ÁLEM APTA ІShІNDE: AQSh-tyń Iemendegi Elshiligine shabýyl jasaldy
ASTANA. QazAqparat - Ótip bara jatqan apta ishinde álemdik qoǵamdastyqtyń nazary Eýroodaqtyń beıresmı sammıtine aýdy. Eýropanyń kóshbasshylary bas qosqan jıynda lańkestikpen kúres, eýroaımaqtaǵy problemalar jáne Ýkraınanyń shyǵysyndaǵy ahýal talqyǵa túsken bolatyn. Sondaı-aq sársenbide Iemende AQSh elshiligi tonalyp, amerıkandyq dıplomatııalyq ókildiktiń 20 kóligi urlandy. Dál osy kúni Italııada «Kosta Konkordııa» kemesiniń kapıtanyna qatysty qylmystyq is aıaqtaldy.
Eýroodaqtyń beıresmı sammıti
Beısenbi kúni Eýropalyq odaqtyń memleket jáne Úkimet basshylary EO-nyń beıresmı sammıti otyrysyna qatysý úshin Brıýsselge jınaldy. Aıta keterligi, alqaly jıyn belgilengen merziminen úsh saǵatqa keshigip bastaldy. Óıtkeni, jıynǵa qatysýshylar Germanııa kantsleri Angela Merkel men Frantsııa Prezıdenti Fransýa Ollandtyń Mınskidegi kelissózderden oralýyn kútken edi.
Eýropalyq kóshbasshylar kezdesýiniń sharyqtaý shegi EO sammıtine Grekııa Premer-Mınıstri Aleksıs Tsıprastyń birinshi ret qatysýy boldy.
Brıýsselde ótken pikirsaıystardyń nátıjesinde A.Tsıpras pen Eýrotoptyń kóshbasshysy Ierýn Deıselblým «tehnıkalyq deńgeıdegi» suhbatty jalǵastyrý týraly ýaǵdalastyqqa qol jetkizdi. Grek úkimetiniń basshysy óz tarapynan Afınaǵa qosymsha kredıt berý týraly «ózara tıimdi» kelisimshart jaıy aǵymdaǵy jyldyń 16 aqpanynda ótetin Eýrotoptyń otyrysy nátıjesinde belgili bolatyndyǵyna senim artatyndyǵyn bildirdi.
EO-nyń beıresmı sammıti aıasynda talqyǵa túsken taqyryptardyń biri Mınskidegi «normand formatyndaǵy» sońǵy kezdesý aıasyndaǵy «ýkraındyq daǵdarysty» talqylaý boldy. Eýropalyq kóshbasshylar beıbit protsesstiń odan ary jalǵasatyndyǵyna úmit artty.
Iemendegi AQSh elshiligine shabýyl jasaldy
Sársenbi kúni «Ansar Alla» qozǵalysynyń búlikshileri Iemen Respýblıkasy astanasy Sana qalasyndaǵy AQSh elshiligin tonap, dıplomatııalyq ókildiktiń 20 avtomobılin aıdap ketti.
Eske kelse, budan sál erterek buryn, AQSh qaýipsizdik sharalaryna oraı elden óz azamattaryn qaýipsiz jerge kóshirý týraly sheshim qabyldaǵan bolatyn. Mundaı qadamǵa amerıkandyqtar qala kóshelerinde qarýly búlikshilerdiń sholǵyndaı bastaýyna oraı barǵan edi.
Taratylǵan aqparattarǵa qaraǵanda, Iemendegi AQSh elshiligin qorǵaǵan amerıkandyq áskerler óz otandaryna oralmas buryn barlyq qarý-jaraqtyń kózin joıǵan. Batystyq BAQ-tardyń taratqan aqparatyna qaraǵanda, Sanadan AQSh dıplomattarymen birge Ortalyq barlaý, áskerı barlaý qyzmetteriniń qyzmetteri de qaıtqan. Olar bul elde «Arabııa túbegindegi Ál-Kaıda» tobyna qarsy operatsııalar júrgizgen.
Sarapshylardyń pikirinshe, bul jaıt halyqaralyq lańkestikpen kúrestegi kúsh-jigerge baıypty kedergi keltirip otyr.
Juma kúni AQSh-tan keıin Iemendegi Frantsııa, Ulybrıtanııa jáne basqa da birqatar arab eliniń dıplomatııalyq mıssııalary jumystaryn toqtatty.
Esterińizge sala keteıik, qazirgi ýaqytta Iemen bıligi shııttik búlikshilerdiń qolynda. Olar eldiń Prezıdenti men Úkimet basshysyn taqtan taıdyrǵan bolatyn. Sońǵy apta boıy Iemenniń túrli saıası kúshteri BUU ókili Djamal Benomaranyń qatysýymen eldiń jańa bılik organyn qurý úshin kelissózder júrgizgenimen, naqty kelisimge kele almaı otyr.
«Kosta Konkordııa» kemesiniń kapıtany 16 jylǵa sottaldy
Sársenbi kúni Italııada «Kosta Konkordııa» kemesiniń kapıtany Franchesko Skettıno isi boıynsha sot sońǵy sheshimin shyǵardy. Sot ony kináli dep taýyp, 16 jylǵa bas bostandyǵynan aıyrdy. Sonymen qatar ol keme apatynda qaza tapqan adamdardyń týǵan-týystaryna birneshe mıllıondaǵan aıyppul tóleýge mindetti. Buǵan qosa, ol kez kelgen laýazymdy qyzmetti atqara almaıtyn boldy.
Aıta keterligi, F.Skettıno ózine taǵylǵan barlyq aıypty moıyndamaı otyr. Sondaı-aq ózimen birge sot aldynda qaýipsizdik normalaryn saqtamaǵan adamdardyń barlyǵy jaýap berý qajettigin basa aıtty.
Esterińizge sala ketsek, 2012 jyldyń 12 qańtarynda «Kosta Konkordııa» kemesi Djılo araly mańynda qaırańdap, apat saldarynan 32 adam ajal qushqan bolatyn.
