ÁLEM APTA ІShІNDE: Apta boıy lańkestik shylaýyna ilikken Taıaý Shyǵys

Iraktaǵy qandy jeksenbi

Irakta «DAISh» lańkestik tobynyń qıturqy áreketteriniń beleń alýyna baılanysty qaýipsizdik salasyndaǵy kúrdeli ahýal áli de bolsa saqtalyp otyr. Ótip bara jatqan apta ishinde ǵana bul eldiń astanasy Baǵdad pen oǵan irgeles jatqan qalalarda birneshe jarylys oryn alǵan edi.

Máselen, sársenbi kúni Irak astanasynda úsh lańkestik oryn aldy. Jarylǵysh zat qoıylǵan úsh kólik el astanasynyń shyǵysynda, soltústiginde jáne batysynda kókke ushty. Aıta keterligi, Irak astanasynyń shyǵys bóligindegi Sadr-sıtı aýdanyndaǵy adam kóp jınalatyn bazarda oryn alyp, zardap shekkenderdiń de qatary kóp boldy. Naqty aıtqanda, keminde 66 adam ajal qushyp, jaraqat alǵandar 90-nan asyp otyr.

Kelesi jarylys túske jaqyn Baǵdadtyń batys bóliginde jasaldy. Jarylǵysh zat ornatylǵan kólikti basqarǵan jankeshti polıtsııa blokpostyna baryp soǵyldy. Sonyń saldarynan 18-den astam adam, onyń ishinde 5 polıtsııa qyzmetkeri ólip, taǵy 35 adam jaralandy.

Úshinshi jarylys shahardyń soltústik bóliginde iske qosyldy. Sońǵy málimetterge sáıkes, Baǵdadtaǵy úsh lańkestik shabýyl saldarynan 94 adam ólip, 150 adam túrli deńgeıde dene jaraqatyn aldy.

Kelesi kúni, 12 mamyrda 2 lańkest-jankeshti Abý-Greıb qalasyndaǵy polıtsııa ýchaskesinde shabýyldap, denesine jasyrylǵan jarylǵysh qurylǵyny iske qosty. Jaralystan keminde 3 adam qaza taýyp, keminde 10 adam jaralandy.

Al juma kúni belgisiz úsh adamnyń Balad qalasyndaǵy dámhanada otyrǵan adamdarǵa oq jaýdyrǵany belgili boldy. Shabýyldan 12 adam oqqa ushyp, taǵy 25-i jaraqat aldy.

Iraktaǵy bul lańkestik aktsııalardyń barlyǵynyń da jaýapkershiligin «DAISh» lańkestik toby óz moıyndaryna alyp otyr.

BUU Bas hatshysynyń Irak boıynsha arnaýly ókili Baǵdadtaǵy Sadr-Sıtı bazaryndaǵy jarylysty qatań aıyptady. Lańkestikke qatysy barlardy tez arada taýyp, olardy jaýapkershilikke tartýǵa shaqyrdy. Sonymen birge qaza tapqandardyń otbasylaryna kóńil aıtyp, jaraqat alǵandardyń tezirek saýyǵyp ketýine tilektestigin bildirdi.

Búginde Irakta kúrdeli ahýal oryn alyp otyr. Eldegi saıası daǵdarystyń kúsheıe túsýi aıasynda ulttyq qarýly kúshterdiń «DAISh» lańkestik tobymen teketiresi sozylyp ta ketti. Qaqtyǵys saldarynan kóptegen adamdar qaza tabýda, olardyń arasynda beıbit turǵyndar da kóp.

BUU-nyń Irakqa járdem kórsetý jónindegi mıssııasy usynǵan derekterge qaraǵanda, osy jyldyń sáýir aıynyń ishinde ǵana lańkestik shabýyldardyń, zorlyq-zombylyqtyń jáne qarýly qaqtyǵystardyń saldarynan 740 ıraktyq mert bolyp, shamamen 1370-i jaraqat alǵan. Qaqtyǵystardan kóp zardap shekken aýdandar men qalalardyń qatarynda Baǵdad shahary kósh bastap tur. Bul shahardyń ózinde ǵana sáýir aıynda 232 beıbit turǵyn oqqa ushyp, 642 adam jaraqattanǵan.

