ÁLEM APTA ІShІNDE: Avstrııada 71 mıgrant jantúrshigerlik azappen óldi

Munan bólek, jahandyq jaǵymsyz jańalyqtar da álem jurtshylyǵyna jedel jetkeni belgili. Atap aıtqanda, Avstrııada 71 zańsyz mıgranttyń múrdesi tabylsa, AQSh-ta tikeleı efır barysynda 2 jýrnalısti atyp ketti.

Tangodan álem chempıonaty ótti

Juma kúni Argentınanyń astanasy Býeos-Aıreste eldiń bas qalasynyń Luna Park stadıonynda eki aptaǵa sozylǵan tangodan álem chempıonaty óz máresine jetti. Aǵymdaǵy jyly konkýrsanttardyń júzden júırik shyǵý úshin erekshe ter tógýimen erekshelendi desek te bolady. Óıtkeni, bul joly jarysqa álemniń 46 elinen shamamen 700 jup qatysqan edi.

Chempıonat salondyq jáne sahnalyq tango atty eki sanat boıynsha ótkizildi. Olardyń arasyndaǵy basty aıyrmashylyq, ekinshisi bul bıdiń «altyn ǵasyry» sanalatyn 1940 jyldarǵy stıldi qatań ustanady. Oǵan negizgi qadamdar men aıshyqtardy qamtıtyn baıaý yrǵaqty qozǵalys tán. Yrǵaqty qozǵalystardyń dálme-dál oryndalýyna basa nazar aýdarylady. Juptyń barlyq yrǵaǵy qushaqtasýǵa múmkindik beretin keńistikte ǵana oryn alýy tıis.

Al salondyq stıl bolsa sahnalyq tangoǵa múldem qarama-qaıshy. Onda qadamdar men aıshyqtar shalt oryndalyp, adamnyń delebesin qozdyra túsedi.

Sonymen Argentınanyń Kordova qalasynan kelgen Djonatan Saavedra men Klarısa Aragon chempıonat jeńimpazy atandy. «Salondyq tango» sanatyndaǵy ekinshi jáne úshinshi oryndar da argentınalyq juptardyń qanjyǵasyn maılady. «Bul men júzege asyrýǵa kópten beri talaptanyp kele jatqan armanym bolatyn. Jarysqa qatysqan kez kelgen juptyń jeńimpaz bolýǵa múmkindigi boldy. Nátıje ár ýaqytta tosyn bolatyndyǵy belgili, esh ýaqytta da jeńiske kimniń jetetindigin bilmeısiń», - deıdi Klarısa Aragon.

Bul jup tek sahnada ǵana emes, sonymen birge ómirde de juptary jarasqan jandar. Olardyń jeńiske jetý qupııasynyń biri osynda da sııaqty. «Klarısa maǵan tangoda kóp nárse úıretti. Men bastapqy sátten-aq bizdiń jeńiske jetkenimizdi qaladym», - dedi Djonatan Saavedra.

Al chempıonattyń sahnalyq tango sanatynyń jeńimpazy ári 5 myń dollar kólemindegi syıaqyny taǵy bir argentınalyq jup Eskel Lopes pen Kamılla Allegrı utyp aldy.

Tango bıi shyǵýynyń ǵasyrdan astam tarıhy bar. Bastapqyda bul bımen tek erkekter ǵana aınalysyp, sál keıinirek olar seriktes retinde jezókshe áıelderdi bıge tartqan. Al búgingi kúni bul bıi álemniń barlyq eline tanymal. Jyl saıyn Argentına astanasy Býenos-Aıreste tangodan álem chempıonaty ótkiziledi. Bı saıystaryn shamamen 100 myń adam tamashalasa, olardyń úshten biri sheteldikter bolyp keledi.

Avstrııada 71 mıgranttyń múrdesi tabyldy

Beısenbi kúni Avstrııa men Vengrııany jalǵaıtyn avtomagıstralda jol jıeginde toqtap turǵan et ónimderin tasıtyn júk kóliginen avstrııalyq quqyq qorǵaý organdarynyń qyzmetkerleri 71 zańsyz mıgranttyń múrdesin tapty. Avstrııalyq bılik ókilderiniń bastapqy taratqan aqparatynda júk kóliginen shamamen 50 adamnyń múrdesi tabylǵandyǵy aıtylǵan edi. Degenmen, bul málimetterdiń naqty derek emes ekendigi keıinnen belgili boldy. Avstrııa polıtsııasynyń habarlaýynsha, júk kóligi quqyq qorǵaý organdarynyń nazary aýǵanǵa deıin 1 táýlik boıy jol jıeginde turǵan.

Sot-medıtsınalyq saraptama málimetterine sáıkes, mıgranttar tunshyǵyp ólgen. Aldyn ala tekserý barysynda mıgranttardyń kóz jumǵanyna biraz ýaqyt bolǵany ári keıbiriniń múrdesi irip-shirı bastaǵany belgili boldy. Avtomashınany qaraý barysynda adamdardyń jantúrshigerlik azappen ólgeni anyqtaldy. Júk kóliginiń ishki qaptasynda tyrnaq izderi qalǵan, ıaǵnı, adamdar syrtqa shyǵýǵa tyrysqan.

