ÁLEM APTA ІShІNDE: Aýǵanstan men Pákistanda lańkester qolynan 40-qa jýyq adam óldi
ASTANA. QazAqparat - Ótip bara jatqan apta ishinde Aýǵanstannyń Kabýl qalasy men Pákistannyń Chersadd qalalarynda lańkestik oryn aldy. Bir-birinen 300 shaqyrym qashyqtyqta ornalasqan eki qalada jarlyǵysh zat bir kúnniń ishinde iske qosyldy. Atap aıtqanda, Aýǵanstan astanasynda jankeshti kóligimen eldegi tanymal telearnanyń qyzmetkerleri mingen avtobýsty baryp soqsa, Pákistannyń soltústik-shyǵysynda qarýly adamdar «Bacha Han» ýnıversıtetiniń stýdentteri men oqytýshylaryna oq jaýdyrdy.
Kabýlda jýrnalısterge shabýyl jasaldy
Sársenbi kúni Aýǵanstannyń astanasy Kabýldyń adam kóp júretin úlken kósheleriniń biri Dar ýl-Amanda jankeshti-lańkes ishine jarylǵysh zat toltyrylǵan kóligin jaryp jiberdi. Shahıdtiń basty nysany Aýǵanstandaǵy eń tanymal «Tolo TV» telearnasynyń qyzmetkerleri mingen qyzmettik avtobýs bolǵan. Jarylys saldarynan 8 adam qaza taýyp, 24-i túrli dene jaraqatyn aldy.
Bul lańkestik jaýapkershiligin «Talıban» sodyrlary óz moıyndaryna alyp otyr. Este bolsa, ótken jyldyń qazan aıynda tálipter «Tolo TV» qyzmetkerleri men basqa jýrnalıster tarapynan kóptegen qylmystarǵa qatysty ekendikterin aıtyp, aıyptaǵannan keıin qoqan-loqy jasaǵan bolatyn.
BUU-nyń Aýǵanstanǵa kómek kórsetý jónindegi mıssııasynyń basshysy jankeshti-lańkes shabýylyn qatań aıyptaı kele aýǵan halqy eldegi jýrnalıstıka sektorynyń damý aıaq alysyna maqtanýy tıistigin basa aıtty.
«Qýǵyndaý jáne zorlyq-zombylyqpen qorqytýdan azat myqty ári táýelsiz jýrnalıstıka salamatty jáne laıyqty demokratııalyq qoǵam qurý úshin barynsha qajet», - deıdi BUU Bas hatshysynyń Aýǵanstandaǵy arnaıy ókiliniń orynbasary Tadamıchı ıAmamoto.
BUU-nyń joǵary shendi dılomaty eldegi buqaralyq aqparat quraldarynyń qaýipsizdigin jáne olardyń óz oılaryn erkin jetkizýin qamtamasyz etý úshin barlyq sharalar qabyldaý qajettigine basa nazar aýdartty.
Pákistan ýnıversıtetindegi qandy qyrǵyn
Sársenbi kúni Pákistannyń soltústik-batysynda Haıber-Pahtýnhva provıntsııasyndaǵy Charsadd qalasynda «Bacha Han» ýnıversıtetine shabýyl jasalǵany belgili boldy. Sodyrlar oqý ordasyna basyp kirgende olarmen betpe-bet kelgen ýnıversıtettiń qaýipsizdik qyzmetiniń 4 qyzmetkeri de oqqa ushqan. Dál osy sátte birqatar stýdent qaýipsiz jerge qashyp úlgergenimen, myńdaǵan stýdent ýnıversıtet ishinde qaqpanǵa túsken edi.
Keıbir derekterge qaraǵanda, shabýyl kúni ádeıi tańdap alynǵan. Óıtkeni, dál osy kúni esimi atalǵan ýnıversıtetke berilgen pýshtýndyq aqyn Abdýl Gaffar Handy eske alýǵa arnalǵan baıqaý ótýi tıis bolatyn.
Sodyrlar shabýyldaǵan sátte joǵary oqý ornynyń ǵımaratynda shamamen 3 myń stýdent jáne aqyndar saıysyna kelgen shamamen 600 qonaq bolǵan.
Pákistandyq áskerıler men polıtsııa qyzmetkerleri sodyrlarmen 6 saǵat boıy soǵysyp, nátıjesinde 4 sodyrdyń kózi joıyldy. Buqaralyq aqparat quraldarynyń derekterine qaraǵanda, lańkesterdiń shabýylynan keminde 30 adam qaza taýyp, 50-den astam jaraqat alǵan.
Jergilikti polıtsııa bul shabýyldy "Tehrık-ı-Talıban Pákistan" - "Talıban" terrorlyq qozǵalysynyń pákistandyq qanatynyń sodyrlary uıymdastyrdy dep otyr. BAQ málimetterine qaraǵanda, dalalyq komandır Ýmar Mansýr lańkestik áreketke óziniń qatysy bar ekendigin málim etken.
Birikken Ulttar Uıymynyń bas hatshysy Pan Gı Mýn lańkestik shabýyldy qatań aıyptap, qaza tapqandardyń otbasylaryna, sonymen qatar Pákistan Úkimeti men halqyna kóńil aıtty.
«Pan Gı Mýn stýdentterge, oqytýshylar men oqýshylarǵa jasalǵan shabýyldyń eshqandaı da dálelmen aqtaýǵa bolmaıtyndyǵyn taǵy da málimdedi. Jalpy bilim alý quqyǵyn qorǵaý qajet. Mektepter jáne basqa da bilim beretin mekemeler qaýipsiz oryn bolýy tıis jáne bul ustanymǵa qurmet kórsetý kerek», - delingen Pan Gı Mýnnyń atynan onyń baspasóz hatshysy jarııa etken málimdemede.
Buqaralyq aqparat quraldary Pákistan ýnıversıtetindegi bul shabýyldy «ekinshi Peshavar» dep ataýda. Este bolsa, osydan 1 jyldaı ýaqyt buryn Charsaddtan 50 shaqyrym jerde ornalasqan qaladaǵy áskerı mektepte dál osyndaı shabýyl oryn alǵan. Ol kezde lańkestik saldarynan 150-den astam adam qaza tapty. Olardyń basym bóligi balalar men jasóspirimder edi.
