ÁLEM APTA ІShІNDE: Álem jurtshylyǵy Jańa jyldy qarsy aldy
ASTANA. QazAqparat - Qoı jylynyń sońǵy aptasynda ǵalamshar turǵyndary jańa 2016 jyldy shat-shadyman kóńil-kúımen qarsy aldy. Sıdneıden bastap Nıý-Iorkke deıingi aralyqty mekendegen barsha álem jurtshylyǵy bul merekeni jappaı toılap, merekelik kóńil-kúıdi kókke shashylǵan kózdiń jaýyn alar feıerverk shoýy kótere tústi. Degenmen, lańkestik qaýipten qaýiptengen Eýropa jurtshylyǵy merekelik is-sharalar ótetin kezeńde qaýipsizdik sharalaryn barynsha kúsheıte tústi. Tipti, keıbir qalalar Jańa jyldyq otshashýdan da bas tartty.
Sonymen, adamzat balasy taǵy bir jańa jyldy tórge ozdyrdy. Mereke eń aldymen Avstralııada bastalyp, otshashý shoýyn kórmek bolǵan mıllıonnan astam adam Sıdneıdegi aılaqqa jınaldy. Olar túngi aspan aıasynda otshashýdan altyn ári kúmis tústi san alýan beıneni tamashalady. 12 mınýtqa sozylǵan otshashý barysynda 7 tonnaǵa jýyq pırotehnıka shyǵyndaldy.
Sál keıinirek Japonııa astanasy Tokıo qalasynyń myńdaǵan turǵyny Zoıoıı ǵıbadathanasynda jańa jyldy qarsy aldy. Týra túngi saǵat 12-00-de osynaý býddalardyń qasıetti ǵıbadathanasyna qońyraý 108 márte soǵyldy. Sonymen qatar kúnshyǵys elordasynyń turǵyndary «Tokyo Tower» televızııalyq munara mańyna da jınalyp, dál túngi 00-00-de aspanǵa birneshe myń aq áýe sharlaryn ushyrdy.
Al Dýbaıda álemdegi eń záýlim «Býrdj Halıfa» (829 metr) ǵımaraty janynda álemdegi eń úlken otshashý boldy. Aıta keterligi, ókinishke oraı Dýbaıda Address Hotel Downtown qonaqúıi otqa oranyp, jergilikti bılikti biraz ábigerge salǵan bolatyn. Óıtkeni, atalǵan qonaq úı «Býrdj Halıfanyń» qasynda ornalasqan bolatyn. 63 qabatty Address Hotel Downtown qonaqúıindegi órt 20-shy qabatynan bastalǵan. Tilsiz jaýmen ámirliktiń azamattyq qorǵanys kúshteriniń tikushaqtary men órt sóndirý qyzmeti kúresti. Abyroı bolǵanda órtten zardap shekkender joq. Qala mýnıtsıpalıteti tótenshe oqıǵaǵa qaramastan, «Býrdj Halıfada» jańa jyldyq saltanatty ótkizdi. Jarty saǵatqa sozylǵan otshashý kezinde 1,6 tonna pırotehnıka men 400 myń LED-jaryqtandyrǵysh qoldanyldy. Ony 2 mıllıonnan astam adam tamashalady.
Aıtpaqshy, mereke túni Jańa jyldy Downtown aýdanynda qarsy alǵysy keletin Dýbaı qalasynyń turǵyndary men qonaqtaryn polıtseıler «boıdaqtar» jáne otbasyly dep ekige bóldi. Belgili bir kúnderi tek januıalylar ǵana qatynaıtyn «Búkilálemdik aýyl» jármeńkesi ýaqytynda boıdaqtardyń kelýine shekteý baıaǵydan bar bolsa da, bul shara Dýbaıda alǵash ret qabyldanǵan edi.
Al Eýropada 2016 jyldyń tabaldyryqtan attaýy Londondaǵy Bıg-Ben saǵatynyń qońyraý soǵýymen bastalyp, «London Eye» tóńirekti sholý dóńgelegi tusyndaǵy otshashýǵa ulasty. Trafalgar alańyna Norvegııadan jetkizilgen úlken shyrsha ornatyldy. Onyń bıliktigi 25 metrdi quraıdy.
Parıjde de el bıliginiń túrli lańkestik áreketterden qaýiptenýine qaramastan jańa jyldy qarsy alý sharasy óz deńgeıinde ótkizildi. Biraq, jańajyldyq otshashý bolǵan joq.
Brıýsseldegi jańa jyldy qarsy alý sharalary da pırotehnıkalyq shoýsyz ótti. Bul eldiń bıligi de lańkestik áreketterdiń oryn alýynan qaýiptengen bolatyn. Al Berlınde qalanyń júz myńdaǵan turǵyny men álemniń túkpir-túkpirinen kelgen týrıster Brandenbýrg qaqpasy mańyna jınalyp, kókke shashylǵan túrli-tústi otshashýdyń kýási boldy.
Brazılııanyń Rıo-de Janeırov qalasynda shamamen 2 mıllıon adam Meshin jylyn ataqty Kopakaban jaǵajaıynda qarsy aldy. Teńizde turǵan kemeden 16 mınýtqa sozylǵan otshashý jasaldy. Jalpy, oǵan 24 tonna pırotehnıkanyń ketkendigi belgili.
Qaýipsizdik sharalarynyń qatańdatylýyna qaramastan Nıý-Iorkte de mıllıonǵa jýyq adam jańa jyldy qarsy alý úshin Taıms-skverge jınaldy. Budan bólek 100 mıllıonnan astam adam osy alańda oryn alyp jatqan merekelik sharalardy teledıdardan tamashalady. Jalpy, jańajyldyq sharalardy teledıdardan tamashalaǵan kórermenderdiń sany Jer sharynda mıllıard adamǵa jetti.