Joǵaryda atap ótken mıssııa usynǵan taǵy bir derekke qaraǵanda, ótken jyldyń ishinde Irakta lańkestik shabýyldar, zorlyq-zombylyq pen qarýly qaqtyǵystar saldarynan 22 myńnan astam adam qaza tapqan.

Mysyrlyq polıtseıler lańkester qurbany boldy

Jeksenbi kúni Kaırge irgeles Helvan qalasynda polıtsııa leıtenaty men onyń sheni tómen 7 qyzmettesi shaǵyn avtobýspen shaharǵa sholǵyn jasap kele jatqan. Alaıda, kenetten qala kósheleriniń birinde polıtsııa qyzmetkerleri mingen avtobýstyń jolyn pıkap kóligi bógep, odan shyqqan maskaly tórt adam oq jaýdyrǵan.

Kóliktegi barlyq polıtsııa qyzmetkerleri qaza tapty. Osy oqıǵadan keıin birden mysyrlyq kúsh-qýat qurylymdary qalanyń birqatar aýdandaryna tosqaýyl qoıyp, avtojoldardy jaýyp tastady. Biraq, qylmyskerler bul sátte boı tasalap úlgergen edi.

Derekterge qaraǵanda, qylmyskerler bul shabýylǵa tyńǵylyqty daıyndalǵan ári kóliktiń izin ańdyp otyrǵan. Bul qarasha aıynan beri Mysyrdaǵy «DAISh» lańkestik toby jasaǵan shabýyl bolyp otyr. Ol kezde lańkester 4 polıtsııa qyzmetkerin óltirgen edi.

Mysyr ishki ister mınıstr Magdı Abdel Gaffar qaza tapqan polıtsııalardy batyr dep atap, lańkesterge qarsy jumystar jalǵasatyndyǵyn basa aıtty.

Bul shabýyl jaýapkershiligin «DAISh» lańkestik tobynyń mysyrlyq uıashyǵy óz moıyndaryna alyp otyr. Áleýmettik jelilerde taratylǵan málimdemede «halıfat jaýyngerleri otrıady» Helvande polıtsııa shaǵyn avtobýsyna shabýyl jasap, olardy óltirip, qarý-jaraqtaryn alyp ketkendigi aıtylǵan.

2013 jyly prezıdent Mohammed Mýrsı taqtan taıdyrylǵannan keıin polıtsııa men armııa qyzmetkerlerine shabýyl kúsheıip ketken bolatyn.

Túrkııadaǵy shabýyl

Seısenbi kúni Túrkııanyń ońtústik-shyǵysyndaǵy Dııarbaqyr qalasynyń ortalyq kósheleriniń birinde jarylǵysh zat qoıylǵan avtomobıl jaryldy. Jarylys lańkestikke qatysy bar degen kúdikke ilingen tutqyndy áketip bara jatqan polıtsııa avtobýsy janyna oryn alǵan.

Oqıǵa saldarynan keminde 3 adam qaza taýyp, taǵy da 20-dan astam adam aýyr jaraqat alǵan bolatyn. Túrkııa bıligi bul jaıtty lańkestik dep atap, tutqynǵa túskenderdi áketip bar jatqan poltsııa avtobýsynda Kúrdistan jumysshylar partııasynyń ókilderi bolǵandyǵyn aıtýda.

Munan bólek, beısenbi kúni Ystambuldyń Sandjaktep aýdanynda armııa kazarmasy janynan avtomobıl jaryldy. Sonyń saldarynan 7 adam jaraqat alsa, onyń 5-eýi áskerı qyzmetshisi bolsa, eki qarapaıym azamat bolatyn. Olardyń barlyǵy da jeńil jaraqatpen aýrýhanaǵa jetkizildi.

Esterińizge sala keteıik, kúrdter shoǵyrlanǵan Dııarbaqyrda 31 naýryzda bomba qoıylǵan kólik jarylyp, 7 polıtseı qaza tapty. Taǵy 27 adam jaralandy. Jarylǵysh qurylǵy kóliktiń qasynan tártip saqshylaryn tıegen avtobýs óte bergende, alystan iske qosylǵan edi.