ÁLEM APTA ІShІNDE: «American Music Awards 2015» syılyǵy tabys etildi

«American Music Awards 2015» syılyǵy tabys etildi

Jeksenbi kúni Los-Andjelestiń «Microsoft Theatre» kontsert zalynda jyldyń jarqyn mýzykalyq oqıǵalarynyń biri «Microsoft Theatre» syılyǵyn tabystaý sharasy ótti.

Kezinde «Gremmıge» balama retinde shyǵarylǵan bul syılyq oǵan laıyqty básekeles bola almaǵandyǵy belgili. Degenmen, bul syılyqtyń basty ereksheligi - mýzyka maıtalmandary emes, qarapaıym tyńdaýshynyń daýys berýi nátıjesinde jeńimpazdyń anyqtalýynda.

Saltanatty sharanyń qyzyl kilemimen bul joly Djastın Bıber, Selena Gomes, Djıdjı Hadıd, sonymen qatar Kendall men Kaılı Djennerler syndy óner juldyzdary júrip ótti. Syılyqty tabystaý rásimin Djennıfer Lopes júrgizip, ol sahnaǵa ár shyqqan saıyn kıimin aýystyryp, kelýshilerdi tánti etti desek te bolady.

Aıta keterligi, taıaýda ǵana Parıjde, Mysyr men Malıde ótken lańkestik áreketter saltanatty sharanyń arqaýyna aınaldy. Máselen, amerıkandyq akter ári «Thirty Seconds to Mars» rok-tobynyń ánshisi Djared Leto lańkestik áreketterden qaza tapqandardy eske aldy. «Aǵymdaǵy jyly biz Parıjde, «Bataklan» zalynda óner kórsetken edik. Bul kontsert jadymyzda máńgi qalady. Alaıda, barlyǵynyń da qalaı jedel ózgeretindigin ýaqyt kórsetip berdi», - dedi tanymal ánshi óz sózindi.

Sonymen qatar ol lańkestik áreketterden qaza tapqandardy kúızelispen eske aldy. «Búginde biz Parıjde, álemniń basqa núktelerinde, Frantsııada, Reseıde, Sırııada, Malıde nemese Qurama Shtattarda zorlyq-zombylyq qurbandaryn eske alamyz», - dedi Djared Leto.

Sonymen qatar saltanatty shara barysynda «Bataklan» teatryna jasalǵan shabýyl barysynda súıikti jarynan aıyrylǵan frantsýz jýrnalısi Antýan Leırıstiń haty oqyldy. Osydan keıin sahnaǵa Selın Dıon shyǵyp, Edıt Pıaftyń «Hymne à L'amour» («Mahabbat ánurany») kompozıtsııasyn oryndady.

Aǵymdaǵy jyl ártisi atalymynda «One Direction» toby osymen ekinshi márte jeńiske jetti. Buǵan qosa, toptyń jankúıerleri olardy úzdik pop-rok top dep tanydy. Aıta keterligi, osy kóktemde bul toptyń bir múshesi shyǵyp ketken edi.

Al Teılor Svıfttiń «Blank Space» áni men «1989» albomy úzdik dep tanyldy. Úzdik oryndaýshy atalymynda, Ed Shıran, al áıelder arasynda Arıana Grande jeńiske jetti.

Sonymen qatar mártebeli syılyqty jeńip alýshylardyń qatarynda Rıanna (úzdik R-n-B oryndaýshysy), Nıkı Mınaj (úzdik hıp-hop oryndaýshysy), «The Weeknd» (úzdik R-n-B oryndaýshy) ı «Fall Out Boy» (úzdik balama top) boldy.

Týnıstegi lańkestik

Seısenbi kúni keshkisin Týnıs astanasynda lańkes-jankeshti prezıdenttik kúzet qyzmetkerleri mingen avtobýstyń ishinde ózin-ózi jaryp jiberdi. Respýblıka Іshki ister mınıstrliginiń resmı derekterine qaraǵanda, jankeshti avtobýstyń ishine shamamen 10 keli jarylǵysh zat alyp kirgen.

Osy oqıǵadan keıin Týnıs prezıdenti Kaın es-Sebı kúsh-qýat qurylymdarymen jedel keńes ótkizip, nátıjesinde elde 30 táýlik merzimge tótenshe jaǵdaı rejimin engizý týraly sheshim qabyldandy.

Osy ýaqyt aralyǵynda Týnıs astanasynda jáne irgeles qalashyqtarda komendattyq saǵat engiziletin bolady. Buǵan qosa, ulttyq qaýipsizdik keńesiniń sheshimimen Lıvııamen shekara 15 táýlikke jabyldy.

Resmı derekterge sáıkes lańkestik áreketterdiń saldarynan lańkesti qosa alǵanda 13 adam qaza taýyp, taǵy 17 adam túrli dárejede dene jaraqatyn alǵan. Saýsaq izderiniń kómegi arqyly prezıdent kúzeti qyzmetiniń 12 qyzmetkeri tanyldy. Al lańkes-jankeshti 1988 jyly dúnıege kelgen Týnıs azamaty Hýssam ben Hedı Ben Mıled Abdellı ekendigi belgili boldy. Onyń aty-jóni DNK saraptamasyn júrgizgennen keıin anyqtaldy.

Bul lańkestik jaýapkershiligin «DAISh»-pen baılanysy bar toptardyń biri óz moıyndaryna alyp otyrǵany belgili. Bul jaıynda sodyrlar taratqan aqparatta aıtylǵan.

Bıliktiń taratqan aqparatyna qaraǵanda, 26-ynan 27-shi qarashaǵa qaraǵan túnde respýblıkanyń barlyq óńirlerinde eldiń ulttyq gvardııasy 367 tekserý júrgizgen. Nátıjesinde lańkestik uıymǵa qatysy bar degen kúdikpen 40-qa jýyq adam tutqynǵa alynǵan.

Eldegi tótenshe jaǵdaıdy retteýmen baılanysty Jarlyqqa sáıkes Týnıstiń Іshki ister mınıstri qaýipti adamdardy tutqynǵa alý týraly 92 qaýly shyǵarǵan.

BUU Qaýipsizdik keńesi men uıymnyń bas hatshysy Pan Gı Mýn lańkestik áreketti aıyptap, qaza tapqandardyń týǵan-týystaryna kóńil aıtty.

BUU Qaýipsizdik keńesiniń músheleri bul lańkestikti oryndaýshylardy, uıymdastyrýshylardy jáne qarjylandyrýshylardy taýyp, jaýapkershilik tartý qajettigin atap ótip, barlyq memleketterdi bul baǵytta Týnıs bıligimen belsendi yntymaqtastyqty jolǵa qoıýdy úndedi.

Aıta keterligi, bul osy jyldyń ishindegi Tnıste oryn alǵan úshinshi aýqymdy lańkestik áreket. Mamyr aıynda sodyrlar «Bardo» murajaıyna shabýyldap, 20 sheteldik pen bir polıtseıdi óltirgen bolatyn. Al maýsymda Sýs qalasyndaǵy qonaq úı aýmaǵyna sodyrlar basyp kirip, 38 adamdy atyp tastaǵan edi.