1,5 lıtrlik trýbodızeldi, 1,6 lıtrlik dızeldi jáne 1,2 lıtrlik benzındi qozǵaltqyshy bar úsh túrin satylymǵa shyǵarmaq. Kóliktiń Eýropadaǵy satylymy osy jyldyń jazynda bastalady.
Chehııanyń «Skoda» kompanııasy Jenevada «MQB» folksvagen negizindegi «Superb» lıftbegin jurt nazaryna usyndy. Kóliktiń jańa nusqasy buǵan deıingi markalarymen salystyrǵanda 80 mıllımetrge uzyn. Sondyqtan da kólikte jolaýshylar úshin oryn barynsha yńǵaıly jabdyqtalǵan. Al taǵy bir ontústikkoreılik «SsangYong» kompanııasy «Tivoli» krossoverin eýropalyqar úshin alǵash ret pash etti.
Kontsern jańa kólikti 1,6 lıtrlik benzındi jáne 1,6 lıtrlik dızeldi qozǵaltqyshpen usynyp otyr. Nemistiń «Opel» kompanııasy ókilderi avtosalonǵa kelýshilerdiń nazaryna jańa qalalyq kóliktiń tusaýyn kesti desek te bolady. «Opel» brendiniń negiziniń qalaýshylardyń biriniń ulynyń atyna qoıylǵan «Karl» kóligi kez kelgen azamattyń satyp alýyna qoljetimdi bolmaq. Onyń Germanııadaǵy quny 9500 eýrony quraıdy.
Barselonadaǵy halyqaralyq uıaly baılanys kórmesi
Osy dúısenbide, Barselonada Halyqaralyq uıaly baılanys kórmesi óz jumysyn bastady. Ádette bul álemdik aýqymdaǵy jıyndy Halyqaralyq uıaly baılanys kongresi dep te aıtyp jatady. Jalpy, bul jıynda álemniń túpkir-túpkirinen uıaly baılanys operatorlarynyń basshylary, uıaly telefon kompanııalarynyń basshylary men ony satýmen aılanysýshylar bas qosatyndyǵy belgili. Aıta keterligi, is-sharanyń basty qaharmany - búginde kez kelgen adamnyń qolynan tabylatyn uıaly telefon ekendigin aıtsaq artyq ta emes. Kórme aıasynda uıaly baılanys salasynda álemdik alpaýyt kompanııaǵa aınalǵan «Samsung» jurtshylyq nazaryna syrtqy qaby tutastaı metallmen qaptalǵan «Galaxy S6» smartfonyn usyndy. Oǵan qosa, kompanııa ótken jylǵy «Samsung Galaxy Note Edge» smartfonynyń zańdy jalǵasy sanalatyn dıspleıi sál doǵaldanyp kelgen «Galaxy S6 Edge» telefonyn da tanystyrdy.
«Galaxy S6» smartfony 5,1 dıýımdik dıspleımen jabdyqtalǵan. Aqparattardy saqtaýǵa arnalǵan jadysy - 32/64/128 Gbaıt. Qurylǵyda 16-megapıkseldik kamera bar. Sonymen birge 5 megapıkseldik kamera arqyly da túsirilim júrgizýge múmkindik jasalǵan. Aıta keterligi, jańa «Samsung Galaxy S6 Edge» smartfony GSMA Uıaly baılanys tehnologııalarynyń halyqaralyq salalyq qaýymdastyǵynan «Úzdik jańa uıaly telefon, planshet nemese devaıs» atty arnaıy marapatyna ıe boldy. Kompanııanyń bul syılyqqa ıe bolýy tek bıylǵy jyly ǵana emes. Este bolsa, ótken jyly da «Samsung» kompanııasy «Samsung Gear Fit» qurylǵysy úshin osy marapatqa laıyq dep tanylǵan. Eki smartfon da 2015 jyldyń 15 sáýirinen satylymǵa túspek.