Resmı málimetterge qaraǵanda, tynys alý múmkin emes júk kóligine mıgranttar lyq toly otyrǵan jáne kólik júrgizýshisi Serbııa shekarasynan Avstrııaǵa deıin esh jerde aıaldamastan jetken.

Qazirgi ýaqytta Vengrııada osy iske qatysy bar degen kúdikpen 7 adam tutqynǵa alyndy. Olar EO aýmaǵynda mıgranttardyń zańsyz tasymaldaýdy uıymdastyratyn kontrabandashylar ekendigi belgili.

Avstrııa Іshki ister mınıstri Iohanna Mıkl-Lıaıtner bul kúndi qaraly kún dep sanaıtyndyǵyn jáne qaza tapqandardyń týǵan-týystarymen birge aza tutatyndyǵyn atap ótti. Óz kezeginde eldiń Syrtqy ister mınıstri Sebastıan Kýrts Eýrazııalyq odaqtyń mıgranttardy qabyldaý jónindegi saıasatynyń basty erejeleri jumys istemeıtindigin málimdedi.

Aıta keterligi, júk kóligi Venada mıgranttardyń problemasyna arnalǵan sammıt ótetin kúni tabylǵan bolatyn.

«Bul adamdar Eýropaǵa pana izdep keledi. Biz ózimizdiń adam quqyǵy salasyndaǵy standarttarymyzdy saqtaýǵa jáne bul adamdardyń quqyqtaryn qorǵaý jónindegi halyqaralyq mindettemelerdi qurmetteýge tıispiz», - dedi EO-nyń syrtqy ister jáne qaýipsizdik saıasaty jónindegi joǵary ókili Federıka Mogerını atalǵan oqıǵaǵa qatysty pikirin bildire kele.

Tikeleı efırde jýrnalıst oqqa ushty

Sársenbi kúni AQSh-tyń Vırdjınııa shtatynda WDBJ7 telearnasynyń tikeleı efırine qosylý kezinde 2 jýrnalıst oqqa ushty. Sonymen qatar olarǵa suhbat berip turǵan áıel de jaraqat aldy.

Qaıǵyly oqıǵa tamyzdyń 26-sy kúni tańerteń oryn alǵan. Telearna qyzmetkerleri 27 jastaǵy operator Adam Ýord pen 24 jastaǵy tilshi Elıson Parker Bridgewater Plaza saýda ortalyǵyna kelip, shtattaǵy eń tanymal saýda oıyn-saýyq ortalyǵynyń jumysy jaıynda reportaj jasamaq bolǵan.

E.Parker jergilikti saýda palatasynyń qyzmetkerinen suhbat ala bastaǵan kezde oq atylyp, jýrnalısterdiń ekeýi sol jerde qaza tapsa, suhbat berýshi áıel jaraqattanǵan.

Osydan keıin qylmysker oqıǵa ornynan boı tasalap, ony izdeýge ondaǵan polıtsııa qyzmetkerleri jumyldyrylǵan. Kósheler qorshaýǵa alynyp, qaýipsizdik maqsatynda qaladaǵy mektepter jabylǵan. Taratylǵan aqparatqa qaraǵanda, qylmysker avtomagıstral arqyly qashyp ketpekke árekettengen. Biraq, polıtsııa izine túskennen keıin ol óz-ózine qol jumsaǵan.

Sál keıinirek WDBJ7 telearnasynyń qyzmetkerlerin olardyń burynǵy áriptesi 41 jastaǵy Vester Lı Flenagannyń atqany belgili boldy. Aıta keterligi, Flenagan óz áriptesterin óltirý barysyn uıaly telefonyna túsirip alǵan.

Atalǵan jazbada onyń uzaq ýaqyt boıy áriptesterin nysanaǵa alyp turǵany anyq baıqalady. Biraq, muny jumysqa kirisip ketken jýrnalıster esh baıqamaǵan. Uzaqqa sozylǵan úzilisten keıin qylmysker áriptesterine oq jaýdyrǵan.

Flenagan bul qylmysqa birneshe apta boıy daıyndalǵan. Ol úshin 2 tapansha satyp alyp, oqqa áriptesteriniń esimderin oıyp jazǵan, kólikti jalǵa alǵan jáne «Ózime jáne dostaryma ólim aldyndaǵy jazba» dep atalatyn 23 bettik hat qaldyrǵan.

Batys BAQ-tarynyń habarlaýynsha, Flenagan qyzmettik mansaby jolynda sońǵy ýaqytta sátsizdikke jıi ushyraǵan. Máselen, Florıdanyń WTWC telearasynan jumystan shyǵarylǵannan keıin sotqa talap aryz jazyp, óziniń násildik qysymǵa ushyraǵandyǵyn atap kórsetken. Sál keıinirek Vırdjınııanyń WDBJ7 telearnasynda jumys istegenimen 2 jyl buryn teris qylyqtary úshin jumystan qýylǵan.

Jumystan shyǵarylǵannan keıin ol eńbek ınspektsııasyna shaǵymdanǵan. Biraq onyń shaǵymy qaralmaǵan. Óıtkeni, telearna basshylyǵy ózderiniń durys qadamǵa barǵandyǵyn dáleldep bergen. Osydan keıin Flenagan burynǵy jumys berýshisin sotqa bergenimen, bul joly da mańdaıy tasqa tıgen.