ÁLEM APTA ІShІNDE: Aýǵanstan men Pákistandaǵy jer silkinisinen 400-den astam adam qaza tapty
ASTANA. QazAqparat - Ótip bara jatqan apta ishinde álem halqy taǵy da birqatar qaıǵyly oqıǵanyń kýási boldy. Atap aıtqanda, dúısenbi kúni Aýǵan-pákistan shekarasynda jer silkinip, sonyń saldarynan 400-den adam kóz jumdy. Aýǵanstannyń, Pákistannyń jáne Úndistannyń soltústik bóliginiń kóptegen turǵyndary tabıǵı apattan zardap shekti. Sonymen qatar ótken jeksenbi kúni Kanada jaǵalaýynda bortynda 27 adam bar «Levıafan ІІ» kemesi sýǵa batyp ketken bolatyn.
Aýǵanstan men Pákistandaǵy tabıǵı apat
Dúısenbi kúni Aýǵanstannyń soltústik-shyǵysynyń shalǵaı aýdanynda qýatty jer silkinisi oryn aldy. Zilzala kindigi Aýǵanstan astanasy Kabýl qalasynan soltústik-shyǵysqa qaraı, Gındýkýsh taý tizbegi tusynda shamamen 200 shaqyrymdyq tereńdikte tirkelgen.
Jer asty terbelis shamamen 1 mınýtqa sozylyp, Pákistan, Úndistan, Qyrǵyzstan jáne Qazaqstanda da sezildi. AQSh geologııalyq qyzmetiniń boljamyna sáıkes, tabıǵı apatqa Indostan jarty aralynyń Eýrazııa qurlyǵyna qaraı baıaý qozǵalýy túrtki bolǵan.
Sońǵy derekterge qaraǵanda, jer silkinisi saldarynan Pákistanda keminde 272 adam qaza taýyp, shamamen 2 myń adam túrli dene jaraqatyn alǵan. 13,5 myńnan astam úı qıraǵan. Al Aýǵanstanda tabıǵı apattan 14 ólke zardap shegip, 165 adam mert bolsa, 7,6 myńnan astam baspana búlingen. Zilzala kezinde keminde 12 balanyń da qaza tapqany belgili. Qaıǵyly oqıǵa Aýǵanstannyń Tahar ólkesindegi qyzdarǵa arnalǵan mektepte oryn alǵan. Jer silkinisi kezinde 12 oqýshy nópir astynda taptalyp qalǵan. 25 qyzdyń aýyr jaraqat alǵany da belgili. Munan bólek, Úndistanda 4 adam qaza tapty.
Elbasy Nursultan Nazarbaev Aýǵanstan Islam Respýblıkasynyń Prezıdenti Ashraf Ǵanıǵa jáne Pákistan Islam Respýblıkasynyń Premer-mınıstri Mıan Mohammad Navaz Sharıfke adam shyǵynyna ushyratqan kúshti zilzalaǵa baılanysty kóńil aıtý jedelhatyn joldady. Jedelhatta kóp adamnyń qaza tapqany jáne jaraqat alǵany týraly habardy Memleket basshysynyń zor kúızelispen qabyldaǵany atap ótilgen. Nursultan Nazarbaev jeke óziniń jáne Qazaqstan halqynyń atynan qaza bolǵandardyń týys-týǵandary men jaqyndaryna kóńil aıtty.
Beısenbi kúni «QR BǴM ǴK STÁE» MM seısmıkalyq stansalar jelisi jer silkinisin tirkedi. Zilzala oshaǵy Aýǵanstan aýmaǵynda, Almaty qalasynan ońtústikke-batysqa qaraı 861 shaqyrym qashyqtyqta ornalasqan. Jer silkinisiniń energetıkalyq synyby - 11.6. Magnıtýdasy - MPV 5.7. Tereńdigi - 200 shaqyrym», - delingen vedomstvonyń habarlamasynda.
Aýǵanstanda jer silkinisinen keıin tiri qalǵan turǵyndar beısenbi kúni qırandylar astynda qalǵan dúnıe-múlikterin qazyp ala bastady. Zardap shekkenderdiń basym bóligi - kedeıler. Sondyqtan olardyń barlyǵy da memleket tarapynan kómekke muqtaj.
Baspanasynan aıyrylǵan ondaǵan myń adam qys kezinde úısiz, qajetti kórpe-kópshikpen qatar jyly kıimsiz de qalatyn túri bar. Aıta keterligi, qys aılarynda óńirde aýa temperatýrasy 0 gradýstan da tómendeıdi dep kútilýde.
«Levıafan II» kemesi apatqa ushyrady
Jeksenbi kúni Kanada jaǵalaýynda «Levıafan II» kemesi sýa batyp ketti. 20 metrlik úsh palýbaly keme Vargas araly men Tofıno qalasyna taqaý jerde apatqa ushyrady.
Tofıno Vankýver aralynda ornalasqan. Ol sur Tynyq muhıty kıtin kórýdi qalaıtyndar úshin barynsha tanymal týrıstik aımaq sanalady.
Apat oryn alǵannan keıin jergilikti bılik keń aýqymdy qutqarý operatsııasyn júrgizdi. Oǵan 2 ushaq, tikushaq jáne jaǵalaý kúzetiniń 2 kemesi jumyldyryldy. Operatsııaǵa balyqshylar men jergilikti turǵyndardyń kemeleri de qatysty. Týrıstik kemeniń apatqa ushyraýy tosyn bolǵany sonshalyq, ekıpaj tipti SOS dabylyn da berip úlgere almaǵan. Aldyn ala tergeý amaldarynyń deregine sáıkes, kemeniń apatqa ushyraýyna kıt sebep bolýy múmkin.
Kýágerlerdiń aıtýynsha, týrıster toby bir mezette kemeniń jol jaq bortyna lap bergen. Dál osy sátte júzip kele jatqan kıt kemeni soǵyp, sonyń saldarynan ol aýdarylyp, sýǵa batyp ketken. Keme bortynda 27 adam bolǵan. Olardyń 21-i qutqarylyp, 6-aýy qaza tapty.
«Levıafan II» kemesi kıtterdi baqylaý saparlaryn uıymdastyratyn kompanııaǵa tıesili ekeni belgili. Aıta keterligi, 1998 jyly dál osy kompanııanyń taǵy bir kemesi 1998 jyly Tofıno tusynda sýǵa batqan bolatyn.
